Library · ksw

Psalms 81

0 စီၤအၤစာ်အထါလၢတၢ်အခိၣ်အဂီၢ်လၢကၤသးအတနၢ်.

1 သးဝံၣ်ထီၣ်ယွၤ,ပဂံၢ်ပဘါ,ကိးပသူသးခုဆူစီၤယၤကိာ်အကစၢ်တက့ၢ်.

2 စိာ်ထီၣ်တၢ်သးဝံၣ်,ဒီးဟဲစိာ်ဒၢဖိတနၢ်မုာ်,ဒီးသီတူၢ်န့ၣ်တက့ၢ်.

3 အူကွဲၤလၢလါအခီၣ်ထံး,လၢလါပှဲၤနံၤလၢပမၤဘူၣ်နံၤန့ၣ်တက့ၢ်.

4 အဂ့ၢ်ဒ်အံၤ,အဝဲန့ၣ်မ့ၢ်တၢ်မၤလိာ်လၢအံၣ်စရ့လးအဂီၢ်,တၢ်စံၣ်ညီၣ်လၢအဟဲလၢယၤကိာ်အကစၢ်န့ၣ်လီၤ.

5 ပာ်အီၤလၢယိၤသးအပူၤလၢတၢ်အုၣ်အသးအဂီၢ်,တုၤအဟးထီၣ်လၢအဲၤကူပတူးအကီၢ်ပူၤ,ဖဲယနၢ်ဟူတၢ်ကတိၤအကျိာ်လၢယနၢ်တပၢၢ်ဘၣ်လီၤ.

6 ယသုးကွံာ်အဖံဘၣ်ခိၣ်လၢတၢ်ယိးအဖီလာ်,မၤထူၣ်ဖျဲးအစုလၢနာ်လိၤလီၤ.

7 လၢနဘၣ်တၢ်ကိၢ်တၢ်ဂီၤန့ၣ်နကိးထီၣ်,ဒီးယမၤပူၤမၤဖျဲးနၤ,ယစံးဆၢနၤလၢလီသီၣ်အလီၢ်ခူသူၣ်,ယမၤကွၢ်နၤဖဲထံမရံၤဘါလီၤ. စ့လၤ.

8 ကနၣ်,ယပှၤဂီၢ်မုၢ်သ့ၣ်ဧၢ,ဒီးနမ့ၢ်ကနၣ်ယကလုၢ်ဒီး,ယကအုၣ်ယသးလၢနၤ,အံၣ်စရ့လးဧၢ

9 မ်ပှၤတခီဘီမုၢ်ဖိအကစၢ်အသုတအိၣ်ဒီးသုတဂ့ၤ.ဒီးမ်နသုတဘူၣ်ထီၣ်ဘါထီၣ်ပှၤတခီဘီမုၢ်ဖိအကစၢ်တဂ့ၤ.

10 ယဲဒၣ်အံၤယမ့ၢ်ယွၤနကစၢ်လၢအဒုးဟးထီၣ်နၤလၢအဲၤကူပတူးအကီၢ်ပူၤလီၤ.အဲးထီၣ်နထးခိၣ်တက့ၢ်,ဒီးယကမၤပှဲၤအီၤလီၤ.

11 ဘၣ်ဆၣ်ဒီးယပှၤဂီၢ်မုၢ်တဒိကနၣ်ယကလုၢ်ကထါဘၣ်,ဒီးအံၣ်စရ့လးတဘၣ်အသးလၢယၤဘၣ်.

12 ဒီးယပျၢ်အီၤဆူအသးအၢအပူၤလီၤ.လဲၤဝဲလၢအကူၣ်ထီၣ်ဖးလီၤတၢ်ဒၣ်ဝဲအပူၤလီၤ.

13 ယပှၤဂီၢ်မုၢ်မ့ၢ်ကနၣ်ယကလုၢ်,ဒီးအံၣ်စရ့လးမ့ၢ်ပိာ်ယကျဲဧိၤကပူၤဧိၤဒီး,

14 ယကမၤဃၣ်အဒုၣ်အဒါလၢတစိၢ်ဖိအတီၢ်ပူၤန့ၣ်,ဒီးဃၣ်ယစုထီဒါပှၤသးဟ့အီၤတဖၣ်န့ၣ်လီၤ.

15 ပှၤသးဟ့ယွၤန့ၣ်ကဆီၣ်လီၤအသးလၢအဖီလာ်,ဒီးအဆၢအကတီၢ်ကအိၣ်လီၤထူလီၤယိာ်လီၤ.

16 ကဒုးအီၣ်ဝဲလၢဘုကၠူၣ်အဂ့ၤကတၢၢ်,ဒီးယကဒုးဘျဲးအီၣ်နၤလၢကနဲစီလၢလၢၢ်ပူၤလီၤ.