Library · hlt

WIS 7

7:1 Kai khaw hlang boeiloeih bangla aka duekkoi lamni ka om. Diklai ca la a hlinsai cuek kah cadil van ni. Te dongah pumsaa la a nu bung khuiah n'hlom. 7:2 Hla rha khuiah thii neh n'cun tih hlang yuva kah huehuemnah a tii la ka om. 7:3 Ka thang paek neh rhaengpuei yilh te ka huep tih, ka diklai puei dongah ka yalh. Ka ol lamhma cuek ka rhah ol tih, boeih thuem coeng. 7:4 Himbai neh n'yol ca tih n'cun. 7:5 A tongnah a tloe la aka om manghai a om moenih, 7:6 A cungkuem khosaknah dongah a khui pakhat lamkah ha thoeng tih, longpuei pakhat lam ni a khum. 7:7 Te dongah ka thangthui tih kai he yakmingnah m'paek, Pathen te ka khue tih kai taengla cueihnah loh m'paan. 7:8 Ngolkhoel neh mancai lakah te te ka ngaih ai, Cueihnah neh ka nueh vaengah khuehtawn khaw a honghi ni. 7:9 Lungvang phu tlo lakah khaw cueihnah neh tluk pawt tih, cueihnah long tah cak khaw laipi bang lamni a ngai. 7:10 Cueinah neh sakthen lakah khaw amah te ka ngaih tih vangnah lakah khaw amah te ka coelh ngai. 7:11 Hno then boeih he amah lamkah ni kai taengla ha pawk, A kut dongkah khuehtawn ka tae lek pawh. 7:12 A cungkuem dongah ka omngaih he khaw, te rhoek te cueihnah loh a mawt dongah ni. 7:13 Vuelvaek mueh la ka thuep tih hnaih mueh la ka pak, A khuehtawn te khaw ka phah moenih. 7:14 Te tah hlanghing ham aka bawt pawh khuehtawn la om, Te aka dang tah Pathen neh paya la om nah a dang, A oluen dong lamloh kutdoe dongkah olpaek ha thoeng. 7:15 Tiktamnah neh cal hamla Pathen loh kai m'pae saeh, Ka dang hno neh a tingtawk la ka poek ham ka khueh. Amah tah cueihnah a hoihaengkung neh Hlangcueih aka toelkung la om. 7:16 Mamih neh mamih kah olka he a kut dongah om tih, Yakmingnah neh kuthainah bibi boeih khaw. 7:17 Amah loh aka lolh pawh mingnah aka om te mamih m'paek, Te dongah diklai kah a longim neh hnopai kah tatvuetnah khaw m'ming sak. 7:18 A tue a tongnah neh a laklung khaw, a bawtnah khaw, buhol a hoinah neh khoning a tho nah khaw, 7:19 Kum caehnah neh aisi, tlungkawt boeih khaw, 7:20 Rhamsa kha khosaknah neh kohong suva kah a thin khaw, baelhing soeprhaep neh thingyung rhopa kah a thennah khaw, 7:21 A huep aka om tih langya la aka phoe khaw a ming coeng, 7:22 Cueihnah ham tah a cungkuem aka picai kung loh, Kai n'thuituen coeng. 7:23 Rhennah, thincaknah, hiluepnah khaw, mongnah, thangpomnah, soepnah khaw, a cungkuem he soepboe thai ham ka yakming coeng. Thaomnah cungkuem, hmuhnah cungkuem neh, mueihla boeih khaw a muk. Te ni mingnah, cimnah neh muelhtuetnah la aka om. 7:24 Cueihnah tah aka tatthai lakah tatthai ngai, A cim dongah a cungkuem te a yaam tih a yaal thai. 7:25 Te tah Pathen kah thaomnah a hu la om tih, Tlungthang kah thangpomnah a aa la om bal. 7:26 A mah tah kumhal kah vangnah aka tueng sak la om tih, Pathen bisai dongah hmaidan cilping la om. 7:27 Amah pakhat bueng sitoe cakhaw a cungkuem a saii thai Amah bueng om cakhaw a cungkuem a caih sak thai. Cadilcahma boeih te hinglu cimnah a paek tih, Pathen paya neh tonghma la a khueh. 7:28 Cueihnah neh kho aka sa hlang bangla, Pathen loh bahoeng a lungnah he a om moenih. 7:29 Amah tah khomik lakah then tih, Aisi tlungkawt lakah khaw oe ngai. A vangnah khaw a oe ngai la tueng. 7:30 Te te khoyin loh hul mai sitoe cakhaw, cueihnah he boethae loh a poe thai moenih.