Numbers 33
33:1 မောရှေနှင့်အာရုန်တို့၏ဦးဆောင်မှုဖြင့် အီဂျစ်ပြည်မှတပ်ဖွဲ့အလိုက်ထွက်လာသော အစ္စရေးအမျိုးသားတို့၏ခရီးစဉ်ကား ဤသို့ဖြစ်၏။
33:2 မောရှေသည် ထာဝရဘုရား၏အမိန့်တော်အတိုင်း သူတို့၏ခရီးစဉ်အဆင့်ဆင့်ကို ရေးမှတ်ထား၏။ သူတို့၏ခရီးစဉ်အဆင့်ဆင့်ကား ဤသို့ဖြစ်၏။
33:3 အစ္စရေးအမျိုးသားတို့သည် ပထမလ၊ တစ်ဆယ့်ငါးရက်နေ့တွင် ရာမသက်အရပ်မှ ခရီးပြုကြ၏။ သူတို့သည် ပသခါပွဲလွန်ပြီးနောက်တစ်နေ့တွင် အီဂျစ်လူမျိုးအပေါင်းတို့၏ရှေ့မှ ဝင့်ကြွားစွာထွက်လာကြ၏။
33:4 ထိုအချိန်၌ အီဂျစ်လူမျိုးတို့သည် ထာဝရဘုရားဒဏ်ခတ်တော်မူသော သူတို့၏သားဦးအပေါင်းတို့ကို သင်္ဂြိုဟ်နေကြ၏။ ထာဝရဘုရားသည် သူတို့၏ဘုရားများကို အပြစ်ဒဏ်ပေးတော်မူ၏။
33:5 အစ္စရေးအမျိုးသားတို့သည် ရာမသက်အရပ်မှခရီးပြု၍ သုကုတ်အရပ်၌ စခန်းချကြ၏။
33:6 သုကုတ်အရပ်မှ ခရီးပြု၍ တောကန္တာရအစွန်အဖျားရှိ ဧသံအရပ်၌ စခန်းချကြ၏။
33:7 ဧသံအရပ်မှ ခရီးပြု၍ ဗာလဇေဖုန်အရပ်အရှေ့ဘက်ရှိ ပိဟဟိရုတ်အရပ်သို့ပြန်လှည့်ကာ မိဂဒေါလအရပ်အရှေ့ဘက်၌ စခန်းချကြ၏။
33:8 ထိုပိဟဟိရုတ်အရပ်မှ ခရီးပြု၍ ပင်လယ်ကိုဖြတ်ပြီး တောကန္တာရသို့ ရောက်ကြ၏။ ဧသံတောကန္တာရထဲ၌ သုံးရက်ခရီးသွား၍ မာရအရပ်၌ စခန်းချကြ၏။
33:9 မာရအရပ်မှ ခရီးပြု၍ ဧလိမ်အရပ်သို့ ရောက်ကြ၏။ ဧလိမ်အရပ်တွင် စမ်းရေတွင်း တစ်ဆယ့်နှစ်တွင်းနှင့် စွန်ပလွံပင် ခုနစ်ဆယ် ရှိ၏။ ထိုအရပ်၌ သူတို့စခန်းချကြ၏။
33:10 ဧလိမ်အရပ်မှ ခရီးပြု၍ ပင်လယ်နီအနား၌ စခန်းချကြ၏။
33:11 ပင်လယ်နီမှ ခရီးပြု၍ သိန်တောကန္တာရ၌ စခန်းချကြ၏။
33:12 သိန်တောကန္တာရမှ ခရီးပြု၍ ဒေါဖကာအရပ်၌ စခန်းချကြ၏။
33:13 ဒေါဖကာအရပ်မှ ခရီးပြု၍ အာလုရှအရပ်၌ စခန်းချကြ၏။
33:14 အာလုရှအရပ်မှ ခရီးပြု၍ ရေဖိဒိမ်အရပ်၌ စခန်းချကြ၏။ ထိုအရပ်၌ လူတို့သောက်ဖို့ ရေမရှိ။
33:15 ရေဖိဒိမ်အရပ်မှ ခရီးပြု၍ သိနာတောကန္တာရ၌ စခန်းချကြ၏။
33:16 သိနာတောကန္တာရမှ ခရီးပြု၍ ကိဗြုတ်ဟတ္တဝါအရပ်၌ စခန်းချကြ၏။
33:17 ကိဗြုတ်ဟတ္တဝါအရပ်မှ ခရီးပြု၍ ဟာဇရုတ်အရပ်၌ စခန်းချကြ၏။
