馬太福音 27
耶穌被解交彼拉多1 清早,所有嘅祭司長同民間嘅長老商議,要處死耶穌。
2 佢哋將耶穌綁起,押走,交俾羅馬總督彼拉多。
猶大嘅死3 出賣耶穌嘅猶大睇見耶穌被定罪,就後悔,於是將三十兩銀拎去俾返祭司長同長老,
4 話:「我犯咗罪,出賣咗無辜者嘅血!」佢哋答話:「嗰啲係你自己嘅事,同我哋有乜嘢關係?」
5 猶大將錢丟喺聖殿裏,走出去,上吊自殺。
6 祭司長將錢執起,話:「呢啲係血錢,將佢放入奉獻箱係違法嘅。」
7 商議嘅結果,佢哋同意拎呢啲錢去購買陶匠嘅一塊地皮,做埋葬異鄉人嘅墳地。
8 所以,到今日人仍然叫呢塊地做「血田」
9 呢件事嘅經過實現咗先知耶利米講過嘅話:佢哋拎三十兩銀,即係以色列人同意為佢付出嘅價錢,買咗陶匠嘅地皮;
10 呢哋係依照主所命令我嘅。
在彼拉多面前受審11 耶穌企喺總督面前,總督問佢:「你係猶太人嘅王咩?」耶穌答話:「你講得啱。」
12 祭司長同長老對佢嘅控告,佢一概唔答。
13 於是彼拉多對佢話:「你冇聽見佢哋控告你咁多嘅事咩?」
14 耶穌仍然一句話都唔答;彼拉多非常詫異。
被判死刑15 每逢逾越節,總督照慣例為羣眾釋放一個佢哋所要嘅囚犯。
16 嗰時,有一個出名嘅囚犯叫(耶穌)巴拉巴。
17 羣眾聚集時,彼拉多問佢哋:「你哋要我為你哋釋放邊一個呢?(耶穌)巴拉巴吖?抑或係嗰個稱為基督嘅耶穌呢?」
18 彼拉多明知佢哋係出於嫉妒將耶穌交俾佢。
19 彼拉多開庭審判時,佢嘅夫人派人嚟話佢知:「嗰個無辜者嘅事,你唔好理,因為我昨晚喺夢裏為佢受咗好多苦。」
20 祭司長同長老唆慫民眾,佢哋就要求彼拉多釋放巴拉巴,將耶穌處死。
21 但係總督問佢哋話:「呢兩個人之中,你哋要我釋放邊一個呢?」佢哋答話:「巴拉巴!」
22 彼拉多問佢哋:「噉樣,我應該點樣處理嗰個稱為基督嘅耶穌呢?」佢哋都叫話:「將佢釘十字架!」
23 彼拉多問:「佢做過乜嘢壞事呢?」佢哋更大聲叫:「將佢釘十字架!」
24 彼拉多睇情形,知道再講都冇用,反而可能激起暴動,就拎水喺群眾面前洗手,話:「流呢個人嘅血,罪不在我,你哋自己承擔喇!」
25 羣眾異口同聲話:「呢個人嘅血債由我哋同我哋嘅子孫承擔!」
26 彼拉多就釋放巴拉巴俾佢哋,又命令將耶穌鞭打,然後交俾人去釘十字架。
兵士戲弄27 彼拉多嘅兵將耶穌帶入總督府;全隊集合喺佢周圍。佢哋剝咗耶穌嘅衣服,幫佢着上一件深紅色嘅袍,
28
29 又用荊棘編成一頂冠冕戴喺佢頭上,於一條蘆荻放喺佢嘅右手,然後跪喺佢面前戲弄佢,話:「猶太人嘅王萬歲!」
30 佢哋又向佢吐口水,拎蘆荻打佢嘅頭。
31 佢哋戲弄完,將佢身上嘅袍除落,同佢着返自己嘅衣服,然後帶佢出去釘十字架。
耶穌被釘十字架32 佢哋出嚟時,遇見一個古利奈人,名叫西門,就強迫佢孭耶穌嘅十字架。
33 佢哋嚟到一笪地,叫各各他,意思係「枯顱頭地」
34 佢哋拎苦膽調和嘅酒俾耶穌飲;耶穌嚐吓,就唔肯飲。
35 於是,佢哋將耶穌釘喺十字架上,又抽籤分佢嘅衣服,
36 然後坐喺處看守佢。
37 佢哋喺佢頭上安個罪狀牌,寫落話:「呢個係猶太人嘅王耶穌。」
38 佢哋又將兩個兇犯同釘喺十字架上,一個喺佢右邊,一個喺佢左邊。
39 經過嘅人侮辱耶穌,搖頭,
40 話:「你想拆毀聖殿、三日內將佢重建起嚟嘅!你若係上帝之子,救吓自己,由十字架上落嚟喇!」
41 祭司長、經學教師,同長老亦同樣譏笑佢,話:
42 佢救人哋,反而不能救自已!佢唔係以色列嘅王咩?若佢現在從十字架落嚟,我哋就信佢!
