Psalms 74
74:1 My God, wetin make Yu rijet us forever? Wetin make Yu dey vex for yor own sheep wey dey yor field?
74:2 Make Yu remember sey na wi bi di pipol wey Yu choose since Yu kreate di world; di tribe wey Yu take as yor own! Make Yu still remember Jerusalem where Yu dey stay.
74:3 Make Yu waka round di town wey dem skata; den Yu go si as di enemies distroy yor temple.
74:4 Na for der yor enemies dey shaut and sing sey, “Dem don win.” Na der dem for stand dia war flag.
74:5 Dem dey use dia axe like doz wey dey kut wood for bush.
74:6 Dem use axe and knife take skata evritin wey dem karve
74:7 kon burn yor temple rish groun. Yes, dem distroy di place wey dey ansa yor name.
74:8 Den dem kon dey boast dey sey, “Make wi distroy evritin!” So dem burn evriwhere wey wi for dey woship God.
74:9 Naw, wi nor dey si yor mirakles again. All di profets don die and nobody fit tell us wen dis wahala go end.
74:10 So God, na how long e go take before Yu go stop awa enemies wey dey curse us? Yu go let dem take yor name make yeye forever?
74:11 Wetin make Yu nor won use yor strong rite hand against dem? Make Yu kom distroy dem finish.
74:12 But Yu God don bi my King since my grand-grand papa dem time and Yu dey save us for dis world.
74:13 Yu divide di sea with yor pawa kon kill di monsta wey dey der.
74:14 Yu skata di wota juju head kon allow animals for desert chop am.
74:15 Just as Yu get pawa to make wota and sea flow, na so too, Yu fit dry river wey nor suppose dry.
74:16 Na Yu get both day and nite; na Yu still make di moon and di sun.
74:17 Yu measure where di eart go rish kon make both dry and rainin sizin.
74:18 My God, si as di enemies dey curse Yu. Pipol wey nor get sense nor dey respet yor name.
74:19 Make Yu nor let dis wiked animal distroy yor pipol. Yor pipol wey dey sofa, make Yu nor forget dem forever.
74:20 Make Yu remember yor kovenant, bikos na darkness and trobol full di land!
74:21 Make Yu nor let dem disgrace pipol wey dey sofa. Instead, make Yu let poor pipol and doz wey dem dey opress, praiz yor name.
74:22 My God, make Yu raiz-up kon fight for mi. Make Yu remember as dis fools dey curse Yu evriday.
74:23 Make Yu nor forget evritin wey yor enemies tok or how dem dey shaut anyhow.