Proverbs 7
7:1 Ka fapa, ka thu pawm la, ka thupekte khawl khawm rawh.
7:2 Ka thupekte zawm la, nungdamin awm rawh; ka dan chu mit naute angin vawng rawh.
7:3 I zungtangah bun la, i thinlung phekah ziak rawh.
7:4 Finna hnenah chuan, "Ka farnu i ni," ti la, hriatna chu i laichinnu vuah rawh.
7:5 Hmeichhe sual laka veng a, hmeichhe khawlo thlemna laka veng tur chein.
7:6 Ka ina tukverh zawngdaikalh awng atang chuan ka han thlir a,
7:7 Mi mawl tlangval zingah chuan tlangval hriatna nei lo ka hmu a,
7:8 A awmna lam hnaih kawtthlerah chuan a kal tan a, a in lam a pan ta a,
7:9 Tlai lam thimhmulah zan thim, thim tak hnuaiah.
7:10 Ngai teh, nawhchizuar inthuam leh fin vervek rilru pu hmeichhiain a tawk a.
7:11 A awm hle hle thei lo a, a tum a ruh a, a ke chuan a ina awm a duh lo a;
7:12 Kawtthlerah te, peng thuam laiah te a awm a, kil tin, kil tangah a chang thin.
7:13 Chutichuan a man a, a fawp a, tlangnel tak hmel puin a hnenah,
7:14 'Remna thilhlana inthawinate ka hlan tur a ni a, vawiinah ka thutiam ka hlen ta a.
7:15 Chuvangin nangmah tawh tum chein ka lo kal a ni, ngun taka zawn tum chein, tin, ka hmu ta chia.
7:16 Ka khumah awngphah mawi tak ka phah a, Aigupta ram lazaia tial.
7:17 Ka khum chu beraw te, aloe te, thakthingtein ka tirimtui a.
7:18 Hawh teh, zankhuain hmangaihna duhtawkin i chen ang khai, hmangaihnain inhnem ang.
7:19 In neitupa lah a awm si lo, hla takah a zin a;
7:20 Tangka ip a keng a, thla hlei nga hunah a lo haw dawn a ni,' a ti a.
7:21 A tawngkam thiamin a thlem thlu a, a infak mawinain a hruai bo ta a.
7:22 A zui ta nghal mai a, bawng, a talhna hmuna a kal ang leh, mi a tihfin tura kawl bun tura a kal ang leh,
7:23 Savain a thihna tur a ni tih hre loa thalin a thin a dawh tlang thlenga thang lam a pan angin.
7:24 Chuvangin ka fapate u, ka thu hi ngaithla u la, ka kaa thu chhuakte hi pawm rawh u.
7:25 I thinlungin a kawngte chu awn suh se la, a kawngahte chuan kal bo suh.
7:26 Mi tam tak a hliam a, a ni, a thahte chu tam tak mai an ni.A in chu Seol kawng a ni a, thihna pindan a zuk chhun a.
7:27 A in chu Seol kawng a ni a, thihna pindan a zuk chhun a.