Library · ksw

Psalms 25

0 စီၤဒၤဝံးအထါ.

1 ယဆှၢထီၣ်ယသးဆူနအိၣ်,ယွၤဧၢ.

2 ယကစၢ်ဧၢ,ယသန့ၤယသးလၢနၤလီၤ.မ်ယမဲာ်အသုတဆှးတဂ့ၤ.မ်ယဒုၣ်ယဒါအသုတသးခုလၢယဖီခိၣ်တဂ့ၤ.

3 မ့ၢ်မးပှၤလၢအမုၢ်လၢ်တၢ်လၢနၤတဖၣ်န့ၣ်တမဲာ်ဆှးဘၣ်နီတဂၤဘၣ်,ပှၤလၢအမၤတၢ်တတီတလိၤကလီကလီန့ၣ်ကဘၣ်တၢ်မဲာ်ဆှးလီၤ.

4 ယွၤဧၢ,ဘိးဘၣ်သ့ၣ်ညါယၤလၢနကျဲတဖၣ်န့ၣ်တက့ၢ်.သိၣ်လိယၤလၢနကျဲဧိၤကပူၤဧိၤတက့ၢ်.

5 ဒုးလဲၤယၤလၢနတၢ်မ့ၢ်တၢ်တီအပူၤ,ဒီးသိၣ်လိယၤတက့ၢ်.အဂ့ၢ်ဒ်အံၤ,နမ့ၢ်တၢ်အုၣ်က့ၤခီၣ်က့ၤယၤအကစၢ်လီၤ.ယအိၣ်ခိးနၤသ့တနံၤကျၢၤလီၤ.

6 သ့ၣ်နီၣ်ထီၣ်က့ၤနတၢ်သးအိၣ်တဖၣ်,ဒီးနဘျုးနဖှိၣ်တက့ၢ်.ယွၤဧၢ.အဂ့ၢ်ဒ်အံၤ,အိၣ်ဝဲလၢပျၢၤလၢကစၢၤလံၤလံၤလီၤ.

7 ယဖိၣ်သၣ်ခွါထီၣ်အတၢ်ဒဲးဘး,ဒီးယတၢ်ကမၣ်တဖၣ်န့ၣ်သ့ၣ်နီၣ်ထီၣ်က့ၤလၢ်တဂ့ၤ.ဒ်နဘျုးနဖှိၣ်အသိးန့ၣ်သ့ၣ်နီၣ်ထီၣ်က့ၤယၤလၢနတၢ်ဂ့ၤအဃိတက့ၢ်.

8 ယွၤန့ၣ်မ့ၢ်တၢ်ဂ့ၤတၢ်ဝါ,ဒီးတၢ်တီတၢ်လိၤလီၤ.မၤသးဒ်န့ၣ်ဒီးဒုးနဲၣ်ပှၤတၢ်ဒဲးဘးဖိလၢကျဲန့ၣ်လီၤ.

9 ဒုးလဲၤပှၤအသးစူၤတဖၣ်လၢတၢ်စံၣ်ညီၣ်အပူၤ,ဒီးဒုးနဲၣ်ပှၤအသးစူၤတဖၣ်လၢအကျဲလီၤ.

10 ကယဲၢ်ယွၤအကျဲခဲလၢာ်မ့ၢ်တၢ်ဘျုးတၢ်ဖှိၣ်,ဒီးတၢ်မ့ၢ်တၢ်တီလၢပှၤလၢအတိၢ်န့ၢ်အတၢ်အၢၣ်လီၤအီလီၤ,ဒီးအတၢ်အုၣ်အသးတဖၣ်န့ၣ်အဂီၢ်လီၤ.

11 လၢနမံၤအဃိ,ကစၢ်ဧၢ,ပျၢ်ယတၢ်ကမၣ်တက့ၢ်.အဂ့ၢ်ဒ်အံၤ,မ့ၢ်အဒိၣ်အယိာ်လီၤ.

12 ပှၤလၢအပျံၤယွၤတဂၤန့ၣ်မ့ၢ်မတၤလဲၣ်.ကနဲၣ်လိအီၤလၢကျဲတဘိလၢအကဃုထၢဝဲလီၤ.

13 အသးကအိၣ်ဝဲဆိးဝဲလၢတၢ်ဂ့ၤအပူၤ,ဒီးအချံအသၣ်ကန့ၢ်ဘၣ်သါထံဧိၤကီၢ်ဧိၤလီၤ.

14 ယွၤအတၢ်ကူၣ်တၢ်ဖးန့ၣ်အိၣ်ဝဲဒီးပှၤလၢအပျံၤအီၤ,ဒီးအတၢ်အၢၣ်လီၤအီလီၤ,ဒ်သိးအကဘိးဘၣ်သ့ၣ်ညါအီၤလီၤ.

15 ယမဲာ်ကွၢ်တၢ်ဆူယွၤတထံၣ်ဃီလီၤ.အဂ့ၢ်ဒ်အံၤ,အဝဲဒၣ်န့ၣ်ကထုးထီၣ်ကွံာ်ယခီၣ်လၢပှာ်ဧိၤစၤဧိၤအပူၤလီၤ.

16 ဃၣ်နသးဆူယအိၣ်,ဒီးသးကညီၤယၤတက့ၢ်.အဂ့ၢ်ဒ်အံၤ,ယအိၣ်သယုၢ်,ဒီးယဘၣ်နးဘၣ်ဖှီၣ်လီၤ.

17 ယသးအတၢ်ကိၢ်တၢ်ဂီၤဒိၣ်ထီၣ်လဲၢ်ထီၣ်ဝဲလီၤ.ဒုးဟးထီၣ်ကွံာ်ယၤလၢယတၢ်ကိၢ်တၢ်ဂီၤတဖၣ်အပူၤန့ၣ်တက့ၢ်.

18 ကွၢ်ဆိကမိၣ်ယတၢ်နးတၢ်ဖှီၣ်,ဒီးယတၢ်ကိၢ်တၢ်ဂီၤ,ဒီးပျၢ်ယတၢ်ဒဲးဘးခဲလၢာ်န့ၣ်တက့ၢ်.

19 ကွၢ်လီၤယဒုၣ်ယဒါတဖၣ်တက့ၢ်.အဂ့ၢ်ဒ်အံၤ,အိၣ်ဝဲအါဂၤ,ဒီးသးဟ့ယၤလၢတၢ်သးဟ့လၢအမၤအၢတၢ်လီၤ.

20 အံးလီၤကွၢ်လီၤယသးဒီးမၤပူၤမၤဖျဲးယၤတက့ၢ်.မ်ယသုတမဲာ်ဆှးတဂ့ၤ.အဂ့ၢ်ဒ်အံၤ,ယသန့ၤယသးလၢနၤလီၤ.

21 မ်တၢ်လၢတၢ်ပှဲၤဒီးတၢ်တီတၢ်လိၤပၢၤယၤတက့ၢ်.အဂ့ၢ်ဒ်အံၤ,ယကွၢ်လၢ်နကျဲလီၤ.

22 ကစၢ်ဧၢ,ပှ့ၤက့ၤအံၣ်စရ့လးလၢအတၢ်ကိၢ်တၢ်ဂီၤခဲလၢာ်အပူၤတက့ၢ်.