43 佢信靠上帝,自稱為上帝之子;現在等我哋睇吓上帝嚟唔嚟救佢!」
44 連同佢同釘嘅兇犯都同樣辱罵佢。
耶穌嘅死45 中午時,周圍地方都黑暗,約有三個鐘頭。
46 到下午三點鐘左右,耶穌大聲叫:「以利!以利!拉馬撤駁咯大尼?」意思係;「我嘅上帝,我嘅上帝,你點解離棄我?」
47 隔籬企喺處嘅人,有啲聽見,話:「佢叫以利亞呀!」
48 有一人立刻走過去,拎海綿,蘸滿酸酒,然後綁喺蘆荻上,送俾佢飲。
49 其他嘅人話:「等吓,我哋睇以利亞嚟唔嚟救佢!」
50 耶穌又大叫一聲,就斷氣。
51 嗰時,掛喺聖殿裏嘅帳幔,由上到下裂為兩半。大地震動,巖石崩裂,
52 墳墓亦被震開,好多已經死嘅聖徒都復生。
53 佢哋離開墳墓,喺耶穌復生以後入去聖城;喺嗰處有好多人睇見佢哋。
54 看守耶穌嘅軍官同兵士睇見地震同所發生嘅一切事,都非常驚慌,話:「佢真嘅係上帝之子!」
55 重有好多婦女由遠處望住,佢哋係由加利利跟從服事耶穌嘅。
56 其中有抹大拉嘅馬利亞、雅各同約西嘅母親馬利亞,同西庇太兩個仔嘅母親。
耶穌嘅安葬57 傍晚時,有個亞利馬太嘅財主人嚟;佢名叫約瑟,亦喺耶穌嘅門徒。
58 佢去見彼拉多,要求收殮耶穌嘅遺體;彼拉多就吩咐將耶穌嘅遺體交俾佢。
59 約瑟將遺體領去,用乾淨嘅麻紗將佢包好,
60 安放喺佢自己嘅墳墓;呢個墳墓係佢最近由巖石鑿成嘅。佢又將一大石輾過嚟,塞住墓門,然後離開。
61 抹大拉嘅馬利亞同另一個馬利亞面對住墳墓嚟坐,守喺嗰個處。
墳墓嘅守衛62 第二日,係預備日嘅後一日,祭司長同法利賽人一齊去見彼拉多,話:
63 「大人,我哋記得嗰個騙子在生時曾經講過:『三日後我就復生。』
64 所以,請你下令,嚴密守護墳墓,直到第三日,佢嘅門徒就唔能將佢偷走,然後去話俾人哋知:『佢從死者中復生。』噉樣嘅謊言會比先前嘅更利害!」
65 彼拉多對佢哋話:「你哋帶守衛去,盡你哋所能,好好看守墳墓!」
66 於是佢哋去,喺石上加封,封住墓口,留下守衛。