Zechariah 2
2:1 Tin, ka mit ka han len cho a, ka'n en a, mi pakhat, a kuta tehna keng hi ka hmu a.
2:2 Tichuan, kei chuan, Khawiah nge i kal dawn? Ka ti a. Ani chuan ka hnenah, Jerusalem hi a veng eng tia nge anih a, a dung eng chen nge a nih hre tura teh turin, a ti a.
2:3 Tin, ngai teh, vantirhkoh mi betu kha a kal chhuak ta a; tin, vantirhkoh dang amah tawk turin a lo chhuak bawk a,
2:4 a hnenah, tlan la he tlangval hnenah hian, Jerusalem hi ami tam vang leh ran rual tam vangin Khaw hungna nei lo anga luahin a awm dawn a ni.
2:5 Kei hi a velah mei kulh ka ni ang a, A laia ropui chu ka ni dawn bawk si a, Tih hi LALPA thu chhuak a ni.
2:6 Hawh teh u, hawh teh u, hmar ram ata tlan chhuak rawh u, Tih hi LALPA thu chhuak a ni. Van thli pali ang maiin ka tidarh tawh si che u a, Tih hi LALPA thu chhuak a ni.
2:7 Hawh teh, Zion, Babulon fanu zinga la cheng, relh bo rawh.
2:8 Sipaihote LALPA chuan heti hian a ti si a; Ropuinna tur angzia zelin a tikhawlotu che u hnam hnenah chuan min tir a ni: Nangni khawihtu chuan a mit naute a khawih a ni mai.
2:9 Ngai rawh u, ka kut ka thin khum dawn si a, Anmahni rawngbawltute rallak an ni mai ang: Tichuan, Sipaihote LALPA chuan mi tir ani tih in la hre dawn a ni.
2:10 Zion fanu, hlimin zai rawh; ngai rawh, ka lo kal e, I hnenah ka cheng dawn si a, tih hi LALPA thu chuak a ni.
2:11 Chumi niah chuan hnam tam takin LALPA chu an rawn zawm ang a, a mite an ni ang: Tin, i hnenah chuan ka cheng ang a, Tichuan, Sipaihote LALPA chuan i hnenah mi tir a ni, tih i hre tawh ang.
2:12 Tin, LALPA chuan ram thianghlima a chanvo atan Juda chu a rochung ang a, Jerusalem chu a la thlang ang.Mi zawng zawngte u, LALPA hmaah chuan ngawi thiap rawh u: Ani chu a hmun thianghlim ata a lo tho tawh si a, Tiin va sawi rawh, a ti a.
2:13 Mi zawng zawngte u, LALPA hmaah chuan ngawi thiap rawh u: Ani chu a hmun thianghlim ata a lo tho tawh si a, Tiin va sawi rawh, a ti a.