Library · lus

Romans 12

12:1 Chutichuan unaute u, Pathian khawngaihna avang hian, inthawina nung leh thianghlim leh Pathian lawm tlak ni turin in taksa chu inhlanah ka ngen a che u; chu chu in rawngbawlna awm reng a ni. 12:2 He khawvel dan ang hian awm suh u la; Pathian duhzawng, a tha leh lawm tlak leh, that famkim chu in hriatfiah theihna'n, in rilru athara awmin lo danglam zawk tawh rawh u. 12:3 Pathianin mi pek khawngaihna avang hian in zingah tumah in inngaihhlut tawk aliama inngaihlu loin, Pathianin mi tin hnena rinna tawk a pek ang zelin fel taka ngaihtuah zawk turin ka ti theuh a che u. 12:4 Taksa pumkhatah peng tam tak kan nei a, peng zawng zawng thiltih erawh chu a inang lo a, 12:5 chutiang bawkin keini tam tak ni mah i la, Kristaah chuan taksa pumkhat kan ni a: a mal malin inpeng tawn theuh kan ni. 12:6 Khawngaihna min pek angzia zelin thilthlawnpek hrang hrang kan nei theuh a, thu hrilh tur a nih chuan kan rin tawk ang zelin I hril ang u; 12:7 rawng bawl tur a nih chuan rawng I bawl tlat ang u; zirtirtu pawhin zirtir tlat rawh se; 12:8 zilhtu pawhin zilh tlat rawh se; thil petu chuan ui loin pe rawh se; roreltuin taima takin rel rawh se; mi khawngaihtuin lawm takin khawngaih rawh se. 12:9 Hmangaihna chu vervekna tel loin ni rawh se. Sual lam chu hua u la, tha lam chu pawm tlat rawh u. 12:10 Unaute hmangaih kawngah chuan hmangaih takin inlainat tawn theuh rawh u; chawimawi kawngah chuan induhsak tawn theuh u la; 12:11 taihmak kawngah chuan thatchhe suh u la; thlarau kawngah chuan thahnemngai ula; Lalpa rawng bawl u la; 12:12 beiseina kawngah chuan lawm u la; hrehawm tuarna kawngah chuan chhel u la tawngtaina kawngah chuan tawngtai fan fan u la; 12:13 mi thianghlimte tlakchhamnaah chhawmdawl u la; mikhualte lawmin awm fo u la. 12:14 A tiduhdahtu che u chu malsawmsak u la; malsawm u la, anchhia chu lawh suh u. 12:15 Lawmte chu lawmpui u la, tapte chu tahpui rawh u. 12:16 Ngaihtuah hmunkhatin awm tawn theuh rawh u. Inngaihtuah sang lutuk suh u la, mi tete pawl zawk rawh u. Intifing suh u. 12:17 Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. 12:18 A theih phawt chuan nangmahni lam tal, mi zawng zawng nen inremin awm rawh u. 12:19 Duh takte u, in phuba la suh u la, Pathian thinurna kian zawk rawh u, "Phuba reng reng keima lak tur a ni, keima'n ka thungrul ang,' Lalpain a ti," tih ziak a ni si. 12:20 Chuvangin i hmelma a riltam chuan ei tur pe rawh, a tuihal chuan in tur pe rawh: chutiang i tih chuan a lu chungah meiling i chhek khawm a ni ang.Sual ngam chein awm suh la, thatnain sual chu ngam zawk rawh. 12:21 Sual ngam chein awm suh la, thatnain sual chu ngam zawk rawh.