SIR 30
30:1 A ca aka lungnah long tah boh yoeyah, tedaengah ni omngaihnah longpuei la mael eh.
30:2 A ca aka toel hlang tah amah ham hoeikhang, A hmaiben rhoek taengah anih ham thangpom uh ni.
30:3 A ca aka thuituen long a rhal khaw a thatlaih sak tih, a hui lakliah tangpomnah a dang bal.
30:4 Amah hnukthoi la amah bang te a khueh coeng dongah, a napa duek dae aka duek pawt bangla om.
30:5 Amah a hing vaengah omngaihnah a hmuh tih a dueknah hnin ah khaw nguek voel pawh.
30:6 Anih long tah thunkha taengah tawn aka lo khaw, paya kah boethen aka thuung ham khaw a khueh coeng.
30:7 A ca aka dom long tah a hma ni a poi rhoeng, a rhah takuem ah thinphatnah ni a yook.
30:8 Marhang a phaep mueh he a thinthah, ca a toel mueh khaw a thin len.
30:9 Camoe tuem ngaih khaw namah n'hih vetih, na luem puei cakhaw namah ni n'toeh eh.
30:10 Anih te nueih puei boeh, anih dongah na kothae ve, A hnukhueng ah tah na no ni rhueng hae eh.
30:11 A noe vaengah yalpo la khueh aih boeh, a tholhdalh te khaw hnoelrhoeng boeh.
30:12 A noe vaengah a lu buluk sak lamtah, a camoe vaengah a nam ah khaw tam. A thinlen vetih na ol ngai pawt ve, te vaengah a hinglu loh na kothaenah ni m'paek eh.
30:13 Na ca te toel lamtah hnorhih khaw phueih sak, Te daengah ni nang a yadaeng neh nang n'tloelh pawt eh.
30:14 Boei tih pumsa aka ngoicaem lakah tah, khodaeng dae sading neh pumrho soep he then.
30:15 Sadingnah neh pumrho soep nah he sui lakah, Bihaam pum he tah taelek mueh boeinah lakah then.
30:16 Pumrho sadingnah lakah aka then khuehtawn he om pawt tih, Thinko omngaihnah soah kohoenah he a om bal moenih.
30:17 Dueknah he tah citcai neh hing lakah, Kumhal duemnah he tloh neh ngoicaemnah lakah then.
30:18 Ka aka buem soah hnothen n'lung he, hlan dongah buh an n'nawn banghui la om.
30:19 Mueirhol taengah a nawn te balam nim? Ca thai pawt tih a him thai hae moenih, Pathen kah dantat rhoek khaw amah te tlam ni a om.
30:20 A mik loh a hmuh vaengah a huei te, tildit rhoek loh hula a kop vaengkah a huei banghui pawn ni.
30:21 Kothaenah dongah na pum khaw voei aih boeh, na hilawtkuelh lamkhaw na ngaihmang boeh.
30:22 Thinko omngaihnah he amah hingnah la om tih, kohoenah long hlang kah hinglung a sen sak.
30:23 Na pum dom lamtah, mongnah khueh, kothaenah te namah ne a hla la khueh, Kothaenah loh hlang muep a phae tih, te lamkah te hoeikhangnah a thoeng moenih.
30:24 Uetnah neh thintoeknah loh hing a toi sak, mawntangnah loh hlang yueya a patong sak.
30:25 Caboei kungah a kohoe tih aka uem tah, a buh dong lamloh amah hoeikhang van ni.