馬太福音 28
耶穌復活1 過咗安息日,星期日臨天光時,抹大叫嘅馬利亞同另一個馬利亞一齊到墳地去睇。
2 忽然有強烈嘅地震,主嘅天使由天降落,將石轆開,坐喺上面。
3 佢嘅容貌好似閃電,佢嘅衣服好似雪一樣潔白。
4 嗰啲守衛因為驚慌就震起嚟,好似死人一樣。
5 個天使同班婦女講:「唔使怕,我知你哋要搵嗰個被釘十字架嘅耶穌。
6 佢唔喺呢處,照佢所講嘅,佢已經復生。你哋過嚟,睇安放佢嘅地方。
7 你哋快去話俾佢嘅門徒知:『佢已經從死者中復生,佢要比你哋先去加利利;喺嗰處,你哋會見到佢!』要記住我同你哋講嘅呢啲話。」
8 婦女就急忙離開墳地,又驚奇又極歡喜,走去報告佢嘅門徒。
9 忽然,耶穌喺路上出現,對佢哋話:「願你哋平安!」佢哋上前,抱住佢嘅腳拜佢。
10 耶穌對佢哋話:「唔使怕,你哋要去話俾我嘅兄弟知,叫佢哋去加利利;喺嗰處,佢哋會見到我。」
守衛嘅報告11 婦女重在趕路時,有哋看守墳墓嘅兵士入城,向祭司長報告發生嘅一切事。
12 祭司長同長老商量後,拎一大筆錢俾兵士,
13 對佢哋話:「你哋要話,耶穌嘅門徒喺夜晚,你哋瞓覺時嚟將佢嘅遺體偷走咗。
14 若總督知呢件事,我哋會出面講話,保你哋無事。」
15 於是,兵士接受錢,照佢哋所吩咐嘅做。此謠言流傳喺猶太人中,直到今日。
耶穌向門徒顯現16 十一個門徒到加利利境內,到耶穌吩咐佢哋嘅嗰座山上。
17 佢哋一見到耶穌,就向佢下拜;但係重有人心裏疑惑。
18 耶穌走近佢哋,對佢哋話:「上帝已經將天上地下所有嘅權柄都賜俾我。
19 所以,你哋要去,使萬民做我嘅門徒;奉父、子、聖靈嘅名為佢哋施洗,
20 而且教導佢哋遵守我俾你哋嘅一切命令。我時常與你哋同在,直到世界嘅末日。」