Library · yue

路加福音 10

耶穌打發七十人

1 此後,主另外揀選七十人,打發佢哋出去,每組兩人,先去自己想訪問嘅每市鎮。

2 佢對佢哋話:「禾稼多,但工人少;你哋要懇求農場嘅主人多打發工人去田莊工作。

3 你哋去喇!我打發你哋出去,好比羊羔入狼羣之中。

4 唔使帶錢袋;唔使帶旅行袋;唔使帶鞋;亦唔使喺路上停落嚟向人打招呼。

5 你哋無論入邊一家,先要話:『願你一家平安。』

6 若嗰家有喜愛和平嘅人,你哋所請嘅平安就歸佢;若冇就歸返你哋自己。

7 你哋住喺嗰家,就飲食佢哋所供奉嘅,因為工人得工資係合理嘅。唔好從呢家搬去嗰家。

8 無論到邊個城,人若歡迎你哋,擺設乜嘢俾你哋,你哋就食乜嘢,

9 並且醫治嗰處嘅病人,話佢哋知:『上帝國快要臨近你哋處。』

10 但係,若你哋到一個城,人唔歡迎你哋,你哋就到大街上宣佈話:

11 『連你哋城中黐住我哋腳上嘅塵,我哋都要拍甩,表示對你哋嘅警告。但係你哋要記住,上帝國快臨近!』

12 我話你哋知,喺審判日,所多瑪人所遭受嘅懲罰比嗰個城所受嘅重容易受呀!」

唔信嘅城

13 「哥拉汛呀,你有禍咯!伯賽大呀,你有禍咯!我喺你哋中行過嘅神蹟若行喺推羅同西頓,嗰處嘅人早就坐喺地,披麻蒙灰,表示佢哋已經悔改!

14 喺審判日,推羅同西頓所受嘅懲罰比你哋所受嘅重容易受呀!

15 至於你,迦百農呀!你要將自己捧上天咩?你要被扔落地獄呀!」

16 耶穌又對佢門徒話:「凡聽從你哋嘅就係聽從我,拒絕你哋嘅就係拒絕我;拒絕我嘅亦就係拒絕打發我嚟嘅。」

七十人返嚟

17 嗰七十人高高興興返嚟,話:「主呀!我哋憑你嘅名,連鬼都服從我哋!」

18 耶穌對佢哋話:「我睇見撒但好似閃電一樣從天跌落嚟。

19 你哋聽住!我已經賜你哋權柄,能踐踏蛇同蠍,亦能勝過仇敵一切嘅力量,實在冇嘢能加害你哋。

20 但唔好因為邪靈向你哋降服而高興,要因你哋嘅名記錄喺天上而歡喜。」

耶穌嘅歡樂

21 喺嗰時,耶穌喺聖靈感動下充滿歡樂,話:「父呀!天地嘅主,我感謝你,因為你向聰明、有學問嘅人所隱藏嘅事,就向冇學問嘅人啟示。父呀,係咯,因為噉嘅安排係出於你嘅美意。

22 我父已經將一切俾我。除咗父,冇人知子係邊個;除咗子同子所願意啟示嘅人外,亦冇人知父係邊個。」

23 於是耶穌轉身,靜靜對門徒話:「你哋能睇見呢一切係有福咯!

24 我話你哋知,好多先知同君王想睇你哋所見嘅,但冇睇到,想聽你哋所聽嘅,但冇聽到。」

好撒馬利亞人嘅比喻

25 有個律法教師前嚟試探耶穌,話:「老師,我應該做乜嘢致能得永生呢?」

26 耶穌話:「律法書上寫嘅係乜嘢?你點樣解釋呢?」

27 佢答話:「你要盡心、盡性、盡力,盡意愛主─你嘅上帝,又要愛鄰如己。」

28 耶穌話:「你答得對,照噉樣做,就可以得到永生。」

29 嗰個人想顯明自己有理,就對耶穌話:「邊個係我鄰舍呢?」

30 耶穌答佢話:「有個人從耶路撒冷落去耶利哥,途中遇到強盜。剝佢嘅衣服,將佢打到半死,就丟低佢。

31 剛好有個祭司從嗰條路落嚟;行到嗰處,睇見佢,就從另一邊走咗。

32 又有個利未人嚟到嗰處;睇見佢,亦照樣從另一邊走咗。

33 但有個撒馬利亞人路過嗰處,睇見佢,就動起慈心。

34 埋去用油同酒倒喺佢嘅傷口,替佢包紮,扶佢騎上自己嘅牲畜,帶佢到客棧嚟照顧佢。

35 第二日拎兩個銀幣,交俾客棧嘅主人,話:『請你照顧佢,等我返嚟,我會付清所有嘅費用。』」

36 於是耶穌問:「照你睇,呢三個人中,邊一個係遇到強盜人嘅鄰舍呢?」

37 律法教師答話:「以仁慈待佢嘅嗰個人。」耶穌話:「你去照噉樣做喇!」

耶穌探望馬大同馬利亞

38 耶穌同門徒繼續佢哋嘅旅程,嚟到一條村。嗰處有個名叫馬大嘅女人,接待耶穌到佢家中。

39 馬大有個妹叫馬利亞,坐喺主腳前,聽佢講道。

40 馬大因為要做嘅事情多,心裏忙亂,上前話:「主呀,我妹留我一人做咁多嘅事,你唔介意咩?請叫佢嚟幫我!」

41 主答話:「馬大!馬大!你事多操心忙亂,

42 但係不可缺少嘅只有一件。馬利亞已經選擇嗰份最好嘅;冇人能從佢手中奪走。」