33:18 ဟာဇရုတ်အရပ်မှ ခရီးပြု၍ ရိသမအရပ်၌ စခန်းချကြ၏။
33:19 ရိသမအရပ်မှ ခရီးပြု၍ ရိမ္မုန်ဖာရက်အရပ်၌ စခန်းချကြ၏။
33:20 ရိမ္မုန်ဖာရက်အရပ်မှ ခရီးပြု၍ လိဗနအရပ်၌ စခန်းချကြ၏။
33:21 လိဗနအရပ်မှ ခရီးပြု၍ ရိဿအရပ်၌ စခန်းချကြ၏။
33:22 ရိဿအရပ်မှ ခရီးပြု၍ ကေဟလာသအရပ်၌ စခန်းချကြ၏။
33:23 ကေဟလာသအရပ်မှ ခရီးပြု၍ ရှာဖာတောင်၌ စခန်းချကြ၏။
33:24 ရှာဖာတောင်မှ ခရီးပြု၍ ဟာရဒအရပ်၌ စခန်းချကြ၏။
33:25 ဟာရဒအရပ်မှ ခရီးပြု၍ မက္ကလုတ်အရပ်၌ စခန်းချကြ၏။
33:26 မက္ကလုတ်အရပ်မှ ခရီးပြု၍ တာဟတ်အရပ်၌ စခန်းချကြ၏။
33:27 တာဟတ်အရပ်မှ ခရီးပြု၍ တေရအရပ်၌ စခန်းချကြ၏။
33:28 တေရအရပ်မှ ခရီးပြု၍ မိသကာအရပ်၌ စခန်းချကြ၏။
33:29 မိသကာအရပ်မှ ခရီးပြု၍ ဟာရှမောနအရပ်၌ စခန်းချကြ၏။
33:30 ဟာရှမောနအရပ်မှ ခရီးပြု၍ မောသရုတ်အရပ်၌ စခန်းချကြ၏။
33:31 မောသရုတ်အရပ်မှ ခရီးပြု၍ ဗင်္ယာကန်အရပ်၌ စခန်းချကြ၏။
33:32 ဗင်္ယာကန်အရပ်မှ ခရီးပြု၍ ဟောရဂိဒ်ဂဒ်အရပ်၌ စခန်းချကြ၏။
33:33 ဟောရဂိဒ်ဂဒ်အရပ်မှ ခရီးပြု၍ ယုပ္ဘာသအရပ်၌ စခန်းချကြ၏။
33:34 ယုပ္ဘာသအရပ်မှ ခရီးပြု၍ ဧဗြောနအရပ်၌ စခန်းချကြ၏။
33:35 ဧဗြောနအရပ်မှ ခရီးပြု၍ ဧဇယုန်ဂါဗာအရပ်၌ စခန်းချကြ၏။
33:36 ဧဇယုန်ဂါဗာအရပ်မှ ခရီးပြု၍ ကာဒေရှအရပ်ရှိ ဇိနတောကန္တာရ၌ စခန်းချကြ၏။
33:37 ကာဒေရှအရပ်မှ ခရီးပြု၍ ဧဒုံပြည်နယ်နိမိတ်ရှိ ဟောရတောင်၌ စခန်းချကြ၏။
33:38 အစ္စရေးအမျိုးသားတို့အီဂျစ်ပြည်မှထွက်လာပြီး အနှစ်လေးဆယ်မြောက်သောနှစ်၊ ပဉ္စမလ၊ ပထမနေ့၌ ယဇ်ပုရောဟိတ်အာရုန်သည် ထာဝရဘုရား၏အမိန့်တော်အတိုင်း ဟောရတောင်ပေါ်သို့တက်သွား၍ ထိုနေရာ၌ သေလေ၏။
33:39 အာရုန်သည် ဟောရတောင်ပေါ်၌ သေသောအခါ အသက်တစ်ရာနှစ်ဆယ့်သုံးနှစ်ရှိ၏။
33:40 ခါနာန်ပြည်၊ နေဂေ့အရပ်၌ စံမြန်းသော ခါနာန်လူမျိုး အာရဒ်ဘုရင်သည် အစ္စရေးအမျိုးသားတို့ရောက်လာကြောင်းကို ကြားသိ၏။
33:41 အစ္စရေးအမျိုးသားတို့သည် ဟောရတောင်မှ ခရီးပြု၍ ဇာလမောနအရပ်၌ စခန်းချကြ၏။
33:42 ဇာလမောနအရပ်မှ ခရီးပြု၍ ပုနုန်အရပ်၌ စခန်းချကြ၏။
