馬可福音 1
施洗約翰傳道1 上帝之子,耶穌基督福音嘅開始。
2 照先知以賽亞書記載:上帝話:我要差遺我嘅使者;喺你面前為你開路。
3 喺曠野有人呼叫:為主準備好佢嘅道路,修直佢要走嘅路徑!
4 果然,約翰喺曠野出現,為人施洗,而且宣佈:「你哋要離棄罪惡,接受洗禮,上帝就赦免你哋嘅罪。」
5 羣眾由猶太各地同耶路撒冷出去約翰處,承認自己嘅罪;約翰喺約但河為佢哋施洗。
6 約翰穿着駱駝毛嘅衣服,腰束皮帶;食嘅係蝗蟲同野蜜。
7 佢宣佈:「喺我以後嚟嘅嗰一位比我偉大得多,我就算彎腰幫佢除鞋都唔配。
8 我用水幫你哋施洗,但佢將用聖靈幫你哋施洗。」
耶穌受洗同受試探9 過冇耐,耶穌由加利利省嘅拿撒勒嚟,約翰喺約但河為佢施洗。
10 耶穌從水上嚟就睇見天開,聖靈好似白鴿降喺佢身上。
11 從天上有聲傳落來,話:「你係我嘅愛子,我喜愛你。」
12 聖靈立刻催促耶穌去曠野。
13 佢喺嗰處四十日,受撒但試探;佢同野獸喺埋一齊,但係有天使伺候佢。
耶穌呼召四漁夫14 約翰坐監之後,耶穌去加利利,傳講上帝嘅福音。
15 佢話:「日期滿喇,上帝嘅國快實現!你哋要離棄罪惡,信福音。」
16 耶穌沿住加利利湖邊行,睇見兩個攞魚嘅─西門同佢嘅細佬安得烈─喺湖上撒網攞魚。
17 耶穌對佢哋哋話:「嚟跟從我!我將使你哋成為得人嘅漁夫。」
18 佢哋立刻丟低魚網,跟從佢。
19 再走冇幾遠,耶穌見西庇太嘅仔雅各同佢嘅細佬約翰;佢哋喺船上整理魚網。
20 耶穌呼召佢哋,佢哋就將父親同僱工留喺船上,跟從耶穌。
一個被鬼迷嘅人21 佢哋嚟到迦百農城;安息日耶穌入會堂教訓人。
22 聽耶穌教訓嘅人都好驚奇,因為佢嘅教訓滿有權威,同一般經學教師唔同。
23 嗰時,有一個被鬼迷嘅人嚟到會堂,大聲叫:
24 「拿撒勒嘅耶穌,你點解干擾我哋?你嚟除滅我地咩?我知道你係邊個;你係上帝嘅聖者!」
25 耶穌命令個鬼:「咪嘈,快從呢嗰人身上出嚟!」
26 邪鬼使嗰個人猛烈抽筋,大叫一聲,然後離開佢。
27 眾人非常驚奇,私下議論話:「呢啲究竟係乜嘢事呀?真係聞所未聞嘅道理!佢居然有權力指揮邪鬼,而邪鬼亦服從佢!」
28 於是耶穌嘅名聲好快傳遍加利利地區。
耶穌醫好好多病人29 佢哋離開會堂,去西門同安得烈嘅家;雅各同約翰亦一齊去。
30 西門嘅岳母正發高燒,瞓喺床上;耶穌一到,佢哋就將佢嘅病情話耶穌知。
31 耶穌去睇佢,拉住佢嘅手,扶佢起身。佢嘅熱退後,就起身接持佢哋。
32 挨晚,日頭落山時,有好多人將患各種病同被鬼迷嘅人帶嚟耶穌面前;
33 全城嘅人亦來,聚集喺門前。
34 耶穌醫好好多患各種病症嘅人,亦趕走好多鬼。佢唔准鬼講話,因為佢哋知佢係邊個。
在加利利傳道35 第二日一早,天重未光,耶穌就起身,離開屋,去一個偏僻嘅地方禱告。
36 西門同佢嘅同伴出去搵佢;
37 搵到之後,就話:「眾人都搵你呀!」
38 耶穌話:「我哋去附近嘅村莊喇,我亦必要喺呢啲地方傳道,因為呢啲正喺我嚟嘅目的。」
39 於是耶穌走勻加利利全境,喺各會堂傳道,而且趕鬼。
耶穌醫好痲瘋病人40 有一個痲瘋病人嚟耶穌面前,跪低求佢話:「只要你肯,你能使我潔淨。」
41 耶穌憐憫佢,伸手摸佢,話:「我肯,你潔淨咯!」
42 佢身上嘅痲瘋立刻離開佢,佢就潔淨。
43 耶穌立刻將佢送走,並鄭重囑咐,話:
44 「唔好話俾任何人知;只要去見祭司,等佢檢查,然後按照摩西嘅規定獻上祭物,向人證明你已經潔淨。」
45 但係呢個人一出去,到處宣揚呢件事,以致耶穌唔能再公然入城,只好住喺城外偏僻嘅地方;羣眾仍然從各地嚟搵佢。