Library · ksw

Psalms 24

0 စီၤဒၤဝံးအထါ.

1 ဟီၣ်ခိၣ်,ဒီးတၢ်လၢအမၤပှဲၤအီၤန့ၣ်မ့ၢ်ယွၤအတၢ်,လၢာ်ခိၣ်,ဒီးပှၤအိၣ်ဝဲဆိးဝဲလၢအပူၤလီၤ.

2 အဂ့ၢ်ဒ်အံၤ,ပာ်လီၤဝဲအခီၣ်ထံးလၢပီၣ်လဲၣ်အဖီခိၣ်,ဒီးဒုးအိၣ်ဂၢၢ်ဆိးကျၢၤအီၤလၢထံကျိတဖၣ်အဖီခိၣ်လီၤ.

3 မ့ၢ်မတၤကလဲၤထီၣ်လၢယွၤအကစၢၢ်တဂၤလဲၣ်.ဒီးမ့ၢ်မတၤကဆၢထၢၣ်လၢအလီၢ်စီဆှံအပူၤတဂၤလဲၣ်.

4 ပှၤလၢတၢ်ဒဲးဘးတအိၣ်ဘၣ်လၢအစုပူၤဘၣ်,ဒီးအသးကဆှီဝဲ,လၢအတဆှၢဘၣ်အသးဆူတၢ်ကလီကလီဘၣ်,ဒီးတဆိၣ်ဘၣ်တၢ်လၢလီတၢ်ဘၣ်.

5 အဝဲဒၣ်န့ၣ်ကဒိးန့ၢ်တၢ်ဆိၣ်ဂ့ၤလၢယွၤ,ဒီးတၢ်တီတၢ်လိၤလၢအတၢ်အုၣ်က့ၤခီၣ်က့ၤအီၤအကစၢ်လီၤ.

6 အဝဲန့ၣ်မ့ၢ်ပှၤတစိၤလၢအဃုအီၤ,ပှၤလၢအဃုနမဲာ်,ယၤကိာ်လီၤ. စ့လၤ.

7 မိာ်ထီၣ်သုခိၣ်,ပဲတရီသ့ၣ်ဧၢ,ဒီးစိာ်ထီၣ်ထီသုသး,တြဲၤအထူအယိာ်သ့ၣ်ဧၢ,ဒီးတၢ်လၤကပီၤအစီၤပၤကဟဲနုာ်လီၤ.

8 တၢ်လၤကပီၤအစီၤပၤတဂၤအံၤမ့ၢ်မတၤတဂၤလဲၣ်.ယွၤလၢအဂံၢ်ဆူၣ်အဘါဆူၣ်,ဒီးအိၣ်ဒီးအစိအကမီၤ,ယွၤလၢအအိၣ်ဒီးအစိအကမီၤလၢဒုးသုးအပူၤလီၤ.

9 မိာ်ထီၣ်သုခိၣ်,ပဲတရီသ့ၣ်ဧၢ,ဒီးစိာ်ထီၣ်သုသး,တြဲၤအထူအယိာ်သ့ၣ်ဧၢ,ဒီးတၢ်လၤကပီၤအစီၤပၤကဟဲနုာ်လီၤ.

10 တၢ်လၤကပီၤအစီၤပၤတဂၤအံၤမ့ၢ်မတၤတဂၤလဲၣ်.ယွၤ,တၢ်သုးမုၢ်ဂီၢ်မုၢ်အကစၢ်,အဝဲဒၣ်န့ၣ်မ့ၢ်တၢ်လၤကပီၤအစီၤပၤလီၤ. စ့လၤ.