馬可福音 16
耶穌復生1 安息日一過,抹大拉嘅馬利亞、雅各嘅母親馬利亞,同撒羅米買的香料,要去搽耶穌嘅遺體。
2 星期日清早,日初出時,佢哋去墳地。
3 喺路上,佢哋彼此話:「有邊個能幫我哋將墓口嘅石轆開呢?」
4 (因為嗰嚿石好大)。但係佢哋抬頭一望,石已經被移開。
5 佢哋入去墳墓,睇見一個青年坐喺右邊,着住白色嘅長袍;佢哋非常驚慌。
6 個青年話:「唔使驚;我知你哋想搵嗰位被釘十字架嘅拿撒勒人耶穌。佢唔喺呢處,佢已經復生!請睇吓安放佢嘅地方。
7 你哋快去對佢嘅門徒同彼得話:『佢要先過你哋去加利利,喺嗰處你哋可以見到佢,正如佢以前講過你哋知嘅。』」
8 佢哋又驚奇又恐懼,即刻離開墳墓走。佢哋冇將此事話俾任何人知,因為佢哋好驚。
9 (星期日早晨,耶穌復生後,首先向抹大拉嘅馬利亞顯現,耶穌曾經由佢身上趕出七個鬼)。
10 佢去講俾嗰啲跟從耶穌嘅人聽;佢哋正在悲傷哭泣。
11 佢哋聽見耶穌復生同俾馬利亞見嘅消息,就唔信。
向兩個門徒顯現12 此事以後,耶穌用另一種方式向兩個去緊鄉下嘅門徒顯現。
13 呢兩個人返嚟話俾其他門徒知,佢哋重係唔信。
向十一個門徒顯現14 最後,耶穌向正喺處食飯嘅十一個門徒顯現。責備佢哋唔信;因為佢哋頑固,唔信嗰啲喺佢復生以後睇見佢嘅人。
15 佢對佢哋話:「你哋去普天下,傳福音過萬民聽。
16 信而接受洗禮嘅,必得救;唔信嘅,必被定罪。
17 信嘅必有行神蹟嘅能力:佢哋能奉我嘅名趕鬼,會講新方言,
18 用手拎蛇,飲咗有毒嘅飲料亦唔會受害,按手喺病人身上,病人就得醫治。」
耶穌被接升天19 主耶穌向佢哋講話之後,被接到天上,坐喺上帝嘅右邊。
20 門徒出去,到處傳福音;主同佢哋一齊工作,俾佢哋行神蹟嘅能力,證明佢哋所傳嘅道係真實嘅。(另有古卷有下列結語:婦女去見彼得同佢嘅朋友,將所聽到嘅都向佢哋報告。事後,耶穌親自差遣佢嘅門徒,從東到西,傳佈佢嘅神聖、不朽、使人獲得永世拯救嘅信息。)