Romans 10
10:1 Unaute u, ka thinlung duhzawng leh anni tana Pathian hnena ka tawngtaina chhan ber hi chhandama an lo awm theihna tur a ni.
10:2 Pathian lamah thahnem an ngai tih ka hriatpui a ni, hre famkim ang erawh chuan an ngai lo.
10:3 Pathian felna hre loin, anmahni felna tihngheh tumin, Pathian felnaah an intulut si lo.
10:4 Krista chu a ring apiangte tan felna an hmuh theihna turin Dan tibangtu a ni si a.
10:5 Mosia chuan, "Dana felna zawm chu, chu felna avang chuan a nung ang," tiin a ziak a.
10:6 Rinnaa felna erawh chuan heti hian a sawi: "In rilruin, 'Tunge vanah lawn ang?' emaw (chu chu chung lam ata Krista hruai chhuk tur tihna a ni);
10:7 'Tunge leilawtah chhuk ang?' emaw (chu chu mitthi zing ata Krista hruai chhoh leh tur tihna a ni) ti suh u," tiin.
10:8 A nih leh,eng nge a sawi? "Thu chuanin a hnaih a che,i ka leh i thinlungah pawh a awm," tiin a sawi a ni; chu chu rinna thu kan hrilh thin hi a ni;
10:9 "I kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang," tih hi.
10:10 Miten thinlungin an ring a, felna an hmu thin a; kain an tan a, chhandamna an hmu bawk thin a ni.
10:11 Pathian Lehkha Thuin,"Tupawh amah ring apiang an mualpho lo ang,"a ti a ni.
10:12 Juda leh Grik mite chu engah mah an danglam chuang si lo a, Lalpa pakhat an zaa chunga Lalpa a ni a, a lamtu apiangte chungah chuan thatna a ngah si thin a.
10:13 "Tupawh Lalpa hming lam apiangte chu chhandamin an awm ang," tih a ni a.
10:14 A nih leh, an rin loha chu engtin nge an lam ang? A thu an hriat loha chu engtin nge an rin ang? Thu hriltu awm loin engtin nge an hriat ang?
10:15 Tirh an nih loh chuan engtin nge thu an hril ang? "Thil tha chanchin lawmawm thlentute ke chu a va mawi em!" tih ziak ang khan.
10:16 Nimahsela Chanchin Tha chu an za chuan an awih vek lo. Isaian, "Lalpa, kan thusawi tuin nge ring?" a ti si a.
10:17 Chutichuan rinna chu hriatna avangin a lo awm thin a, tin, hriatna chu Krista thu avangin a lo awm.
10:18 A nih leh, an bengin an hre lo em ni? Hria e le, "An thawm chu ram tinah a thang a, an thu chu kawlkil thlengin a thang chhuak ta."
10:19 A nih leh, Israel miten an hre lo em ni? "Chia sawi tham lohte chu hmangin ka thiktir ang che u a; chi fing lote chu hmangin ka tithinur ang che u," tiin, Mosia'n a sawi hmasa ber.
10:20 Tin, Isaian huai takin, "Mi zawng lote hmuhin ka awm a, mi lam lote hnenah hriattirin ka awm," a ti a.Amaherawhchu, Israel mite thu-ah chuan, "Mi tihmawh leh hnialhratte tan nilengin ka bante ka phar thin kha," a ti a.
10:21 Amaherawhchu, Israel mite thu-ah chuan, "Mi tihmawh leh hnialhratte tan nilengin ka bante ka phar thin kha," a ti a.