Library · my

Proverbs 4

4:1 သားသမီး​တို့​၊ ဖခင်​၏​ဆုံးမပဲ့ပြင်​ခြင်း​ကို​နားထောင်​ကြ​လော့​။ အသိဉာဏ်​ကို​ရရှိ​ရန် အာရုံစိုက်​ကြ​လော့​။ 4:2 အကြောင်းမူကား ငါ​သည် သင်​တို့​အား ကောင်းမြတ်​သော​ပညာ​ကို ပေး​၏​။ ငါ​၏​သွန်သင်ချက်​ကို မ​စွန့်ပယ်​ကြ​နှင့်​။ 4:3 ငါ​သည် ငါ့​ဖခင်​အတွက် သား​တစ်​ဦး​ဖြစ်​ပြီး ငါ့​မိခင်​ရှေ့​၌ နုနယ်​သည့်​တစ်ဦးတည်း​သော​သား​ဖြစ်​စဉ်က 4:4 ငါ​၏​ဖခင်​သည် ငါ့​ကို​သွန်သင်​လျက် မြွက်ဆို​သည်​မှာ “​ငါ့​စကား​တို့​ကို သင်​၏​စိတ်နှလုံး​ထဲ၌ စွဲမှတ်​ထား​လော့​။ ငါ​၏​ပညတ်ချက်​တို့​ကို​စောင့်ထိန်း​၍ အသက်ရှင်​လော့​။ 4:5 ဉာဏ်ပညာ​ကို​ဆည်းပူး​လော့​။ အသိဉာဏ်​ကို​ဆည်းပူး​လော့​။ ငါ​၏​နှုတ်ထွက်​စကား​တို့​ကို မ​မေ့လျော့​နှင့်​။ ၎င်း​တို့​မှ​သွေဖည်​မ​သွား​နှင့်​။ 4:6 ဉာဏ်ပညာ​ကို မ​စွန့်ပယ်​နှင့်​။ ၎င်း​သည် သင့်​ကို​စောင့်ထိန်း​လိမ့်မည်​။ ဉာဏ်ပညာ​ကို​ချစ်​လော့​။ ၎င်း​သည် သင့်​ကို ကာကွယ်​စောင့်ရှောက်​လိမ့်မည်​။ 4:7 ဉာဏ်ပညာ​သည် အထွတ်အမြတ်​ဖြစ်​၏ ​။ ဉာဏ်ပညာ​ကို​ဆည်းပူး​လော့​။ သင်​ပိုင်ဆိုင်​သော​အရာ​ရှိသမျှ​ဖြင့် အသိဉာဏ်​ကို​ဆည်းပူး​လော့​။ 4:8 ဉာဏ်ပညာ​ကို​မြတ်နိုး​လော့​။ ၎င်း​သည် သင့်​ကို ချီးမြှောက်​လိမ့်မည်​။ ဉာဏ်ပညာ​ကို​ပွေ့ဖက်​လျှင် ၎င်း​သည် သင့်​ကို​ဂုဏ်ပြုချီးမွမ်း​လိမ့်မည်​။ 4:9 ၎င်း​သည် တင့်တယ်​သော​ပန်းဦးရစ်​ကို သင်​၏​ခေါင်း​ပေါ်၌​တင်ပေး​၍ ဂုဏ်ကျက်သရေ​ရှိ​သော​သရဖူ​ကို သင့်​အား အပ်နှင်း​လိမ့်မည်​။​” 4:10 ငါ့​သား​၊ နားထောင်​လော့​။ ငါ့​စကား​ကို​ခံယူ​လော့​။ သို့ပြုလျှင် သင့်​အသက်တာ​၏​နှစ်ကာလ​တို့​သည် များပြား​လိမ့်မည်​။ 4:11 ငါ​သည် သင့်​အား ဉာဏ်ပညာ​လမ်း​ကို သွန်သင်ပြသ​၍ ဖြောင့်မှန်​သော​လမ်း​များ​ထဲ၌ သင့်​ကို​ဦးဆောင်​လမ်းပြ​ခဲ့​ပြီ​။ 4:12 သင်​လမ်းလျှောက်​သောအခါ သင်​၏​ခြေလှမ်း​သည် တားဆီးနှောင့်ယှက်​ခြင်း​ခံရ​လိမ့်မည်​မ​ဟုတ်​။ သင်​ပြေး​သောအခါ​လည်း ခလုတ်တိုက်​လိမ့်မည်​မ​ဟုတ်​။ 4:13 ဆုံးမပဲ့ပြင်​ခြင်း​ကို​ဆုပ်ကိုင်​ထား​လော့​။ လွတ်​မ​သွား​စေ​နှင့်​။ ၎င်း​ကို​ထိန်းသိမ်းစောင့်ရှောက်​လော့​။ အကြောင်းမူကား ၎င်း​သည် သင်​၏​အသက်​ဖြစ်​၏​။ 4:14 ဆိုးယုတ်​သော​သူ​တို့​၏​လမ်း​ထဲသို့ မ​ဝင်​နှင့်​။ မကောင်းမှု​ပြု​သော​သူ​တို့​သွား​ရာ​လမ်း​ကို​လည်း မ​လိုက်​နှင့်​။ 4:15 ထို​လမ်း​ကို​ရှောင်​လော့​။ ဖြတ်​မ​သွား​နှင့်​။ ထို​လမ်း​မှ​ဖယ်ခွာ​၍​ဆက်သွား​လော့​။ 4:16 အကြောင်းမူကား သူ​တို့​သည် ဆိုးညစ်​သော​အမှု​ကို​မ​ပြု​ရ​လျှင် အိပ်​မ​ပျော်​နိုင်​ကြ​။ တစ်စုံတစ်ဦး​ကို​ခလုတ်တိုက်​အောင်​မ​ပြု​ရ​လျှင် မအိပ်စက်​နိုင်​ကြ​။ 4:17 အကယ်စင်စစ် သူ​တို့​သည် ဆိုးယုတ်ခြင်း​မုန့်​ကို​စား​၍ ရက်စက်ကြမ်းကြုတ်​ခြင်း​စပျစ်ဝိုင်​ကို သောက်​ကြ​၏​။ 4:18 သို့သော် ဖြောင့်မတ်​သော​သူ​တို့​၏​လမ်း​သည် မိုး​စင်စင်လင်း​သည့်​တိုင်အောင် ပို၍ပို၍​ထွန်းလင်း​လာ​သည့် အရုဏ်ဦး​၏​အလင်းရောင်​ကဲ့သို့​ဖြစ်​၏​။ 4:19 ဆိုးယုတ်​သော​သူ​တို့​၏​လမ်း​သည် မှောင်မိုက်​ကဲ့သို့​ဖြစ်၍ သူ​တို့​သည် မည်သည့်​အရာ​နှင့်​ခလုတ်တိုက်​မိ​သည်​ကို မ​သိ​ကြ​။ 4:20 ငါ့​သား​၊ ငါ​ပြောဆို​သော​အရာ​တို့​ကို အာရုံစိုက်​နားထောင်​လော့​။ ငါ့​စကား​တို့​ကို နားစွင့်​လော့​။ 4:21 ထို​စကား​တို့​ကို သင်​၏​မျက်မှောက်​မှ မ​ကွာ​စေ​နှင့်​။ သင်​၏​စိတ်နှလုံး​အတွင်း​၌ ထိန်းသိမ်း​ထား​လော့​။ 4:22 အကြောင်းမူကား ထို​စကား​တို့​သည် ၎င်း​တို့​ကို​တွေ့ရှိ​သော​သူ​တို့​အတွက် အသက်​ဖြစ်​ပြီး သူ​တို့​၏​ကိုယ်ခန္ဓာ​တစ်ခုလုံး​ကို ကျန်းမာ​စေ​တတ်​၏​။ 4:23 သင်​၏​စိတ်နှလုံး​ကို သတိဝီရိယ​ရှိသမျှ​နှင့် ထိန်းသိမ်းစောင့်ရှောက်​လော့​။ အကြောင်းမူကား ၎င်း​သည် အသက်​၏​အရင်းအမြစ်​ဖြစ်​၏​။ 4:24 ကောက်ကျစ်​သော​နှုတ်​ကို သင့်​ထံမှ​ဖယ်ရှား​လော့​။ စဉ်းလဲ​သော​နှုတ်ခမ်း​ကို​လည်း သင်​နှင့်​ဝေးကွာ​စေ​လော့​။ 4:25 သင်​၏​မျက်စိ​သည် ရှေ့​သို့​စေ့စေ့ကြည့်​ပါစေ​။ သင်​၏​မျက်လွှာ​သည်​လည်း သင့်​ရှေ့​တည့်တည့်​အာရုံ​ပြု​ပါစေ​။ 4:26 သင်​လျှောက်​ရာ​လမ်း ​ကို​ချင့်ချိန်သုံးသပ်​လော့​။ သို့ပြုလျှင် သင်​၏​လမ်းခရီး​ရှိသမျှ​တို့​သည် တည်မြဲ​လိမ့်မည်​။ 4:27 လက်ယာ​ဘက်​၊ လက်ဝဲ​ဘက်​သို့ မ​လှည့်​နှင့်​။ သင်​၏​ခြေ​ကို မကောင်းမှု​မှ ဖယ်ခွာ​စေ​လော့​။