Library · hlt

SIR 34

34:1 Kotalh rhoek loh a hong neh laithae a ngaiuep a mang kah neh hlang ang rhoek te a mikhip. 34:2 Mueihlip a tuuk tih mueihlip a hloem banghui la, mueimang kah he u long a tangnah moenih. 34:3 Mueimang kah a hmuh khaw amah a tuengnah mai ni, a maelhmai koep a dang banghui mai ni. 34:4 Tuinu khuiah tuicil a om thai pawt bangla olhong khuiah khaw oltak a om thai moenih. 34:5 Kutyaek, bihma neh mueimang khaw a hong ni, bungtloh vaengkah huta bangla lungbuei ah mang a tuk. 34:6 Khohni kah taenglamkah tukkainah neh han tueih pawt atah amih taengah hnakaeng ham khaw a om moenih. 34:7 Mueimang long he hlang muep a phok coeng, mueimang dongah ngaiuepnah aka khue khaw poci coeng. 34:8 Olkhueng tah te bangla thailatnah om muehla soep Cueihnah khaw uepom kah hmuilai ah cung coeng. 34:9 Lungming hlang loh muep a ming, aka phaep uh longnah metla a thui khaw a ming. 34:10 Aka phaep uh mueh loh a yol ni a ming 34:11 Tedae a yincaeh kah a hmat loh muep a cueih sak. 34:12 Yincaeh vaengah hno muep ka hmuh, ka yakmingnah he a ka phong thai lakah yet. 34:13 Dueknah mueirhih khaw ka pah taitui, tedae he ka tongnah rhangneh koep ka loeih. 34:14 Boeipa aka rhih rhoek kah mueihla tah hing ni, 34:15 amih ngaiuepnah khaw amih aka khang Boeipa dongah om. 34:16 Boeipa aka rhih tah a rhalyawp mah pawh, rhalrhih loh luemnah cakhaw Boeipa ni a ngaiuepnah. 34:17 Boeipa aka rhih tah a hinglu khaw a yoethen, 34:18 U long anih te a sawt? U long anih te a bom? 34:19 Boeipa kah mik tah amah aka lungnah taengah ni a om Boeipa tah photling len neh duelkung thaom la om. Hli hueng vaengah hlipyingnah, khothun ah khaw hlipkhup aka paloe khaw a tungaep tih, a cungku khaw cawt a duel. 34:20 Hinglu te a dangrhoek pah tih a mik te khaw a cil sak, cadingnah, hingnah neh yoethennah khaw a paek bal. 34:21 A huen hno neh aka nawn khaw, a nawnnah te cim pawh, 34:22 hlangthae pakha kah kutdoe khaw doe koi moenih. 34:23 Laitlak kah nawnnah te Khohni loh a doe pawt tih nawnnah muep a yet dongah mamih tholhnah a rhen moenih. 34:24 Khodaeng kah koe a loh tih nawnnah aka pae hlang tah, a napa mikhmuh ah a capa aka ngawn hlang banghui pawn ni. 34:25 Aka vawtthoek kah buhtling he khodaeng kah hingnah ni, amih aka yoop te hlang aka ngawn ne vai uh. 34:26 Imben kah khosaknah vik aka rhawt khaw hlang aka ngawn neh vai uh, 34:27 Bibi kung thapang aka yoop khaw thii aka long sak neh vai uh. 34:28 Hlang kah mikphi soah im aka sa khaw om, 34:29 Tedae a bibi a tloh phu te balae aka om? Pakhat te thangthui tih pakhat loh thae a phoei, Boeipa loh u kah ol nim a hnatun pa ve. 34:30 Rhok aka taek loh tui a hluk dae koep a taek atah Tui a hluk phu te balae a hoeikhangnah a om. 34:31 Hla khat loh a tholnah soah a yaeh coeng dae koep cet tih amah pawtlawt la koep om U long a thangthuinah a hnatun pa pai eh amah a kunyunnah te khaw balae a hoeikhang eh?