Proverbs 5
5:1 Ka capa, ka cyihnaak ngai nawh, kak kawcyihnaak awh nang haa keng lah.
5:2 Khawkpoek thainaak ce khoem nawh, na hui nam lai ing simthainaak nam tu naak hamna.
5:3 Nukche a hui awhkawng khawitui cip nawh, am lai ce situi anglakawh plai hy.
5:4 A dytnaakna ankhamyihna kha nawh, pinhai amyihna hqaat hy.
5:5 A khaw ing thihnaak lam pan nawh, a khawngkham ing ceikhui lam pan hy.
5:6 Hqingnaak lam am huthai nawh, a cehnaak lam a mam dyng ce am huthai hy.
5:7 Ceamyihna awmsaw ka cakhqi aw, kak awi ngai unawh, kam kha awhkaw awi ak cawn law ve koeh mang tak.
5:8 Na lam ce anih awhkawng lak hla sak nawh, ak chawmkeng koeh va hem.
5:9 Cemyih kaataw na dawnaak ce thlang chang ven pe kawm saw, na kum ce khawsak amak leek thlang ven pe kawp ti.
5:10 Thlak changkhqi ce nak thaqui phu ham sak khqi nawh, na bibi phu ce am na siim imlangna pha kaw.
5:11 Na haikhaw a dyt lawawh na pum na saana hawn nawh kqaang kawp ti.
5:12 Cawhce, “Kawhamna cawngpyinaak ak thym ce hoet nawh, kak kawlung ing toelnaak ce kak husit qoe nu,
5:13 A nik cawngpyikungkhqi ak awi am haana nyng, a nik cawngpyikungkhqi venna kang haa am na keng nyng;
5:14 Thlang kqeeng ingkaw thlanghoei anglak-awh ka thih hlo hy,” ti kawp ti.
5:15 Na tui im awhkaw tui na tuipum ing thaan nawh aw.
5:16 Na tuihaa ce doem sak nawh lam keng awhkaw ak lawng hawk hawk tuinu amyihna coeng sak lah.
5:17 Namah ham doengna awm seitaw thlak-chang ing koeh ni qup pyi seh.
5:18 Na tui im awh zoseennaak awm seitaw, nak thaawm huiawh kaw na zuuawh ce nak kaw zeel sak.
5:19 A nih ce lungnak ak kap saksuk ingkaw ak daw soeih sakkhi amyihna, kawmyih a tym awhawm a lungnak ing nang ce ni zeel sak poe seh.
5:20 Ikaw hamnanu nang, ka capa ing nukche awh na zeel hly nawh ak kqang awh nang kooep hly?
5:21 Thlanghqing a cehnaak lam boeih ce Bawipa mik huhawh awm boeih nawh, a cehnaak lamkhqi boeih ce kawng sak boeih hy.
5:22 Amah a awmseetnaak ing thlakche ce tu kawm saw, a seetnaak qui ingawh amah ce pinzen kaw.
5:23 Cawngpyinaak a khawdeng caming thi kawm saw, a qawnak caming plam kaw.