SIR 9
9:1 Na rhang dongkah na yuu te khaw ngaihoih boeh, namah kah nganboh la boethae te n'cang puei ve.
9:2 Hu tang dongah khaw na pum pae aih boeh, na thadueng nah han suntlae ve ne.
9:3 Yalpo nu taengah khaw rhep cet boeh ne, anih khaw hlaeh dongah na cungku ve.
9:4 Laa sa nu nen khaw omthen rhoi boeh, a thailatnah lo nang te n'tu ve.
9:5 Oila nu khaw rhap so aih boeh, na paloe vetih anih ham te lai na hmuh ve.
9:6 Pumyoi taengah na pum te pae boeh, na koerhang te boeih na hlong lah ve.
9:7 Khopuei longpuei ah a hnukhmai la mael boeh, khosoek vang khuiah khaw dongpoeng boeh.
9:8 Na mik te aka phuekhlak nu taeng lamloh hoi lamtah, hlang taengkah sawthennah dongah mik-e boeh. Huta sakthen loh muep a yoek uh coeng tih, a lungduek loh hmai bangla a kolh uh coeng.
9:9 Hlang yuu taengah khaw buh va loeng boeh, Yu kungah khaw anih taengah nul boeh. Na thinko te anih taengla hoi uh vetih, thii loh pocinah khui la n'doek ve.
9:10 Paya rhuem rhoek te hnoo boeh, a thai rhoek khaw amih te a tluk moenih. Paya thai he yunoe bangla om tih, a ham daengah ni a naep la na ok thai.
9:11 Hlang tholh rhoek kah a hoeikhangnah khaw nai boeh, a hmailong metla a om ham khaw na ming moenih.
9:12 Lailak rhoek kah omthennah dongah khaw moo boeh, a khosaknah boeih te a langya la om hae mahpawh tila poek.
9:13 Hlang ngawn ham thaomnah aka khueh taenglam loh soei khoem uh te daengah ni dueknah rhihnah loh nang te n'huek pawt eh. Amih te na paan khoem atah a hlonah sai boeh, namah kah na hingnah vik hang rhawt uh ve.
9:14 Na coeng thai khui boeih neh, na imben te ming ham maetaengah khueh lamtah, hlang cueih neh dawtletnah khueh lah.
9:15 Na voemtoeinah boeih te pilnam lungming taengah om saeh lamtah Na oltloeknah boeih khaw Khohni kah olkhueng dongah om saeh.
9:16 Duengnah he na hlaembuh aka vaelpuei rhoihui la, Boeipa rhihnah te na thangpomnah la om saeh.
9:17 Bibi he tah kuthai kah thoemnah aka koeh la om, te dongah pilnam mawtkung longtah a ol te a cueihnah neh cak sak saeh.
9:18 Ol aka pap te khopuei ah khaw a rhih uh tih, olcal savek la aka om khaw a thinah uh.