Library · hlt

Proverbs 3

3:1 Ka capa, kak awipek ve koeh hilh nawh, nak kawlung awh kym lah. 3:2 Na hqingnaak khawnghii khawkum ingkaw ngaiqeepnaakkhqi ing ni tawmsap kaw. 3:3 Qeennaak ingkaw awitak ing nang ce koeh ni hooet seh. 3:4 Cawhtaw, Khawsa ingkaw thlanghqing mik huh awh mikhaileek ingkaw mingleeknaak ce pang kawp ti. 3:5 Nak kawlung boeih ing Bawipa ce caang na nawh, Na siimnaak awh koeh hang qu; 3:6 Na lam hoeiawh amah ce siim poe nawh, na lam ce nim huh kaw. 3:7 Namah ngaih awh ak cyina koeh ngai qu nawh; Bawipa ce kqih nawh, thawlhnaak ce cehtaak. 3:8 Nak thangqui ham sadingnaak na awm nawh, na quh ham ak thlikna awm kaw. 3:9 Na khawhkham ing Khawsa ce kyihcah lah. Na them ak pung law lammacyk boeih ing awm; 3:10 Cawhtaw nak khai baawp ing bee ngen kawm saw, na misur um ing bee poeng kaw. 3:11 Ka capa, Bawipa a toelnaak ce koeh husit nawh, A ni toelzyihnaak ce koeh zadam kawp ti. 3:12 Bawipa ing a lungnak cekhqi ce toel khawi nawh, Pa ing ca a lungnak awh a toelzyih khawi a myihna. 3:13 Cyihnaak ak hu ak thlang ingkaw kawcyihnaak ak hu ak thlang taw a zoseen hy. 3:14 Cetaw ngun a phu tlo ingkaw sui a phu tlo ang lakawh a phu tlo ngai hy. 3:15 Suilung a phu tlo lakawh a phu tlo ngai nawh ngaihnaak ing awm am pha thai hy. 3:16 Ak tangkut benawh hqinglung sangnaak awm nawh, ak cawngkut benawh khawhthem ingkaw boeimangnaak ce awm hy. 3:17 A lam ce awmhlynaak lampyina awm nawh, a lam boeihboeih ce ngaiqeepnaak ing bee hy. 3:18 Ak tuu thlang boeih ham hqingnaak thingkungna awm nawh, ak kym thlang boeih ham zoseennaak ni. 3:19 Bawipa ing a cyihnaak ing khawmdek ve syyn nawh, ak kawcyih ing khan ce caksak hy; 3:20 A thoemnaak ing tuinu ce hqaa sak nawh, cingmai ing daamtui baw sak hy. 3:21 Ka capa, na mik ing khaw koeh hang seh, cyihnaak ingkaw khawkpoek thainaak ce ak cakna tu; 3:22 Na hqingnaak ham hqingnaakna awm nawh, na haawng ham mikhaileek na awm kaw. 3:23 Cawhce na lamawh ak dingna cet kawm tik saw, na khaw am tawngtawh kaw. 3:24 Na ih awm am kqih kawm tik saw, nang zaih nawh na ih awhawm na ih tui kaw. 3:25 Kqihlyynaak bawtbet awh ak dang law ce koeh kqih nawh, thlang ak mukkhqi a pha law awhawm koeh kqih kawp ti. 3:26 Bawipa taw na loetnaak na awm nawh, na khaw thang awhkawng ni doen kaw. 3:27 Themleek ak hu tyngkhqi a do hly kawi themleek koeh haimah, na kutawh dangsak ham na taak khui taw. 3:28 Na imceng venawh, “Ceh nawh ak changna va sui cang nawh voei law tlaih khawngawi ni pe kawng nyng,” koeh ti, na taak a loeiawh. 3:29 Na imceng ak khanawh khawboeseet koeh toen, ni yp na nawh na venawh khawksa ni ti na sim loei. 3:30 Khawboeseetnaak nak khanawh a ma toen awhtaw leehcaihnaak a awm kaana na kut koeh thlak. 3:31 Khawboeseet ak toen ak thlang koeh ooet nawh a lampyi awh koeh hquut. 3:32 Ak thymna khaw amak sa taw Bawipa mikhuh awh tyih kawina awm nawh thlakleekkhqi taw pyi nak khqi hy. 3:33 Bawipa a khawsii taw thlakche khqi imawh awm nawh, thlakdyng khqi cunnaak taw zoseenaak ing bee hy. 3:34 Thlang ak husitkhqi ce husitkhqi nawh, kawkneemkhqi ce qeennaak ham sak khqi hy. 3:35 Kyihcahnaak taw thlakcyi ing ham nawh chahpyihnaak taw thlakqaw ing ham kaw.