Library · yue

馬太福音 13

撒種嘅比喻

1 同一日,耶穌離開屋裏去湖邊,坐喺嗰處。

2 有好多人集合去佢面前,致令佢要落船坐;眾人企喺岸上。

3 佢用比喻向佢哋講解好多道理。佢話:「有個撒種嘅人出去撒種。

4 撒種時,有啲落喺路邊,飛鳥嚟食。

5 有啲落喺淺土嘅石地,因為泥土唔深,發苗好快;

6 日頭一出,幼苗就曬乾;又因為根唔夠深,就枯乾。

7 有啲落喺荊棘裏,刑棘生起嚟,就將幼苗逼住。

8 有的落喺好嘅泥土,就生長結實,收成有一百倍,六十倍,三十倍。」

9 於是耶穌話:「有耳可聽嘅,就應當聽!」

比喻嘅目的

10 門徒嚟見耶穌,問佢:「點解你對羣眾講話都用比喻呢?」

11 耶穌答話:「因為天國嘅奧祕淨係俾你哋知道,唔俾佢哋知道。

12 凡有嘅,要加多俾佢,等佢豐足有餘;凡冇嘅,就連佢所有嘅一啲都要奪去。

13 為咗呢個理由,我用比喻對佢哋講;因為佢哋視而不見,聽而不聞,又唔明白。

14 呢啲正應驗以賽亞嘅預言;佢話:呢啲人聽咗又聽,但唔明白;睇咗又睇,但睇唔見。

15 因為佢哋心智閉塞,塞住耳,合埋眼。若唔係,佢哋嘅眼就會睇見,耳亦會聽見,心裏領悟,因心轉意,我就醫好佢哋。

16 但係你哋係有福咯!因為你哋嘅眼睇得見,耳聽得聞。

17 我實在話你哋知,有好多先知聖賢想睇你哋所睇見嘅,但睇唔到;想聽你哋所聽聞嘅,亦聽唔到。」

解釋撒種嘅比喻

18 「所以,你哋也要明白呢個撒種比喻嘅意思。

19 凡聽聞天國嘅道理但唔明白嘅人正如撒喺路旁嘅種,邪惡者嚟到,將撒喺佢心裏嘅道理奪去。

20 嗰啲撒喺石地上嘅種係指人聽咗道理,即時樂意接受,

21 但係扎根唔深,不能持久,一旦為道理而遭遇困難或迫害,即時放棄。

22 嗰啲撒喺荊棘裏嘅係指人聽咗道理之後,生活嘅憂慮同財富嘅誘惑窒息咗道理嘅生機,不能結出果實。

23 嗰啲撒喺好泥土裏嘅種係指人聽咗道理,就明白;結出果實,收成有一百倍,六十倍,三十倍。」

田稗嘅比喻

24 耶穌向佢哋講另一個比喻:話天國好比人撒好種落佢嘅田。

25 晚間,眾人瞓覺時,敵人嚟,將啲稗撒落麥中,就走去。

26 到麥長大結穗時,稗亦出現。

27 莊主嘅僕人前嚟話:『主人,你撤喺田裏嘅係好種,呢啲稗究竟由邊處嚟嘅呢?』

28 佢答話:『呢啲係敵人做嘅。』佢哋就問:『你要唔要我哋去拔起啲稗呢?』

29 佢話:『唔好!因為恐怕你哋拔起稗時,會連麥都拔埋。

30 由得麥同稗一齊生喇;收割時,我會吩咐收割嘅工人先拔起稗,紮起嚟燒,然後收麥,儲藏喺我嘅倉庫。』」

芥菜種嘅比喻

31 耶穌對佢哋講另一個比喻:話「天國好比一粒芥菜種,人將佢種落地。

32 呢啲種比其他一切嘅種都細,但到長大起嚟佢比任何蔬菜都大;佢成為一樖樹,連飛鳥亦喺佢嘅枝上做巢。」

麵酵嘅比喻

33 耶穌講另一個比喻:話「天國好比麵酵,有個女人拎嚟放喺三斗麵粉裏,使全團麵都發起嚟。」

使用比喻

34 耶穌用比喻對羣眾講述呢一切;若唔用比喻,佢就唔對佢哋講。

35 佢噉樣做正應驗先知講嘅話:「我要用比喻向佢哋講,將創世以來隱藏嘅事話佢哋知。」

解釋田稗嘅比喻

36 耶穌離開羣眾,入去屋裏。門徒又嚟問佢:「請話我哋知,田稗嘅比喻係乜嘢意思?」

37 耶穌話:「撒好種嘅係人子;

38 田地就係世界;好種係屬於天國嘅人;稗係屬於嗰個邪惡者嘅人;

39 撒稗嘅敵人係魔鬼;收割時係世界嘅末日;收割嘅工人係天使。

40 到末日,作惡嘅人要好似稗一樣被拔出嚟,俾火焚燒。

41 人子要打發佢嘅天使,將佢國裏嗰啲使人犯罪同一切作惡嘅人捉住,

42 扔落火爐。喺個處,佢哋必哀哭,咬牙切齒。

43 嗰時,義人喺佢哋父嘅國裏,會好似日頭發射光輝。有耳可聽嘅?都應當聽!」

寶藏同珍珠嘅比喻

44 「天國好比財寶藏喺田中。有人發現,將佢掩蓋起嚟,然後好高興將自己所有嘅都變賣,去買嗰塊田。

45 天國又好比一個商人尋找貴重嘅珍珠。

46 當佢發現一粒極貴重嘅珍珠,就去賣嘥佢所有嘅,嚟買嗰粒珍珠。」

撒網嘅比喻

47 「天國又好比魚網撒落湖中,捕捉各樣魚類。

48 網一滿,漁夫就拉上嚟,坐喺岸上,將魚分類,揀好嘅放喺桶裏,壞嘅扔出去。

49 世界嘅末日亦係噉樣;天使出去,喺好人中將壞人分別出嚟,

50 扔喺炎熱嘅火爐裏。喺嗰處,佢哋必哀哭,咬牙切齒。」

新嘅同舊嘅教訓

51 耶穌問佢地:「呢啲話你哋明白未?」佢吔答話:「明白。」

52 耶穌話:「嘅樣講,每一個經學教師成為天國嘅門徒,就好似一家嘅主人由佢庫房裏搬新同舊嘅物件出嚟。」

耶穌喺拿撒勒被厭棄

53 耶穌講完呢啲比喻,就離開嗰處,54 返到自己嘅家鄉。佢喺會堂教訓人;聽見嘅人都好驚奇,話:「佢由邊處得到呢啲智慧?行噉嘅神蹟呢?

54

55 佢唔係木匠嘅仔咩?佢母親唔係馬利亞咩?雅各、約西、西門,同猶大唔係佢嘅細佬咩?

56 佢幾個妹唔係都喺我哋處咩?佢呢啲一切究竟由邊處嚟嘅呢?」

57 於是佢哋厭棄佢。耶穌對佢哋話:「喺本鄉本家以外,先知冇話唔受人尊敬嘅。」

58 因為佢哋唔信,耶穌喺嗰處唔多行神蹟。