Library · hlt

SIR 29

29:1 Aka rhen long tah a imben te a pu bomnah kut aka thueng loh olpaek ni a tuem. 29:2 A ngoengaih tue vaengah tah na imben te pu lamtah, sahnah tue a pha vaengah na imben te koep thuung van. 29:3 Na olkhueh te tuem lamtah, a taengah uepom la om, tedaengah a tuetang boeih ah khaw na ngoe te na dang eh. 29:4 Cangpu he aka rhul mailai bangla muep a poek uh, Te dongah amih aka bom rhoek te khaw ngaihmangnah a paek. 29:5 Cangpu a dang hlan khuiah tah hlang loh a hui kut te a mok pah, a imben kah tangka kawng khaw a nah la a thui. A sah tue a pha vaengah tah uelh bal pueng tih, ol hong nen te koep a thung, a tuetang kah a lolhnah bueng te a phoei thil. 29:6 Puhlah kung te thuung sitoe cakhaw, rhakthuem tah a hoe tloel coeng. Te rhoek te khaw amah aka rhul maila bangla a ngai coeng. Purhong loh sah thai pawt khaw, a tangkah a huen pah la poeh Te dongah a ngoe muehla rhal a khueh. 29:7 Hlang a yet cangpu hlah ham a aal, he a moethae dongah moenih. A ngoe mueh ah hmaithae ka loh ni, tila a rhih uh dongah ni. 29:8 Tlayae paihmuen kah hlang taengah thinsen sak, na kutdoe aka lamtawn te khaw hloh pah boeh. 29:9 Olpaek bangla khodaeng te bom, a ngoengaih tue vaengah amih te kuttling la tueih boeh. 29:10 Na tangka te na manuca neh paya ham hlah pah, lungto hmui ah keet tih a hma lakah tah. 29:11 Khohni kah olpaek bangla na kawn te khaw tung lah, te te nang ham sui lakah khaw muep hoeikhang ni. 29:12 Doedannah te na thakvoh dongah tung, te longni puenthae khui lamkah nang n'hlawt eh. 29:13 Photling bai neh caai muk lakah khaw then, te long ni na rhal khaw a tloek eh. 29:14 Hlang then long tah imben ham rhi a khang pah, Tedae a ko aka talh long te anih te a hlong ni. 29:15 Nang ham rhikhangkung kah a thennah te hnil boeh, anih loh a hingnah te nang ham a paek coeng dongah. 29:16 Hlangtholh long tah rhikhangkung kah khuehtawn a poek a yak, 29:17 Lungmong long khaw amah kah rhi aka khang te a hnoo. 29:18 Saphuem yuh long khaw khuehtawn muep a poci sak, amih te tuitunli kah tuphu bangla muep a niknuk sak. Mingom hlang khaw saldong la boeih a tueih tih, namtom kholong taengah a poengdoe sak. 29:19 Hlang tholh long tah saphuemyuh lamloh kothae a thoeng sak, laithui vaengah khaw a kum a ko caak ham ni a hloem. 29:20 Na coengah neh a then koek la na imben te bom, tedae na cungku pawt ham mah ngaithuen. 29:21 Hingnah ham a kuek tah tui, buh neh hnicu pawn ni, mah pum kah hil-uepnah ham tah im he a ngoe bal. 29:22 Hlang im kah buh tui lakli ah khosak lakah tah, mah imphu hmuiah khodaeng la khosak he then ngai. 29:23 A yol a yet ah khaw ngaikhueknah mah khueh, te daengah ni yinlai kah kokhahnah khaw na yaak pawt eh. 29:24 Im khat lamloh im khat la caeh khing he khaw khosak thae la om, yinlai bangla na ka khaw na ang ngoeng mahpawh. 29:25 Buh na kok tih tui na tul cakhaw uem hae mahpawh, Te vaengah hekah olkha ol he ni na yaak eh. 29:26 “Yin hoel halo lah, caboei phaih laeh, na khueh boeih te ka ca pawn ni. 29:27 Yin hoel nong laeh, hlangcong yin halo, ka manuca loh kai taengah lai-om, imkhan ka ngaih,” a ti ni 29:28 Aka yaknga hlang ham tah a ueh tloel coeng, lampah bangla a ho tih purhong bangla a voek te.