Proverbs 7
7:1 Ka capa, kak awi kqawn ve ngai nawh, kak awipek khqi boeih ve kym lah.
7:2 Kak awipek khqi ce haana nawh hqing pyi; kak awipek boeih ve mik amyihna qeetna.
7:3 Na kutawh byn nawh nak lingbyi catlap awh qee.
7:4 Cyihnaak venawh, “Ka nanu nang ni,” ti nawh, zaaksimnaak ce nam cawtnu na khy.
7:5 Nuk chee lakawh ni doen nawh khawsak amak leek nu a sykzoeknaak awhkawng a ni doen naak ham.
7:6 Ka im chawhhlep ak poek awhkawng qyym nyng,
7:7 Kawlung amak soep cadawng khqi ang lak awh cadawng poekthainaak amak ta ce hu nyng saw,
7:8 Nula a awmnaak lamkil benna ce cet nawh a im lam ce pan hy.
7:9 Khawmy nawh khawmthan, thanlung khuiawh ce nula im lam ce pan hy.
7:10 Ce nula taw pum ak zawi suihsak ing hlawihhlan qu nawh thailatnaak ing ak khawsa ni.
7:11 A hyy tho nawh imawh awm poekpoek ham am ngaih nawh a khawphaa ing dym am ngaih hy.
7:12 Tuhqoe awm imkawt awh, imkil awh, lamkil a hoeiawh van nawh sui hy.
7:13 A huh cadawng ce tunawh mawk hy, a hat thlang amyihna a venawh,
7:14 “Kaiawh qoepnaak hyih phum ham ka taak ce, tuhngawi kak awikam amyihna pha hawh hy.
7:15 Ceamyihna awm saw nang ak do ham ingkaw ak sui hamna law nyng, nang nihuk khoem nyng.
7:16 Ka ihkhunawh hiphaih ak leek soeih, Egypt hiphaih ce phaih nyng.
7:17 Ka ihkhun ce myrrah, aloe ingkaw thikuii ing hloen boeih hawh nyng.
7:18 Law lah, mymcang khaw a thaih hlan dy lungnaak ing nawm haih lah sih, lungnak ingawh ngaihsoep sak lah sih nyng.
7:19 Imawh ka vaa am awm hy, khawlawnk hla na khinna dii hy.
7:20 Tangka bawm khyn nawh, pihla a lum hlan dy am voei law hly hy,” ti na hy.
7:21 Ak awitui ing sykzoek nawh, am kyihcah qunaak ing lam hang pyi hy.
7:22 Cedawngawh him hamna a mi sawi vaitaw, ak qaw ami phepnaak qui aawi hamna ak cet,
7:23 Pha ing a thih hly a siim kaana ang hlaa ing ding nawh dawng lam a pan amyihna nula hu nace baang pahoei hy.
7:24 Cedawngawh ka capa khqi aw, kak awi ve ngai unawh, kam khaa awhkaw awi ak cawn law ve haana lah uh.
7:25 Nak kawlung ing a lamawh koeh hquut sei taw, a lampyi awhkawng ce pleeng seh nyng.
7:26 Anih ing thlang khawzah leembai sak nawh, a him khqi awm thlang khawzah ni.
7:27 A im taw Ceeikhui cehnaak lamna awm nawh, thihnaak imkhui na ak sawikung ni.