SIR 8
8:1 Tha aka om neh khaw oelh uh rhoi boeh, amih kut ah na cungku tarha lah ve.
8:2 Boei nen khaw nen uh rhoi boeh, a khueh tawn loh nang m'payawk ve.
8:3 Ka aka ang soeh nen khaw tuituk uh boel lamtah, amih kah hmai dongah thing cum pah boeh.
8:4 Saipat la aka om nen khaw hawlthak coeng boeh, na pa rhoek te han soehsal ve ne.
8:5 Tholhnah khui lamloh aka mael ke palawmnah boeh, mamih he dantat aka yok la n'om te poek.
8:6 Pa tong te khaw hnael boeh ne, mamih khaw patong la n'om uh van ni.
8:7 Hlang a duek vaengah omtoem boeh, mamih khaw n'duek kuekluek ni tila poek.
8:8 Hlang cueih kah olka te hnoelrhoeng boeh, Tedae amih kah ollam nen te namah haam lah. Amih taeng lamkah ni olrhi neh, boei na bi ham khaw a longim na ming eh.
8:9 Patong kah olka te khaw hnalval boeh, amih khaw ana pa rhoek taeng lamlong ni ana cang. Metla na yakming ham khaw amih taeng lamloh cang lamtah, a ngoe vaengah tah ollannah aka pae ham ni.
8:10 Hlang tholh rhoek kah hmaili te tok pah boeh, namah te amih khaw hmai sai loh n'hlawp ve.
8:11 Calthai khaw na kho kungah pai sak boeh, Na ol soah rhongngol bangla n'tangkhuep ve.
8:12 Namah lakah aka tlung khaw hno vat boeh, na vat atah ka sung coeng tila poek laeh.
8:13 Na phanah kah a voel olhlo aih boeh, na hlo coeng atah lai na sah ham rhuengphong laeh.
8:14 Laitloekkung taegkah olkhueng te khaw paan boeh, A oltloek long te amah kolo taengah ni a pai hae eh.
8:15 Kuvit neh khaw yin la cet hmaih boeh, amih te nang taengah hnorhih lam ni a om eh. amamih ngaih bangla om uh vetih tih, amih kah anglatnah loh namah m'poci ni.
8:16 Thintoi te hnueih hamla rhut boeh, amih te khopong ram ah yin la caeh puei boeh. Thii a long khaw amih ham tah a poeyoek lam ni a ngai, Te dongah na kut dongah bomnah a om pawt vaengah, namah te mat m'boh uh ni.
8:17 Hlang ang nen khaw dawt uh rhoi boeh, amih loh olhuep a phah uh thai hae moenih.
8:18 Olhuep la khoem ham aka om te tah, hlang lak kah mikhmuh ah khaw sai boeh, amih loh metla n'yan ham khaw na ming moenih.
8:19 Na poeknah te hlang taengah khaw phoe tarha boeh, na omngaihnah te voek na vai lah ve.