馬太福音 15
祖先嘅傳統1 有幾個法利賽人同經學教師由耶路撒冷嚟見耶穌,問佢:
2 「點解你嘅門徒唔遵守我哋祖先嘅傳統?佢哋食飯前冇按照規矩洗手!」
3 耶穌答話:「點解你哋為遵守傳統,而違背上帝嘅命令呢?
4 上帝話:『要孝敬父母』;又話:『咒罵父母嘅人必須處死。』
5 你哋偏偏話:若係有人將應該奉養父母嘅當做禮物獻俾上帝,
6 佢就唔使孝敬父母。你哋拎傳統嚟抵消上帝嘅話。
7 假冒為善嘅人呀,以賽亞指你哋所講嘅預言真係冇錯!佢話:上帝話:
8 呢啲人用口尊敬我;佢哋嘅心遠離我。
9 佢哋將人嘅規例當做我嘅命令;佢哋敬拜我都係枉然!」
使人不潔淨嘅嘢10 耶穌召集羣眾到佢面前,對佢哋話:「你哋要聽,亦要明白!
11 嗰啲從人口入去嘅嘢唔會使人唔潔淨;嗰啲從人口出嚟嘅致會使人唔潔淨。」
12 後來門徒話耶穌知:「法利賽人聽見你呢啲話,好唔服氣,你知唔知道?」
13 耶穌答話:「凡唔係我天父所栽種嘅植物都要連根拔去。
14 唔好理佢哋!佢哋係盲眼嘅領袖;盲眼嘅帶盲眼嘅行路,兩個都會跌落坑。」
15 彼得話:「請你向我哋解釋呢個比喻嘅意思。」
16 耶穌話:「你哋到現在重係同人哋一樣唔明白咩?
17 唔通你哋唔知,一切由口入去嘅食物,到肚裏,然後排泄出嚟咩?
18 但係由口出嘅係由內心出嚟;致會使人唔潔淨。
19 因為由人心裏出嚟嘅,有種種惡念;呢哋惡念指使佢犯兇殺、淫亂、通姦、偷盜、講大話、毀謗嘅罪。
20 呢一切致係會使人唔潔淨。至於唔洗手就食飯嗰一類嘅事係唔會使人唔潔淨嘅。」
一個女人嘅信心21 耶穌離開嗰處,避到去推羅同西頓附近嘅地區。
22 當地一個迦南女人嚟見佢,大叫話:「主呀,大衛嘅子孫,可憐我喇!我個女被鬼迷得好辛苦呀!」
23 耶穌一句都唔答。門徒上嚟求佢話:「請叫佢走開喇!佢跟住我哋,一路大叫!」
24 耶穌答話:「我只係受派到以色列人中尋找迷失嘅羊。」
25 個女人一聽見呢啲話,就喺佢腳前下拜,話:「主呀,請幫助我!」
26 耶穌話:「拎仔女嘅食物俾狗食係唔啱嘅。」
27 個女人話:「主呀,冇錯,但係狗都食主人檯上跌落嚟嘅零碎!」
28 於是耶穌話:「婦人,你嘅信心好大呀!照你所要嘅,成全俾你喇!」佢個女就喺嗰時好返。
醫好各種病人29 耶穌離開嗰處,嚟到加利利湖邊。就上山,坐喺處。
30 羣眾又嚟搵佢,而且帶嚟跛腳嘅、盲眼嘅、殘廢嘅、啞嘅,同好多患其他疾病嘅人,都放喺耶穌腳前;耶穌一一醫好佢哋。
31 嗰班人睇見啞嘅講話,殘廢嘅好返,跛腳嘅行路,盲眼嘅睇見,都非常驚奇,就讚美以色列嘅上帝。
俾四千人食飽32 耶穌叫門徒嚟,對佢哋話:「我真係替呢一班人擔心,佢哋向我一齊已經三日,都冇嘢食。我唔想叫佢哋餓住返去,恐怕佢哋會喺路上暈倒。」
33 門徒話:「呢個偏僻嘅地方,我哋去邊處搵足夠嘅食物俾呢一大班人食飽呢?」
34 耶穌問佢哋:「你哋有幾多餅?」佢哋答話:「七個餅同幾條魚仔。」
35 耶穌吩咐羣眾坐喺地上,
36 拎起嗰七個餅同幾條魚仔,感謝上帝,擘開,遞俾門徒;門徒分俾眾人。
37 眾人都食,而且食飽。門徒收拾剩餘嘅零碎,裝滿七籃。
38 食飽嘅,婦女同孩童以外,有四千人。
39 於是耶穌散開羣眾,然後上船,去馬加丹地區。