Library · ksw

Psalms 60

0 လၢတၢ်အခိၣ်အဂီၢ်,လၢစီၤဒၤဝံးအတၢ်ကွဲးယိာ်လၢသိၣ်လိတၢ်အဂီၢ်,လၢတၢ်အၢၣ်လီၤအီလီၤအဖီဒ့ၣ်ညါလၢအမၤဃၣ်ပှၤမ့းစပတၤမံဖိ,ဒီးပှၤစူၤရံဖိ,ဒီးစီၤယိၤအာ်ဟဲက့ၤ,ဒီးကျီကွံာ်ပှၤအဒိၣ်ဖိတဆံခံကထိလၢကစၢၢ်ကဆူးအံသၣ်အပူၤန့ၣ်.

1 ယွၤဧၢ,နညိကွံာ်လံပှၤလံ,နမၤလီၤမုၢ်လီၤဖးလံပှၤလံ,နသးထီၣ်လံ.ဃၣ်က့ၤနသးဆူပအိၣ်တက့ၢ်.

2 နမၤဟီၣ်ခိၣ်ဆှဲးဆှိးလံ.နမၤသ့ၣ်ဖးလံအီၤလံ.မၤဘျါက့ၤအသ့ၣ်ဖးအလီၢ်န့ၣ်တက့ၢ်.အဂ့ၢ်ဒ်အံၤ,ဟူးဝးဝဲလီၤ.

3 နဒုးနဲၣ်လံနပှၤဂီၢ်မုၢ်လၢတၢ်ကီတၢ်ခဲ,နဒုးအီလံပှၤလၢစပံးထံမူၤလံ.

4 နဟ့ၣ်လီၤသုးဖိအလၣ်လၢပှၤလၢအပျံၤနၤ,ဒ်သိးတၢ်ကမၤဖျါအီၤလၢတၢ်မ့ၢ်တၢ်တီအဃိလီၤ. စ့လၤ.

5 ဒ်သိးပှၤလၢနအဲၣ်အီၤတဂၤကပူၤဖျဲးဒီး,အုၣ်က့ၤခီၣ်က့ၤတၢ်လၢနစုထွဲ,ဒီးဒိကနၣ်ယကလုၢ်တက့ၢ်.

6 ယွၤကတိၤလံတၢ်လၢအတၢ်စီဆှံအပူၤလံ,ယကသူၣ်ဖှံသးညီ,ယကနီၤဖးၡက့ၣ်အဆၢ,ဒီးတၢ်ပျီပူၤစူးကိၤသးန့ၣ်ယကထိၣ်အီၤလီၤ.

7 ကံးလဧးမ့ၢ်ယတၢ်,ဒီးမနၤရှ့ၤမ့ၢ်ယတၢ်,ဒီးအ့ဖရဲၣ်မ့ၢ်ယခိၣ်အဂံၢ်အဘါ,ယူဒၤမ့ၢ်ယပှၤဟ့ၣ်တၢ်သိၣ်တၢ်သီ,

8 မိၤအးမ့ၢ်ယသ့စီတၢ်အသရာ်တဖျၢၣ်,ယကွံာ်တ့ၢ်ယခီၣ်ဖံးလၢအဒိၣ်အဖီခိၣ်,ဖလ့ၡသးဧၢ,သူၣ်ကနိးသးကနိးလၢယဃိတက့ၢ်.

9 မ့ၢ်မတၤကဒုးလဲၤနုာ်ယၤဆူဝ့ၢ်အိၣ်ဒီးအခိၣ်ဒူတဂၤလဲၣ်,မ့ၢ်မတၤကဆှၢယၤဆူအဒိၣ်တဂၤလဲၣ်.

10 နဲဒၣ်နညိကွံာ်ပှၤ,ကစၢ်ဧၢ,တမ့ၢ်ဘၣ်ဧါ.ဒီးနတလဲၤထီၣ်ဒီးပပှၤသုးမုၢ်ဂီၢ်မုၢ်ဘၣ်,ယွၤဧၢ.

11 လၢတၢ်မၤကိၢ်မၤဂီၤအပူၤန့ၣ်မၤစၢၤပှၤတက့ၢ်.အဂ့ၢ်ဒ်အံၤ,ပှၤကညီအတၢ်အုၣ်က့ၤခီၣ်က့ၤန့ၣ်မ့ၢ်တၢ်ကလီကလီလီၤ.

12 ပကမၤတၢ်ဒီးတၢ်ဂံၢ်ဆူၣ်ဘါဆူၣ်လၢယွၤလီၤ.ဒီးအဝဲဒၣ်န့ၣ်ကယီၢ်တံၢ်ပဒုၣ်ပဒါလီၤ.