Romans 11
11:1 A nih leh, Pathianin a mite chu a paih thla em ni? Hnai lo e. Kei pawh Israel mi, Abrahama thlah, Benjamina hnam ka ni si a.
11:2 Pathianin a mi hriat lawkte chu a paih thla lo e. Pathian Lehkha Thuin Elija thu a sawi hi in hre lo em ni? Ani chuan Israel mite chung thu Pathian hnenah a thlen a,
11:3 "Lalpa, i zawlneite an tihlum a; i maichamte an tichim a; keimah chauh ka la awm a, kei pawh mi tihhlum an tum a ni" a tih hi.
11:4 Nimahsela Pathianin engtin nge a chhan? "Baala hmaa thingthi ngai lo mi sangsarih keimah atan ka la zuah reng a ni," tiin a chhang a.
11:5 Chutiang bawkin tun lai pawh hian khawngaiha thlan ang zia ziain paih thlak bak chu an la awm.
11:6 Khawngaihna avang a nih chuan thiltih avang a ni tawh lo ang; chuti a nih loh chuan khawngaihna hi khawngaihna a ni tawh lo ang.
11:7 Engtin nge ni ta ang le?Israel mite chuan an zawn chu an hmu lo a, Thlante erawh chuan an hmu a, a dang zawng zawngte chu an chawlawl zo tawh a.
11:8 "Pathianin vawiin thlengin an hnenah mutthlukna thlarau a pe a, hmuh theih lohna mitte, hriat theih lohna bengte nen," tih ziak ang khan.
11:9 Tin, Davida chuan, "An dawhkan chu an tan thang leh fal leh,Tlukna leh thungrulhna lo ni rawh se;
11:10 An hmuh theih lohna'n an mitte lo thim rawh se, nangin an hnungzang kuntir fo ang che,"a ti a.
11:11 Anih leh, an petek chu an tluk hlenna tur em ni? Hnai lo e. An tluk avangin Jentailte hnenah chuan chhandamna a lo thleng ta zawk a ni, Israel mite thiktirna'n.
11:12 Tichuan an tlukna mah khawvel tihhausakna a nih a, an kiamna mah Jentailte hausakna a nih bawk chuan an famkimna chu an hausakna a va ni lehzual dawn em!
11:13 Chutichuan nangni Jentailte hnenah ka sawi a ni. Kei, Jentailte tirhkoh ka nih avangin ka chipuite ka thiktir theih hramna tur leh,
11:14 an zinga thenkhatte ka chhandam theihna turin ka rawngbawlna hi ka chawimawi a ni.
11:15 Anmahni paih thlakna mah khawvel thian lehna a nih chuan anmahni lawmlehna tur chu thihna ata nun lehna lo chu eng nge ni ang?
11:16 Tin, chhang hlawm sawh thlak hmasak chu a thianghlim chuan a hlawm pum chu chutiang bawk a ni; tin, a zung chu a thianghlim chuan a zarte chu chutiang bawk a ni.
11:17 Tin, a zar thenkhatte chu tihtliaha a awmin, nang, oliv suak ni a, anmahni zinga zawmin i awm a, oliv thinga thatna zung tawm ve tawh i nih chuan,
11:18 zar dangte lakah chuan inchhuang suh. Inchhuang mah la, nang a zung chawmtu i ni lo a, a zung chu a chawmtu che a ni zawk e.
11:19 Tin, nangin, "Zawma ka awm theihna'n zarte tihtliahin an awm tawh alawm," i ti ang le.
11:20 A ni, an rin lohna avangin tihtliahin an awm a, nang i rinna avangin i ding a ni. Chapo suh la, hlau zawk rawh;
11:21 Pathianin zar takte chu a zuah si loh chuan nang pawh a zuah bik lo ang che.
11:22 Chutichuan Pathian thatzia leh a tihbaizia chu ngaihtuah rawh; a tlute tan chuan a tihbai a ni; nang atan erawh chuan a tha a ni, a thatnaa i awm reng chuan; chutilochuan nang pawh sah thlakin i awm ve ang.
11:23 Tin, anni pawh chu ring loa an awm reng loh chuan zawmin an awm ang; Pathianin anmahni a zawm leh thei si a.
11:24 Nang oliv suak reng ata sah chum mah, piandan lo anga oliv thing thaah zawma i awm chuan chung a zar taktakte chu, anmahni oliv thing pangngaiah chuan zawm an va ni dawn nasa em!
11:25 Unaute u, he thuruk hi in hriat loh ka duh si lo, chutilochuan in intifing ang; Jentailte famkimna a lo thlen hma chuan Israel mi thenkhatte chungah chawlawlna a lo thleng rih a ni, tih hi;
11:26 chutichuan, Israel mi zawng zawng chhandamin an awm ang; "Zion atangin Chhandamtu chu a lo chhuak ang a, Jakoba hnen ata Pathian ngaihsak lohna a tibo ang,"
11:27 "Chu chu an hnena ka thuthlun tur chu a ni, an sualte ka lak bo hunah chuan," tih ziak ang khan.
11:28 Chanchin Tha lam ngaihtuah chuan nangmahni avangin hmelma an ni a; Thlan thu lam ngaihtuah erawh chuan thlahtute avang khan duh takte an ni.
11:29 Pathianin a thilthlawnpekah leh a kohnaah chuan a rilru a lamlet ngai si lo a.
11:30 Hmanah chuan Pathian thu in awih lo a, nimahsela tunah chuan an awih loh avangin khawngaihna in hmu si a,
11:31 chutiang bawkin, tunah chuan Pathianin a khawngaih che u avang hian, khawngaihna an hmuh ve theihna turin anni pawh chuan an awih ta lo a nih hi.
11:32 Pathianin a khawngaih vek theihna'n mi zawng zawng awih lohnaah a khung ta vek si a.
11:33 Pathian finna leh hriatna ngahzia chu a va thuk em! A rorelnate chu hriat theih rual leh, a kawngte chu chhui theih rual a va ni lo em!
11:34 Lalpa rilru chu tuin nge hria? Tunge a remruatsaktuah pawh tang tawh?
11:35 A rulh leh tur pawhin a hnenah tuin nge thil pe hmasa?Amah atang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se. Amen.
11:36 Amah atang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se. Amen.