Library · yue

馬可福音 2

耶穌醫好瘋癱病人

1 過幾日,耶穌又返去迦百農城。佢喺家嘅消息一傳開,

2 好多人嚟聚集嘅嗰處,連門前都冇空地。耶穌向佢哋講道時,

3 有四個人抬一個瘋癱病人嚟見耶穌;

4 因為人多,佢哋無法將佢抬到耶穌面前。於是佢哋喺耶穌所在嘅屋頂拆開一個窿;將病人,連同佢瞓嘅床,吊落去。

5 耶穌睇見呢啲人嘅信心,就對瘋癱嘅病人話:「仔呀,你嘅罪得赦免咯。」

6 有幾個經學教師坐喺嗰處,心裏議論話:

7 「此人竟敢講狂妄嘅話!除上帝之外,邊個有赦罪嘅權呢?」

8 耶穌立刻睇穿佢哋噉樣議論,就對佢哋話:「你哋點解噉諗呢?

9 對病人話『你嘅罪得赦免』容易吖?抑或話『起身,拎起你張床走』容易呢?

10 我要向你哋證明人子喺地上有赦罪嘅權。」於是佢對瘋癱嘅病人話:

11 「我吩咐你,起身,拎你張床,返回家啦!」

12 個人起身,即刻攞起張床,喺眾人面前出去。眾人非常驚奇,頌讚上帝話:「我哋從來冇見過噉樣嘅事!」

耶穌呼召利未

13 耶穌再到加利利湖邊,一大班人聚集喺佢身邊,佢教導佢哋。

14 佢再向前行時,睇見一個收稅嘅人,佢係亞勒腓嘅仔利未,坐喺稅關。耶穌對佢話:「嚟跟從我!」利未就起身,跟從佢。

15 以後耶穌喺利未家中食飯,有好多稅吏同罪人亦跟從佢;其中有好多人同耶穌及佢嘅門徒同檯食飯。

16 有啲經學教師同法利賽人睇見耶穌同罪人及稅吏一齊食飯,就質問佢嘅門徒:「佢點解同稅吏與及罪人一齊食飯呢?」

17 耶穌聽見,就話:「健康嘅人唔使用醫生,有病嘅人致要用佢。我嚟嘅目的唔係要召好人,而係要召罪人。」

禁食嘅問題

18 有一次,施洗約翰嘅門徒同法利賽人正在禁食。有人嚟問耶穌:「點解施洗約翰同法利賽人嘅門徒禁食,你嘅門徒唔禁食呢?」

19 耶穌答話:「新郎重喺婚宴時,賀喜嘅客人會禁食咩?只要新郎同佢哋喺埋一齊,佢哋就唔禁食。

20 但係日子將到,新郎從佢哋中被帶走,嗰時佢哋就要禁食咯。

21 冇人拎新布去補舊衣服,若噉做,新布會撕爛舊衣服,使裂痕更大。

22 亦冇人將新酒裝落舊皮袋,若噉做,新酒會將舊皮袋裂開,酒同皮袋都會損壞。所以,新酒要裝落新皮袋!」

23 有一安息日,耶穌經過麥田。佢嘅門徒同佢一齊行;佢哋一路行,一路摘取麥穗。

24 於是法利賽人對耶穌話:「你睇,你嘅門徒做安息日唔准做嘅事!」

25 耶穌就話:「大衛喺需要食物時做咗乜嘢事,你哋冇讀過咩?當佢同佢嘅隨從肚餓,

26 就入去上帝嘅聖殿,食咗獻俾上帝嘅餅。呢啲事發生喺亞比亞他做大祭司時。根據我哋嘅律法,只有祭司致可以食呢啲餅;但係大衛自己食咗,又分俾佢嘅隨從食。」

27 於是耶穌話:「安息日係為人而設;人唔係為安息日而生。

28 所以,人子亦係安息日嘅主。」