馬太福音 12
安息日嘅問題1 冇幾耐之後,耶穌喺安息日經過麥田。佢嘅門徒肚餓,摘麥穗嚟食。
2 有法利賽人睇見,就對耶穌話:「你睇,你嘅門徒做安息日唔准做嘅事!
3 耶穌答話:」大衛同佢嘅隨從喺肚餓時所做嘅事,你哋冇讀過咩?
4 佢入去上帝嘅聖殿,同佢嘅隨從食獻俾上帝嘅餅;此係違法嘅(因為嗰種餅只有祭司致可以食)。
5 唔通你哋冇讀過摩西嘅律法所記載嘅?每安息日,祭司喺聖殿破壞安息日嘅規矩,但係佢哋唔算犯罪。
6 我話你哋知,呢處有比聖殿更加重要嘅。聖經話:『我要嘅係仁慈,唔係祭牲。』
7 若你哋真正明白呢句話嘅意思,你哋就唔會將無辜嘅人定罪。
8 因為人子係安息日嘅主。」
醫好手枯乾嘅病人9 耶穌離開嗰處,去猶太人嘅會堂。
10 喺嗰處有一個人,佢一隻手枯乾咗。有人想搵耶穌嘅錯處,就問佢:「喺安息日醫病係唔係違法呢?
11 耶穌答話:「若你哋中有人有一隻羊,喺安息日跌落坑,點樣做好呢?佢唔將羊拉上嚟咩?
12 人比羊貴重得多!所以,喺安息日行善係我哋嘅律法所允許嘅。」
13 於是,耶穌對嗰個人話:「伸直隻手!」佢一伸手,手就好返,同另隻手一樣。
14 法利賽人出去,計劃對付耶穌,要殺害佢。
上帝所揀選嘅僕人15 耶穌聽到呢個消息,就離開嗰處,好多人跟住佢。佢醫好佢哋嘅病,
16 吩咐佢哋唔好將消息張揚出去。
17 呢啲就係應驗先知以賽亞所講嘅:
18 「睇吓,佢係我所揀選嘅僕人;我愛佢,喜歡佢。我將我嘅靈賜俾佢;佢要向萬民宣告我嘅審判。
19 佢唔爭辯,唔喧嚷,亦唔喺大街上叫喊。
20 佢唔折斷被壓傷嘅蘆葦,亦唔吹滅將熄嘅燈火。佢要堅持正義,直到正義得勝。
21 全世界嘅人都要將希望寄託於佢!」
耶穌同別西卜22 當時,有人帶一個被鬼迷、又盲又啞嘅人嚟耶穌面前。耶穌醫好佢,使佢能講,又能睇見。
23 羣眾好驚奇,話:「唔通佢就係嗰個大衛嘅子孫咩?」
24 法利賽人聽見就話:「佢會趕鬼,無非係倚靠鬼王別西卜啫。」
25 耶穌知道佢哋嘅心意,就對佢哋話:「凡一國自己相爭嘅,就必然衰敗;凡一城一家自己相爭哋,就必然破碎。
26 若撒但驅逐撒但,就係自己相爭,佢嘅國又點能企得住呢?
27 若我趕鬼係倚靠別西卜,噉樣,你哋嘅子弟趕鬼,又倚靠邊個呢?你哋嘅子弟證明你哋係錯嘅!
28 若我靠上帝嘅靈趕鬼,噉就證明上帝嘅國已經臨到你哋處。」
29 「人點能入武士嘅家搶奪佢嘅財物呢?除非先綁起武士然後致能搶奪佢嘅財物。」
30 凡唔同我相合嘅,就係反對我嘅;唔同我一齊收聚嘅,就係分散嘅。
31 所以,我話你哋知,人所犯一切嘅罪同所講一切毀謗嘅話都可得到赦免;但係褻瀆聖靈嘅罪總唔得赦免。
32 凡講話冒犯人子嘅,可以得到赦免;惟獨褻瀆聖靈嘅,今世來世,總唔得赦免。」
果樹同果33 「好嘅果樹致有好果;壞嘅果樹一定結壞果。由所結嘅果就可以認出嗰樖果樹嘅好壞。
34 你哋毒蛇之類!你哋原係邪惡嘅,點能講出好話呢?因為心所充滿嘅,口就講出。
35 好人由佢積存嘅善發出善;壞人由佢積存嘅惡發出惡。」
36 「我話你哋知,喺審判嘅日子,每人所講嘅閒話句句都要供出。
37 因為,上帝要用你自己嘅話嚟宣告你有罪,亦要用你自己嘅話嚟宣告你無罪。」
要求神蹟38 當時,有幾個經學教師同法利賽人嚟對耶穌話:「老師,我哋希望你顯個神蹟俾我哋睇。」耶穌話:
39 「呢個邪惡、及冇信心時代嘅人!竟要求我顯神蹟咩?冇可能,除先知約拿嘅神蹟,再冇其他神蹟俾你哋睇。
40 約拿喺大魚肚裏三日三夜,人子亦要喺地嘅深處三日三夜。
41 喺審判日,尼尼微人要起嚟控告你哋呢一代嘅人,因為佢哋聽見約拿嘅宣道就改邪歸正。我話你哋知,有大過約拿嘅喺呢處!
42 喺審判日,南方女王要起嚟控告你哋呢一代嘅人,因為佢長途跋涉嚟聽所羅門王智慧嘅話。我話你哋知,有大過所羅門嘅人喺呢處呀!」
邪靈返嚟43 「邪靈離開人,在旱地遊行,搵棲息地,搵唔到,
44 就話:『我要返去原先嘅屋。』於是返去,發現屋重係空,打掃得乾淨又整齊。
45 就出去,帶七個比佢更邪惡嘅靈,同佢入去一齊住。嗰個人後來嘅景況比以前更壤。呢個邪惡時代嘅人嘅處境亦係噉樣。」
耶穌嘅母親同細佬46 耶穌同羣眾講緊話時,佢嘅母親同細佬嚟咗。企喺外邊,想同佢講話。
47 有人話俾耶穌知:「睇吓,你母親同細佬企喺外邊,想同你講話!」
48 耶穌話:「邊個係我母親?邊個係我細佬?」
49 於是指住佢嘅門徒話:「你哋睇,呢啲人就係我嘅母親,我嘅兄弟!
50 凡實行我天父旨意嘅人,就係我嘅兄弟、姊妹,同母親呀。」