Library · pcm

Psalms 105

105:1 Make wi tank Oga God! Make wi koll en name kon tell di whole world about di tins wey E don do. 105:2 Make wi sing to am. Yes! Make wi sing to am. Make wi tink about all di wonderful tins wey E do! 105:3 Make wi praiz en holy name and wi wey dey woship God, make wi happy. 105:4 Make wi look for God and en pawa wey E dey give! Make wi always dey look for am! 105:5 Make wi remember all di wonderful tins wey E do; en mirakles and laws wey E give 105:6 us wey bi en savants, Abraham shidren and wi wey bi Jakob wey E choose, shidren-shidren. 105:7 Na-im bi di Oga awa God. Pipol dey si di way E dey judge for di whole land. 105:8 E always dey keep en kovenant; di promise wey E make give 1,000 generashon. 105:9 Dis na di kovenant wey E make with Abraham and E swear about am give Isaak. 105:10 E give di promise to Jakob, just as E kommand and for Israel pipol, na kovenant wey nor dey end, bikos E sey: 105:11 “I go give una Kanaan land and e go bi una special propaty.” 105:12 E tok dis tin wen dem neva plenty and dat time, dem just bi strenjas for Kanaan land. 105:13 Dem waka from kountry to kountry, from one kingdom to anoda. 105:14 Yet, E nor let anybody opress dem. E warn kings bikos of dem sey: 105:15 “Make una nor tosh dis pipol wey I choose and make una nor plan to do bad tins against my profets.” 105:16 E kause honga for Kanaan land wen E nor make di groun bear betta food for dem. 105:17 Den E send Josef go Egypt for en pipol front wen en brodas sell am as slave. 105:18 Di shain for Josef leg kon dey pain am and dem put iron for en neck. 105:19 Until di time rish for Josef to do wetin e dream and tok about, God still dey test en karata. 105:20 Den Fero send for am kon free am. Na di rulers for di nashon open di prison door 105:21 and Fero make Josef oga for evritin wey dey en house; so Josef kon bi oga for evritin wey di king get. 105:22 E fit send doz wey dey serve di king as e wont kon tish doz wey dey advise di king. 105:23 Den Israel kon go Egypt and Jakob stay as strenja for Ham land. 105:24 So God kon make Israel pipol plenty and dem kon too many for dia enemies to handle. 105:25 Den God turn Egypt pipol against Israel pipol and dem kon plan against God pipol. 105:26 But God send en savant Moses with Aaron wey E choose, go free en pipol. 105:27 Dem do wonderful tins for Egypt pipol front and for Ham land. 105:28 God kover Egypt with darkness, bikos dem nor gri allow en pipol go. 105:29 E turn dia wota to blood kon poizin all dia fish. 105:30 Den frog kon full di town and dem even enter di king bedroom. 105:31 Wen God tok, fly kon enter Egypt and worm kon full evriwhere. 105:32 God allow strong block fall for Egypt instead of ordinary rain and tonda dey make nois for di whole land. 105:33 E distroy dia grape vine and fig tree kon skata all dia trees. 105:34 God tok and many-many lokust kon kom; small-small lokust wey dem nor fit kount. 105:35 Dem chop evry green leaf for di land kon kill all di plants for Egypt. 105:36 Den God kill both di pipol and dia animals first-born for Egypt and na dem bi di pride and joy of dia family. 105:37 God take en pipol komot from Egypt with many silva and gold and e nor get any tribe for Israel wey faint for road. 105:38 Egypt pipol happy wen Israel pipol dey komot from dia land, bikos dem dey fear Israel pipol well-well. 105:39 God kover Israel pipol with kloud kon give dem big fire as lite for nite. 105:40 Dem ask for meat and God give dem kwail bird; E give dem manna wey bi bread from heaven, so dat dem go chop beleful. 105:41 E divide di rock and wota kom out kon form river for di dry land, 105:42 bikos E remember en promise wey E make with en savant, Abraham. 105:43 So E take en pipol komot Egypt with joy; di pipol wey E choose with happiness. 105:44 Doz wey nor know am, E give dia land to Israel en pipol and dem plok fruit wey odas plant. 105:45 All dis tins happen make dem for dey follow God laws kon obey en kommand. So make wi praiz di Oga wey bi awa God!