33:43 ပုနုန်အရပ်မှ ခရီးပြု၍ ဩဗုတ်အရပ်၌ စခန်းချကြ၏။
33:44 ဩဗုတ်အရပ်မှ ခရီးပြု၍ မောဘနယ်စပ်ရှိ ဣဇာဗာရိမ်အရပ်၌ စခန်းချကြ၏။
33:45 ဣရိမ်အရပ်မှ ခရီးပြု၍ ဒိဘုန်ဂဒ်အရပ်၌ စခန်းချကြ၏။
33:46 ဒိဘုန်ဂဒ်အရပ်မှ ခရီးပြု၍ အာလမုန်ဒိဗလသိမ်အရပ်၌ စခန်းချကြ၏။
33:47 အာလမုန်ဒိဗလသိမ်အရပ်မှ ခရီးပြု၍ နေဗောတောင်ရှေ့ အာဗရိမ်တောင်၌ စခန်းချကြ၏။
33:48 အာဗရိမ်တောင်မှ ခရီးပြု၍ ဂျေရိခေါမြို့တစ်ဖက်၊ ဂျော်ဒန်မြစ်အနီး၊ မောဘလွင်ပြင်၌ စခန်းချကြ၏။
33:49 ဂျော်ဒန်မြစ်အနီး၊ မောဘလွင်ပြင်တစ်လျှောက် ဗက်ယေရှိမုတ်မြို့မှ အာဗေလရှိတ္တိမ်အရပ်တိုင်အောင် စခန်းချကြ၏။
33:50 ထိုအခါ ဂျေရိခေါမြို့တစ်ဖက်၊ ဂျော်ဒန်မြစ်အနီး၊ မောဘလွင်ပြင်၌ ထာဝရဘုရားက မောရှေအား
33:51 “အစ္စရေးအမျိုးသားတို့အား ဆင့်ဆိုလော့။ သင်တို့သည် ဂျော်ဒန်မြစ်ကိုကူး၍ ခါနာန်ပြည်ထဲသို့ဝင်သောအခါ
33:52 ထိုပြည်၌နေထိုင်သောသူရှိသမျှတို့ကို သင်တို့ရှေ့မှ နှင်ထုတ်၍ သူတို့၏ကျောက်ဆစ်ရုပ်တုရှိသမျှတို့ကို ဖျက်ဆီးရမည်။ သူတို့သွန်းလုပ်သောရုပ်တုရှိသမျှတို့ကိုလည်း ဖျက်ဆီး၍ သူတို့အထွတ်အမြတ်ထားရာနေရာရှိသမျှတို့ကို ဖြိုဖျက်ရမည်။
33:53 ထိုပြည်ကို သင်တို့အား ငါအပိုင်ပေးသောကြောင့် သိမ်းပိုက်၍ ထိုပြည်၌ နေထိုင်ကြလော့။
33:54 သင်တို့၏မျိုးနွယ်စုအလိုက် ထိုပြည်ကို မဲချ၍ အမွေခွဲဝေပေးရမည်။ မျိုးနွယ်စုလူဦးရေ များလျှင်များသည့်အလျောက်၊ နည်းလျှင်နည်းသည့်အလျောက် အမွေမြေပေးရမည်။ မိမိအတွက် မဲကျသောနေရာသည် မိမိ၏အမွေဖြစ်ရမည်။ သင်တို့ဘိုးဘေးတို့၏အမျိုးအနွယ်အလိုက် အမွေဆက်ခံကြရမည်။
33:55 ထိုပြည်၌နေထိုင်သောသူတို့ကို သင်တို့ထံမှ အကုန်အစင်မနှင်ထုတ်လျှင် သင်တို့ချန်ထားခဲ့သောသူတို့သည် သင်တို့၏မျက်စိ၌ ငြောင့်ကဲ့သို့လည်းကောင်း၊ သင်တို့နံဘေး၌ ဆူးကဲ့သို့လည်းကောင်း ဖြစ်လိမ့်မည်။ သင်တို့နေထိုင်သောပြည်၌ သင်တို့ကို ရန်ပြုကြလိမ့်မည်။
33:56 ငါသည်လည်း ထိုသူတို့ကိုစီရင်မည်ဟု ကြံရွယ်ထားသည့်အတိုင်း သင်တို့ကို ငါစီရင်မည်”ဟု မိန့်တော်မူ၏။