Library · hlt

Proverbs 2

2:1 Ka capa, kak awi ve do nawh kak awipek ve nak khuiawh na kym awhtaw, 2:2 Cyihnaak ce nang haa ing ngai nawh, nak kawlung ing cyihnaak lam benna ang hawi awh- taw; 2:3 Zaaksimnaak ce khy nawh, simthainaak ce nak khy awhtaw, 2:4 Tangka amyihna sui nawh, khawh amyihna na sui awhtaw, 2:5 Khawsa kqihchah lawthai kawm tik saw, Khawsa simthainaak ce ta kawp ti. 2:6 Khawsa ingtaw cyihnaak pe thai nawh, am khaa awhkawng cyihnaak ingkaw zaaksimthainaak ce cawn sak thai hy: 2:7 Ak thym thlangkhqi ham cyihnaak ak thym ce khoem nawh, ypawm ing ak khawsakhqi ce doen khqi hy. 2:8 Ak thlangciimkhqi ing ak thymna khaw a mi sak naak ham a mi lam ce doen pek khqi hy. 2:9 Cawhce dyngnaak ingkaw ak thym awitlyknaak ce sim thai kawm tik saw, pekbonaak a taak kaana, lam leek boeih awm. 2:10 Nak kawlung khuiawh cyihnaak ce lut kawm saw, na hqingnaak hamna simthainaak ce ak aawi soeihna awm kaw; 2:11 Khawsimnaak ing ni khoemdoen kawm saw, khawsimthainaak ing ni hqin kaw; 2:12 Thawlhnaak lam awhkawng a ni loet sak ham ingkaw amak thym awi ak kqawnkhqi lakawh kawng a nik loet sak hamna; 2:13 Cekkhqi ing taw seetnaak lamawh ceh ham lamdyng ce ceh taak unawh; 2:14 Theem amak leek sai ce ami ngaih kawina awm kawm saw, thawlh sainaak awh ce awmhly kawm uh; 2:15 A mi lam taw kaawi nawh, ypnaak am cu hy. 2:16 Nukche awhkawng ni loet sak nawh, a nik zoek ang lak awhkawng; 2:17 A cacoen hui awhkaw pyi ceh ta nawh, A Khawsa awikam ak hilh ak thlang awhkawng ce. 2:18 A im ing thihnaak lam ben mang nawh, a lam cehnaak ing thihnaak lam benna ce, 2:19 A ven ak pha thlang boeih ing am voei voel ti kaw, hqingnaak lam ce am pan voel ti kawm uh; 2:20 Thlakleek ceehnaak lamawh bang nawh, thlakdyng ceehnaak lamawh na ceeh naak thai ham. 2:21 Ak dyngna khawksa thlangkhqi taw ve khawmdek awh khawsa thai kawm usaw, thlakleek khqi taw ce hyn awh ce khawsa poe kawm uh; 2:22 Cehlai ak halang ak thlangkhqi taw khawmdek awhkawng qeeng sakna awm kawm saw amak thymna khaw ak sakhqi ce qeengsak na awm kaw.