馬太福音 16
要求神蹟1 有幾個法利賽人同撒吐該入嚟見耶穌,想陷害佢,要求佢顯個神蹟,證明佢所做嘅係出於上帝。
2 耶穌話:「挨晚時,你哋話:『明日一定係好天,因為天邊有紅霞。』
3 朝早,你哋話:『今日會有風雨,因為天色暗紅。』你哋會分辨天色,但不能分辨呢個時代嘅神蹟!
4 邪惡、淫亂嘅世代!要求神蹟咩? 除約拿嘅神蹟,你哋再不能見第二啲神蹟。」耶穌講完,就離開佢哋去。
法利賽人同撒吐該人嘅酵5 門徒渡過湖到對岸,忘記帶餅。
6 耶穌話佢哋知:「你哋要小心,防備法利賽人同撒吐該人嘅酵!」
7 門徒彼此議論話:「佢講呢啲話係因為我哋冇帶餅。」
8 耶穌知道佢哋講緊啲乜嘢,就問佢哋:「你哋點解喺處討論冇帶餅嘅事呢?你哋嘅信心太細咯!
9 竟然到現今重唔明白!你哋唔記得我擘開五個餅俾五干人食嘅事咩?當時重剩低幾多籃零碎呢?
10 重有嗰七個餅俾四千人食飽,你哋又收拾咗幾多籃零碎呢?
11 點解重唔明白我唔係同你哋講餅嘅事?你哋要防備法利賽人同撒吐該人嘅酵!」
12 噉樣門徒致明白耶穌並唔係要佢哋提防餅裏嘅酵,而係要提防法利賽人同撒吐該人嘅教訓。
彼得認耶穌為基督13 耶穌到該撤利亞腓立比嘅境內;問門徒話:「人話人子係邊個?」
14 佢哋答話:「有啲話,你係施洗約翰;有啲話,你係以利亞;亦有啲話,你係耶利米或者其他先知中嘅一位。」
15 耶穌問佢哋:「你哋呢?你哋話我係邊個?」
16 西門彼得答話:「你係基督,永生上帝之子。」
17 耶穌話:「約翰嘅仔西門,你有福咯;因為呢啲真理唔係人傳授俾你嘅,係我天上嘅父親向你啟示嘅。
18 我話你知,你係彼得(磐石);喺呢嚿磐石上,我要建立我嘅教會,死亡嘅權勢亦不能勝佢。
19 我將天國嘅鑰匙俾你,你喺地上禁止嘅,喺天上亦禁止;你喺地上准許嘅,喺天上亦准許。」
20 於是,耶穌吩咐門徒唔好話任何人知佢係基督。
預言佢嘅受難同死21 由嗰時起,耶穌清楚指示門徒,話:「我必要上去耶路撒冷,喺長老、祭司長,同經學教師嘅手下受好多苦難,而且被殺,第三日復生。」
22 彼得拉耶穌到一邊,勸阻佢,話:「主呀,此事絕對唔可以臨到你身上!」
23 耶穌轉身對彼得話:「撒但,走開!你係我嘅絆腳石;因為你所想嘅唔係上帝嘅想法,而係人嘅想法!」
24 於是,耶穌對門徒話:「若有人想跟從我,就要捨棄自己,背起佢嘅十字架嚟跟從我。
25 因為凡想救自己生命嘅,就會喪失生命;凡為我而喪失生命嘅,就會得到生命。
26 人得全世界,但喪失自己嘅生命,有乜益呢?當然冇!佢能拎乜嘢去換返自己嘅生命呢?
27 人子將喺佢父嘅榮耀裏,同佢嘅天使一齊來臨。嗰時,佢要照各人嘅行為施報應。
28 我實在話你哋知,企喺呢處嘅人,有啲喺佢哋死以前會睇見人子喺佢國中降臨。」