SIR 44
44:1 Ming thang hlang rhoek koehnah laa sa uh sih a pa rhoek kah a duengnah dongah khaw.
44:2 Boeipa loh amih te thangpomnah len neh, A cuekca lamlah a rhuepomnah te a yo sak.
44:3 A ram aka uk khaw ana om tih amamih kah tingtawknah loh amih ham ming a om sak. Lungming hlang loh cilsuep ana thui pa tih, amaih loh tonghma olrhuh khaw a phong uh.
44:4 A cilsuep rhangneh pilnam ana mawt, Amih mingnah rhangneh pilnam a lungcuei, Amih tah olka uentonah dongah khaw cueih uh,
44:5 Amih te phungding oldi la a khueh tih Amih tah tingtoenglung la a daek.
44:6 Boei hlang loh a kawn te a soem tih, a imkhuiah ngaimong la kho a sak.
44:7 Te boeih te a cadilcahma duela a hiyah uh tih, Amah tue vaengah khaw a oep uh.
44:8 Amih khuikah hlangvan loh a ming a caehtak, te dongah a tloe loh amih koehnah te a phong.
44:9 Tedae a ngen tah poekkoepnah om voel pawh, a om pawt hnukah tah poeknah khaw hmata, Amih te aka thang pawt hlang bangla, Amih hnukah a ca aka khueh pawt bangla om.
44:10 Tedae amih khaw Pathen kah hlang rhoek ni, Amih hlangdueng rhoek kah khoboe tah n'hnilh moenih.
44:11 Amih kah khuehtawn te a cadilcahma taengah om vetih, a rho te khaw a ca kah a ca patong taengah om ni.
44:12 A cadil khaw paipi tongah pai tih, A ca rhoek khaw amih ham ni a om.
44:13 A tiingan tah a yoeyah la pha uh veih, amih thangpomnah ta paa tlaih mahpawh.
44:14 A pum tah mongnah khuiah a up uh dae a ming tah cadilcahma phoeikah cadilcahma duela hing
44:15 Rhaengpuei loh amih kah cueihnah a phong uh, Hlangping loh amih koehnah te a doek uh.
44:16 Enok tah Boeipa loh a uem tih a loh, cadilcahma boeih taengah yutnah miknoek la om.
44:17 Noah tah hlang soep neh hlangdueng la phoe, kosi tue vaengah aka hing namtu la a khoem. Tuili halo vaengah anih tah, Diklai ah a meet la a khueh.
44:18 Anih taengah dungyan paipi a saii tih, Pumsa hing boeih te tuili loh et voel pawh.
44:19 Abraham tah namtom hlangping kah pa puei la om, thangpomnah dongah tah anih bangla om noek pawh.
44:20 Khohni kah olkhueng te a kuem coeng dongah anih neh paipi khuila a kun puei. Anih loh amah saa te moi la a nawn dongah, a noem het coeng tih uepom la a pom.
44:21 Boeipa loh anih taengah olhlo a cak sak, a cadil dong lamloh natom rhoek a yoethen. Anih tah diklai ah laipi yet la a ping sak tih, a tiingan te aisi bangla a pom sang. Amih te tupuei lamloh tuipuei hil rho a phaeng tih, Perath lamloh diklai khobawt hil a ping sak.
44:22 Isaak khaw a napa Abrahma rhangneh, ngaikhueknah a paek coeng. Pilnam boeih kah yoethennah neh paipi tah
44:23 Jakob lu dongah a tlak sak. Anih te a yoethennah neh a ming tih, a rho te a taengah a paek. A buhham khaw a moe nih, koca hlainit taengah a tael pah. Anih cadil khuiah Boeipa loh Pathen hlang a thoeng sak, anih tah hlang boeih mikhmuh ah mikdaithen la om.