Library · hlt

Proverbs 6

6:1 Ka capa, na pyi ham qii khoeng nawh khawlawng thlang khanawh na kut nak thlak awhtaw, 6:2 Nak awiawh namah awk nawh, nak awi kqawn ing namah ni pin nawh ni. 6:3 Ka capa, na pyi a kutawh taang vit hynyng ti nang simqu awhtaw na loetnaak hamna vemyihna sai kawp ti, na pyi venna cet, nak kawlung ce ak kaina phaih nawh qeennaak thoeh kawp ti. 6:4 Koeh ip, namik koeh kuu sak qoe kawp ti. 6:5 Sakzyym a kut awhkawng sakkhi a cen amyih ingkaw phak zym a kut awhkawng pha ang ding valh amyihna namah ce hul qu kawp ti. 6:6 Nang, thakdam pa, liing avena cet nawh, a khawsak ce toek nawh na cyih ta lah; 6:7 Anih ing boei, ak sawikung, khawkkhan kung am ta na. 6:8 Khawhqai awh a buh cun nawh cangmaa awh a ai sui hy. 6:9 Aw, thakdam pa, iqyt dy nu na ih hly? Ityk awh nu na ihnaak awhkawng na thawh hly? 6:10 Na ngaih awhtaw ip, ngam, kut boem nawh zaih, 6:11 Na ih hlanawh khawdengnaak ing khit cet amyihna ni pha kawm saw, awk voet ai vainaak ing ak tlung amyihna thoeng law kaw. 6:12 Thlakche ingkaw khawboeche thlang taw am khaaawh awioelhnaak ing ni a plam thaam hy. 6:13 Amik ing mikhqih, a khaw ing awi kqawn a kut dawn ing pho sak hy. 6:14 Ak kawlung am dyng nawh, seetnaak sai ham poeknaak ta poepa nawh, hqeehnaak sai poepa hy. 6:15 Cedawngawh ak poek kaana kyinaak ing thoeng law nawh bawtbetawh seetnaak ing pha kawm saw qoeinaak a huh voel kaana. 6:16 Khawsa ing a sawhnaak khquk awm nawh am tuih soeih khqeet awm hy. 6:17 Ak oe qu mikhai, thailatnaak ing ak be lai, thlakdyng a hqingnak ak lo kut, 6:18 amak leek them ak poek kawlung, thawlh sainaak benna hqingtawn ing ak dawng khaw, 6:19 a qaai kqawn nawh thailatnaak ing ak bee, ciingnapaca lakawh hqehnaak ak sai. 6:20 Ka capa, na pa awipek ve ngai nawh, na nu cawngpyinaak ce koeh mang taak. 6:21 Na kawlungawh khoemnawh, na hawngawh aawi poe lah. 6:22 Na cehnaak hoeiawh ni hqui nawh, na ih hui awhawm ni doen kawm saw, na thawh lawawh ni tym pau pyi kaw. 6:23 Awipek taw maihchoei na awm nawh, cawngpyinaak taw vaangnak ni, toelthamnaak taw hqingnaak lampyi ni. 6:24 Nu amak leek ingkaw awih tui ing thlang ak zoek thlangthai nu ang laak awhkawng a nik doen hamna; 6:25 Nak kawlung ing a dawnaak koeh nai nawh, a mikkhu ing koeh ni zoek seh nyng. 6:26 Pum ak zawi nu ak caming pa ing phaipi cunoet doeng ham nawh, samphaih nu ing hqinglung phutlo ce khoem thai hy. 6:27 Thlang ing a hii a uih kaana mai ce pawm hly thai nawh nu? 6:28 Thlang ing a khaw a uih kaana maihling leeh hly thai nawh nu? 6:29 A pyi a zuu venna cet nawh ak hei taw a uu pynoet awm kut thlak kaana am voei ti kaw. 6:30 Ak phoencawih dipnaak ham ak quu thlang awm am loet ti kaw; 6:31 A mi huh awhtaw a pyh khqihna sah seitaw a im awhkaw a them a long boeih ing sah kaw. 6:32 Kawlung ak talh nu taw samphaih, a hqinglu a seetnaak ham bi ak sai ni. 6:33 Tlohnat ingkaw chah phyi kawm saw ming seetnaak ce ham kaw. 6:34 Yytnaak kawlung taw pa khqi kawsonaak na awm nawh phu sui nynawh am loet ti kaw. 6:35 A mikhuh awh tlansum pynoet awm am khyn kawm saw them khawzah pek ingawm kaw am zeel sak kaw.