Library · lus

Proverbs 8

8:1 Finna chu a auin, hriatna chuan a aw a chhuah lo em ni? 8:2 Kawng sir ko sang chungah te, kawng thuamahte a ding thin a; 8:3 Khaw tawntirh kawngkaah, khaw luhna kawngka bulahte ring takin a au a. 8:4 Aw nangni mihringte u, ka auh che u hi, ka aw chu mihring fate tan a ni. 8:5 Aw, nangni mi mawlte u, remhriatna hi lo hre thiam teh u; nangni mi ate u, finna thinlung nei mi lo ni rawh u. 8:6 Ngaithla rawh u, thil tha tak mai ka sawi dawn a ni, ka thil sawite chu thil dik hlir a ni ang. 8:7 Ka ka chuan thutak a sawi chhuak ang a, suahsualna chu ka hmui tan thil tenawm a ni. 8:8 Ka kaa thu zawng zawngte chu a fel vel vek a ni, thu kawi leh bengtla lo reng reng a awm lo. 8:9 Hrethiamte tan a fiah vek a, finna hmutute tan a dik vek a ni. 8:10 Ka zirtirnate dawng rawh u, tangkate ni loin, tin, finna chu rangkachak duhawm mai ai pawhin. 8:11 Finna chu lunghlu sen mi aiin a tha zawk si a. duhthusam theih thil zawng zawng pawh a hen zo a awm lo. 8:12 Kei, finna chuan ka chennaa remhriatna ka siam a, finna leh ngaihruat thiamna ka hre chhuak thin. 8:13 LALPA tih chu sual huat hi a ni; chapona te, uanthuanna te, thil tha lo chinna te, tawng chaltlai te hi ka haw takzet a ni. 8:14 Remruat leh hriatna dik hi ka ta a ni a; hriatthiamna ka ni a, chak tak ka ni. 8:15 Kei mi hmnagin lalin ro a rel a, hotuten rorelna felin thu an titlu thin a. 8:16 Kei mi hmangin hotuten ro an rel a, mi lian te, leilunga roreltute zawng zawng pawhin. 8:17 Mi hmangaihtu chu ka hmangaih a, thahnemngai taka mi zawngtute chuan mi hmu ang. 8:18 Sum leh ropuinate ka hnenah a awm a, a ni, sum leh felna tlo tak mai chu. 8:19 Ka rah chhuah chu rangkachak aiin a tha zakw a, a ni, rangkachak tha mi ai pawhin; ka lak luh chu tangkaraw tha mi aiin. 8:20 Felna kawng ka zawh a, rorelna kawng takah; 8:21 Mi hmangaihtute chu sum ka rochuntir theihna'n leh an ro bawmte ka tihkhah theihna'n. 8:22 LALPA chuan a thil siam bul berah min din a, hmasanga a thil siam bul berah. 8:23 Chatuan ata, a tir tea din ka ni, leilung awm hma rengin. 8:24 Tuifinriat la awm hma daihin ka piang tawh a, tuikhur tui tam tak la awm hma daihin. 8:25 Tlang liante an din hma leh tlang tete awm hmain ka piang tawh a, 8:26 Leilung a la din hma leh ramte a din hma, khawvela vaivut pawh a la awm tan hma daihin. 8:27 Vante a tihngheh laiin ka awm tawh a, tuifinriat chunga kal hualna a siam laiin, 8:28 Chung lam van a tihngheh laiin, tuifinriat a lo nghe laiin; 8:29 Tuite chuan a thu pek an bawhchhiat lohna tura tuifinriat rite a siamsak a, leilung nghahchhan a ruat lai khan; 8:30 Chutih lai chuan mi themthiam angin ni tin a kiangah ka awm a, a lawmna ka ni a. A bulah ka hlim em em bawk thin. 8:31 Chen theihna a leilungah hlim taka awmin ka lawmna chu mihring fate chungah a ni. 8:32 Khai le, ka fapate u, ka thu ngaithla rawh u, ka kawng zawhtute chu mi nihlawh an si a. 8:33 Zirtirna chu ngaithla u la, fing u la, duh lo suh u. 8:34 Ka kawngka bulah nghak a, ka kawt hung kawngkaa nghak renga ka thu ngaithlatu chu a eng a thawl e. 8:35 Mi hmu apiang chuan nunna a hmu a ni si a, LALPA duhsakna a dawng ang a.Amaherawhchu, ka chunga sual apiang chuan ama nunna a tikhawlo a ni. 8:36 Amaherawhchu, ka chunga sual apiang chuan ama nunna a tikhawlo a ni.