馬可福音 15
喺彼拉多面前受審1 第二日一早,祭司長匆忙同長老、長老、經學教師,同議會全體商議,定好佢哋嘅計劃。將耶穌綁起嚟,押走,交俾彼拉多。
2 彼拉多問佢:「你係猶太人嘅王咩?」耶穌答話:「你講得啱。」
3 祭司長控告耶穌好多事,
4 所以彼拉多再盤問耶穌話:「你睇,佢哋控告你咁多罪狀,你唔答辯咩?」
5 耶穌依然唔出聲;彼拉多非常詫異。
被判死刑6 每逢逾越節,彼拉多都照民眾嘅要求釋放一個囚犯。
7 有一個人名叫巴拉巴,同一啲喺暴亂中殺人嘅叛徒綁埋一齊。
8 當羣眾集合,要求彼拉多按照慣例為佢哋辦呢件事時,
9 彼拉多問佢哋:你哋想唔想我為你哋釋放猶太人嘅王呢?」
10 其實彼拉多明知,祭司長係出於嫉妒將耶穌解交俾佢嘅。
11 但係祭司長煽動羣眾,要求彼拉多為佢哋釋放巴拉巴。
12 彼拉多再次問羣眾:「噉樣,你哋所稱為猶太人嘅王嘅,我應該點樣處置呢?」
13 佢哋大聲叫話:「將佢釘十字架!」
14 彼拉多問:「佢做乜嘢壞事呢?」佢哋更大聲叫話:「將佢釘十字架!」
15 彼拉多為討好羣眾,就釋放巴拉巴俾佢哋,又命令將耶穌鞭打,然後交俾人去釘十字架。
兵士戲弄耶穌16 兵士將耶穌帶入總督府嘅院,集合全隊。
17 佢哋同耶穌着上一件紫色嘅袍,又用荊棘編成一頂王冠,戴喺佢頭上。
18 然後恭賀佢話:「猶太人嘅王萬歲!」
19 佢哋又用藤條打佢嘅頭,向佢吐口水,屈膝拜佢。
20 戲弄完,就剥佢紫色嘅袍,再同佢着返自己嘅衣服,然後帶佢出去釘十字架。
耶穌被釘十字架21 喺路上,佢哋遇見一個人,名叫西門,從鄉下入城,佢哋強迫佢幫耶穌孭十字架(西門係古利奈人,係亞力山大同魯孚嘅父親)。
22 佢哋將耶穌帶到一處,叫各各他,意思係「枯顱頭地」。
23 喺嗰處,佢哋拎沒藥調和嘅酒俾耶穌飲,但耶穌唔飲。
24 於是佢哋將耶穌釘喺十字架,又抽籤分佢嘅衣服。
25 朝早九點鐘時,佢哋將耶穌釘十字架。
26 在上頭寫落佢嘅罪狀噉話:「猶太人嘅王。」
27 同時佢哋又將兩個兇犯同耶穌一齊釘十字架,一個喺佢右邊,一個喺佢左邊。
28 (噉樣,聖經上所講「佢被列喺罪犯中」嘅話應驗咯。)
29 從嗰處經過嘅人侮辱耶穌,搖頭話:「你呢個要拆毀聖殿、三日內將佢重建起嚟嘅!
30 從十字架落嚟,救自己喇!」
31 祭司長同經學教師亦同樣嘰笑佢,彼此話:「佢救得別人,但不能救自己!
32 基督,以色列嘅王呀,現在由十字架落嚟,等我哋睇吓,我哋就信咯!」嗰啲同耶穌一齊釘十字架嘅人亦同樣辱罵佢。
耶穌嘅死33 中午時,黑暗遮蓋周圍地方,約有三個鐘頭。
34 到下午三點鐘,耶穌大聲叫:「以羅耳,以羅耳,拉馬撒巴各大尼?」意思係:「我嘅上帝,我嘅上帝,你點解離棄我?」
35 旁邊企係度嘅人有啲聽見,就話:「佢叫以利亞呀!」
36 有個人走過去,將蘸滿酸酒嘅海綿綁喺蘆荻上,送俾佢飲,話:「等吓,我哋睇以利亞會唔會嚟放佢落嚟!」
37 耶穌大叫一聲,就斷氣而死。
38 懸掛喺聖殿裏嘅帳幔,從上到下裂為兩半。
39 企喺十字架前嘅一個百夫長,睇見耶穌大叫同死嘅情形,就話:「呢個真係上帝之子!」
40 重有啲婦女由遠處觀望;其中有抹大拉嘅馬利亞,小雅各同約瑟嘅母親馬利亞,同撒羅米。
41 耶穌喺加利利時佢哋跟隨佢,服事佢。重有其他好多婦女係同耶穌一齊嚟耶路撒冷嘅。
耶穌嘅安葬42 挨晚時,亞利馬太人約瑟嚟;佢係一個受人尊敬嘅議員,一向盼望上帝國嘅實現。嗰日係預備日(即係安息日前一日)。約瑟放膽去見彼拉多,向佢要求收殮耶穌嘅遺體。
43 拼於上節
44 彼拉多詫異耶穌已經死了,就叫軍官嚟,問佢耶穌係唔係已經死咗好耐。
45 既然從軍官得到報告,彼拉多就將耶穌嘅遺體交俾約瑟。
46 約瑟買啲麻紗,將耶穌嘅遺體攞落嚟,用麻紗包好,安放喺一個由巖石鑿成嘅墳墓裏,又將一石轆過嚟,塞住墓門。
47 抺大拉嘅馬利亞同約瑟嘅母親馬利亞都守喺旁邊,睇見安放耶穌嘅地方。