SIR 45
45:1 Anih te Pathen neh Pilnam loh a lungnah, Mose aka poek a yoethen.
45:2 Boeipa loh anih te thangpomnah khuiah hlangcim vanat la a khueh anih te a tanglue sak dongah a thunkha loh a rhih,
45:3 A ol dongah minoek khaw tlek a saii, Anih te Boeipa loh manghai rhoek hmaiah a thangpom. Boeipa loh anih te pilnam hamla olkhueng a paek, anih taengah a thangpomnah a tueng sak.
45:4 A uepomnah neh kodonah dongah anih te a poek, hlanghing khuiah anih khoem a coelh.
45:5 Anih bueng te a ol a yaak sak tih, amah te khomong khomai khuila a khuen, Olkhueng a paek vaengah a hmai neh a hmai hum uh, te ah hingnah neh mingnah olkhueng rhoe pai ni. Te tlam ni Jakob kah paipi te a cangpuei vetih, a oltloeknah te Israel taengah a thuituen eh.
45:6 Boeipa loh Aaron a pomsang, hlang cim Moses bangla anih tah a manuca pai tih Levi koca khuikah ni.
45:7 Anih taengah khaw dungyan paipi a sai, anih te pilnam kah khosoih la a khueh. Boeipa loh anih te rhim-om la yoethen a paek tih, a pum dongah thangpomnah himbai a bai sai.
45:8 Anih te rhuepomnah te a soep a bai sak tih, saithainah miknoek neh a thaphoh.
45:9 Anih te tale thaih neh a yen tih, sui hlingthung muep a bang pah. A caeh vaengah hlingthung ol lo tih, a cai te bawkim khuiah a yaak uh. Te tah pilnam rhalrhingnah aka pae la om.
45:10 A cim himbai te sui neh a cangul neh, daidi neh aemkaek kah kutngo neh, Laitloeknah olrhuh neh, Urim neh, Thummim neh
45:11 Kuthai kah bibi neh a ling la a en tih kutnoek la a tarhit lung vang neh, Lungthen aka saii kah sui rhaiphuel neh, Israel koca te rhip poeknah ca khaw a tarhit.
45:12 A lupong soah sui rhuisam a khuem tih, “Cimcaihnah” kutha te a khueh pah. A khuetnah kutdoe, bibi a thoemnah la a mik dongah mikcuk la, muep a thoeihcam.
45:13 Anih hlan ah tebang hnothen a om noek moenih, Rhamvoel hlang khaw a bai sak noek moenih Tedae Aaron koca rhoek neh, a cadil taengah ni a khuui la a khueh.
45:14 Boeipa kah hmueh te a pum la a phum tih hnin takuem ah hnavoei hnavoei phat a phum.
45:15 Moses loh anih te a koelh anih te situi cim neh a koelh. Te tah anih ham kumhal kah paipi la om, Vaan a om khuiah tah a cadil rhoek ham kha a om pah. Boeipa ka bibikung la khosoih a bi sak tih, anih ming rhangneh pilnam a yoethen.
45:16 Mulhing boeih khuiah khaw Boeipa loh anih a coelh, pilnam ham tholh dawthnah aka khueh kung hamla.
45:17 A olpaek kahw anih taengah ni a paek, saithainah neh, olrhi khaw, laitloeknah khaw. Olphong te Jakob taengah aka cangpuei la, a olkhueng neh Israel mik aka tueng sak hamla.
45:18 Rhamvoel rhoek loh anih te a uevawt uh khosoek ah anih te a uet uh. Dathan neh Abiram kah a hnukbang rhoek loh Khosi neh thintoeknah khuiah Korah rhoihui long khaw.
45:19 Boeipa loh a hmuh vaengah a kolo pawh, Te dongah Boeipa kah thingtoek hmailing loh amih te a phae, Boeipa loh kopoekrhai hno a saii tih, amih te hmaisai hmai loh boeih a hlawp.
45:20 Aron tah thangpomnah koep a thap pah, Te dongah anih te rho neh a phaeng. Anih te thaih cuek tanglue a yo sak tih, thaih cuek buh te muep a tawn pah.
45:21 Boeipa kah hmueih a caak uh te, amah neh a cadilcahma taengah a pang sak.
45:22 Tedae anih pilnam kah khohmuen a pang sak moenih, Pilnam lakli ah khoyo khaw a khueh moenih. Boeipa amah te anih ham rho neh khoyo la om coeng.
45:23 Eleazar capa Phinehas tah thangpomnah dongah a pathum nah la om Anih tah Boeipa rhinah dongah khaw tlungmu. Pilnam boeih a hnukpoh vaengah a cak la pai, a hinglu longkhaw hlangtang kah rhalthennah a khueh, Te dongah Israel hamla tholh dawthnah a khueh pah.
45:24 Anih taengah paya kah paipi khaw a thoh pah tih, hmuencim neh a pilnam kah mawtkung la a khueh. Amah neh a cadil rhoek khaw kumhal kah, khosoih rhim-om la a om sak.
45:25 Judah koca Jeseecapa David taengah paipi a thoh vanbangla, Manghai rho te a ca lamloh a ca taengah a paek, te dongah Aaron kah rho tah amah cadil ham a khueh pah.
45:26 Te dongah Boeipa te uem uh laeh, Amah loh thangpomnah n'khuem sak coeng. Boeipa loh nang te kopoek cueihnah m'pae saeh. Pilnam te tiktamnah neh laitloek hamla. Te daengah a khobuhnah khaw a paa pawt vetih a cadilcahma taeng duela amih thangpomnah te a nguel eh.