Psalms 48
48:1 Si as awa God great rish! Wi go praiz am for en own town wey dey on-top en holy mountin!
48:2 Di mountin dey high and fine well-well; di whole eart dey happy to si am! Mount Zion wey bi di holy mountin, na-im bi di town where di great King dey stay!
48:3 God ensef dey for Jerusalem towa and na-im dey defend us.
48:4 Di kings for di eart join togeda kon fight di town.
48:5 But wen dem si am, dia heart kut and fear katch dem, so dem kon run go back.
48:6 Fear katch dem well-well and dem kon dey kry with pain like woman wey won born.
48:7 Yu skata dem like di big sheep for Tarshish wey Yu distroy with di wind from east.
48:8 Wi don hear about di town glory, but naw, wi don si am by awasef; di town wey God wey dey lead heaven sojas, dey and bikos na awa God town, E go protet am forever.
48:9 My God, as wi dey woship for yor temple, wi go always dey tok about yor love wey nor dey fail.
48:10 My God, as yor name bi, na so dem go praiz Yu for evriwhere for di eart. Na viktory full yor strong rite hand.
48:11 Make Zion pipol rijoice. Make all di towns for Judah happy, bikos of di way God dey judge.
48:12 Make una go look Jerusalem; waka round and kount all di towas.
48:13 Make una si as di town walls strong rish and as e dey save, den una go fit tell una shidren-shidren about am.
48:14 Bikos na so God bi! Na-im bi awa God and E go guide us forever and ever.