Library · my

Psalms 92

92:1 အို အမြင့်ဆုံး​သော​အရှင်​၊ ထာဝရဘုရား​၏​ကျေးဇူးတော်​ကို ချီးမွမ်း​ခြင်း​သည်​လည်းကောင်း​၊ ကိုယ်တော်​၏​နာမ​တော်​ကို သီဆိုချီးမွမ်း​ခြင်း​သည်​လည်းကောင်း​၊ 92:2 နံနက်အချိန်​၌ ကိုယ်တော်​၏​မေတ္တာကရုဏာ​တော်​၊ ညအချိန်​၌ ကိုယ်တော်​၏​သစ္စာ​တော်​ကို 92:3 စောင်းကောက်​သံစဉ်​နှင့်အတူ စောင်းပြား​နှင့် ကြိုး​ဆယ်​ချောင်း​တပ်​တူရိယာ​ဖြင့် ထုတ်ဖော်​ပြောဆို​ခြင်း​သည်​လည်းကောင်း ကောင်းမြတ်​ပေ​၏​။ 92:4 အကြောင်းမူကား အို ထာဝရဘုရား​၊ ကိုယ်တော်​သည် ကိုယ်တော်​၏​လုပ်ဆောင်​တော်မူ​ချက်​အားဖြင့် အကျွန်ုပ်​ကို ဝမ်းမြောက်​စေ​ပါ​၏​။ ကိုယ်တော်​၏​လက်​တော်​ဖြင့်​ပြုလုပ်​သော အရာ​များ​အတွက် အကျွန်ုပ်​သည် ရွှင်လန်း​စွာ​သီချင်းဆို​ပါ​မည်​။ 92:5 အို ထာဝရဘုရား​၊ ကိုယ်တော်​ပြု​တော်မူ​သော အမှု​တို့​သည် ကြီးမြတ်​လှ​ပါ​၏​။ ကိုယ်တော်​၏​အကြံအစည်​တို့​သည် အလွန်​နက်နဲ​ပါ​၏​။ 92:6 ဤ​အရာ​သည် အသိတရားမဲ့​သော​သူ​မ​သိ​နိုင်​သကဲ့သို့ မိုက်မဲ​သော​သူ​နား​မ​လည်​နိုင်​သည့်​အရာ​ဖြစ်​၏​။ 92:7 ဆိုးယုတ်​သော​သူ​တို့​သည် မြက်ပင်​ကဲ့သို့ ပွင့်လန်းဝေဆာ​၍ အပြစ်ဒုစရိုက်​ပြု​သော​သူ အပေါင်း​တို့​သည် ရှင်သန်​ကြ​ခြင်း​မှာ ထာဝရ​ဖျက်ဆီး​ခြင်း​ခံရ​ရန်​အတွက်​ဖြစ်​၏​။ 92:8 အို ထာဝရဘုရား​၊ ကိုယ်တော်​မူကား မြင့်သောအရပ်​၌ အစဉ်အမြဲ​ရှိ​တော်မူ​၏​။ 92:9 အို ထာဝရဘုရား​၊ အကယ်စင်စစ် ကိုယ်တော်​၏​ရန်သူ​တို့​သည်​၊ အကယ်စင်စစ် ကိုယ်တော်​၏​ရန်သူ​တို့​သည် ပျက်စီး​ကြ​ရ​လိမ့်မည်​။ အပြစ်ဒုစရိုက်​ပြု​သော​သူ​အပေါင်း​တို့​သည်​လည်း ကွဲလွင့်​ကြ​ရ​လိမ့်မည်​။ 92:10 ကိုယ်တော်​သည် အကျွန်ုပ်​၏​ဦးချို​ကို နွားရိုင်း​ဦးချို​ကဲ့သို့​ချီးမြှောက်​၍ သန့်စင်​ကောင်းမွန်​သော​ဆီ​ဖြင့် အကျွန်ုပ်​ကို ဘိသိက်ပေး​တော်မူ​၏​။ 92:11 အကျွန်ုပ်​၏​မျက်စိ​သည် အကျွန်ုပ်​ရန်သူ​တို့​၏​အဖြစ်​ကို​မြင်​ရ​ပါ​၏​။ အကျွန်ုပ်​၏​နား​သည်​လည်း အကျွန်ုပ်​ကို​ဆန့်ကျင်​လျက်​ထကြွ​သည့် ဆိုးညစ်​သော​အမှု​ကို​ပြု​သော​သူ​တို့​၏​အဖြစ်​ကို ကြား​ရ​ပါ​၏​။ 92:12 ဖြောင့်မတ်​သော​သူ​သည် စွန်ပလွံပင်​ကဲ့သို့ ပွင့်လန်းဝေဆာ​၍ လက်ဘနွန်​တောင်​မှ သစ်ကတိုးပင်​ကဲ့သို့​ကြီးထွား​လိမ့်မည်​။ 92:13 ထာဝရဘုရား​၏​အိမ်​တော်​၌ စိုက်ပျိုး​ခြင်း​ခံရ​သော​သူ​တို့​သည် ငါ​တို့​ဘုရားသခင်​၏​တံတိုင်း​တော်​များ​အတွင်း​၌ ကြီးပွား​ကြ​လိမ့်မည်​။ 92:14 အိုမင်း​သော​အရွယ်​၌​ပင် ဆက်၍​အသီးသီး​လျက်​၊ စိမ်းလန်း​စိုပြည်​လျက်​ရှိ​ခြင်း​အားဖြင့် 92:15 ထာဝရဘုရား ဖြောင့်မှန်​တော်မူ​ကြောင်း ပြောကြား​ကြ​လိမ့်မည်​။ ကိုယ်တော်​သည် ငါ​၏​ကျောက်ဆောင်​ဖြစ်​တော်မူ​၏​။ ကိုယ်တော်​၌​မတရားမှု​မ​ရှိ​။