Psalms 60
60:1 Karai Kasang e, nang gaw anhte hpe ningdang kau nna; anhte hpe sum shangun kau nit dai. Nang gaw anhte hpe masin pawt kau ti mung, ya chyawm gaw, anhte hpang de bai kayin mada la mi.
60:2 Nang gaw lamu ga hpe gari ashun shangun nna, dai hpe nang kahtam hpaw kau nit dai; dai gaw ga ayai mat nga ai majaw ya dai nma ni hpe tsi shamai ya u.
60:3 Nang gaw na a amyu masha ni hpe nni nkri laja lana hkam sha shangun nit dai; anhte gaw chyaru nang ai ni zawn, ndi nda kayin hkawm nga ga ai.
60:4 Nang hpe hkrit hkungga ai ni gaw jahten shabyak ai kaw nna lawt wa lu na matu, shanhte hpe shadum jahprang nit dai.
60:5 Na a daru magam n-gun hte anhte hpe hkye hkrang la mi; anhte a akyu hpyi ai ga hpe mung htan ya mi, shing rai jang, nang tsaw ra ai amyu masha ni hkye mawai la ai hkrum na mara ai.
60:6 Shi a chyoi pra ai shara kaw nna Karai Kasang gaw, “Awng padang hte ngai Shehkem hpe garan na nngai, Suhkot kadit hpe mung nye a amyu masha ni a lata de garan ya na nngai.
60:7 Gilead gaw nye a rai nga ai, Manashe mung nye a rai nga li ai; Ehprim gaw nye a hpri gupchyawp rai nna, Yuda gaw nye a hkawhkam rai nga ai.
60:8 Rai ti mung, Moba hpe nye a lagaw kashin ai di zawn ngai lang kau na nngai; Edom a ntsa e mung, nye a hkyepdin hpe kabai tawn na nngai; dai gaw ngai madu la na ngu ai kumla rai nga ai. Hpilisti ni gaw nye a ntsa e, awng padang jahtau garu lu na mu ai nga nna, shanhte myit nawn nga masai kun?,” nga nna tsun wu ai.
60:9 O Karai Kasang e, dai ngang kang ai mare de, ngai hpe kadai woi sa na rai nga a ta? Edom de ngai hpe kadai woi sa na rai nga a ta?
60:10 Nang gaw anhte hpe teng teng kau da nu ni? Anhte a hpyen luksuk ni hte rau nang n pru sa nga n ni?
60:11 Gumlau hpyen wa hpe hkap daw na matu, anhte hpe karum la mi; masha a karum la ai lam gaw manu n dan nga ai.
60:12 Karai Kasang anhte a hpang maga de tsap yang, anhte awng padang lu la na ga ai; shi gaw anhte a gumlau hpyen ni hpe shamyit kau na ra ai.