Library · kac

Psalms 61

61:1 O Karai Kasang e, nye a jahtau ai nsen hpe na ya e; nye a akyu hpyi ga hpe madat ya e! 61:2 Dum nta hte tsan gang nna myit htum nga yang, ngai nang hpe shaga nngai! 61:3 Nang gaw ngai hpe makawp maga ai wa hte gumlau hpyen ni hpe ninghkap lu ai nye a ngang kang ai dahpran shara rai nga ndai majaw, ngai hpe shim ai shingbyi shara de woi wa e. 61:4 Nye a asak prat tup na a chyoi pra ai shara hta ngai nga nga lu n-ga; na a singkaw ni a npu e shim ai shara hta ngai shingwung lu n-ga. 61:5 O Karai Kasang e, nye ai ga sadi ni hpe na ya nit dai; nang hpe shagrau sha-a ai ni madu ai sali wunli ni nang ngai hpe jaw ya nit dai. 61:6 Hkawhkam wa a asak hpe shaning law law kahtap jat ya u; shing rai, shi gaw matut manoi asak galu nga u ga! 61:7 Karai Kasang e, na a man e, shi htani htana a up nga u ga: na a dinggrin tsaw ra myit hte sadi sahka ai myit gaw shi hpe makawp maga ya nga u. 61:8 Shaloi, ngai ga sadi jaw da ai hte maren, nang hpe shani shagu jaw nngai; nang hpe tut nawng mahkawn shakawn nga na nngai.