Library · yue

路加福音 11

禱告嘅教訓

1 有一次,耶穌喺一處禱告。禱告完,有個門徒對佢話:「主呀,請教我哋禱告,好似約翰教佢門徒一樣。」

2 耶穌對佢哋話:「你哋要噉樣禱告:父呀:願人都尊崇你嘅聖名;願你嘅國降臨。

3 賜俾我哋每日需要嘅飲食。

4 饒恕我哋嘅罪,因為我哋亦饒恕所有得罪我哋嘅人。唔好使我哋遇到艱難嘅考驗。」

5 跟住,耶穌對門徒話:「假如你哋中有人半夜去朋友家,對佢話:『朋友,請借三個餅俾我;

6 因為有個朋友旅行嚟到我處,我冇嘢嚟招待佢。』

7 嗰個人喺裏面答話:『唔好攪擾我,門已經閂埋;仔女同我喺床上,我不能起身拎嘢俾你。』

8 我話你哋知,雖然唔因佢係朋友而起身拎餅俾佢,但因佢噉懇求,亦必起身照佢所需要嘅嚟俾佢。

9 所以我話你哋知,你哋求,就得到;尋找,就搵到;敲門,就開俾你哋。

10 因為凡求嘅,就得到;尋找嘅,就搵到;敲門嘅,就為佢開門。

11 你哋中做父嘅,有邊個仔要魚時,就俾蛇佢?

12 要雞蛋時,就俾蠍佢呢?

13 你哋雖然係惡,尚且知道俾好嘢仔女;何況,你哋嘅天父豈唔係更將聖靈賜俾向佢求嘅人咩?」

耶穌同別西卜

14 耶穌趕走一個啞鬼,鬼出去後,嗰個人又能講話。羣眾都好驚奇,

15 但係佢哋中有人話:「佢係倚靠鬼王別西卜趕鬼。」

16 亦有啲人想陷害佢,要求佢行個神蹟嚟表明佢所做嘅係出於上帝。

17 耶穌知佢哋想乜嘢,就對佢哋話:「但凡國家自相紛爭,就必然衰敗;但凡一家自相紛爭,亦必然破碎。

18 若撒但自己相爭,佢嘅國又點能企得住呢?你哋話我趕鬼係倚靠別西卜,

19 噉樣,你哋嘅子弟趕鬼,又係倚靠邊個呢?你哋嘅子弟要證明你哋係錯嘅!

20 其實,我若靠上帝嘅能力趕鬼,就證明上帝國已經臨到你哋處咯。

21 一個武器齊備嘅武士守衛自己住宅時,佢嘅財物係安全嘅。

22 但係一個比佢更有力嘅武士嚟,制伏咗佢,就會將佢所倚靠嘅武器奪走,而且分佢所盜取嘅贓物。

23 凡唔同我同道嘅就係反對我嘅;唔同我一齊收聚嘅,就係分散嘅。」

污鬼返嚟

24 「污鬼離開人,走遍旱地,去搵棲息嘅地方,搵唔到,就話:『 我要返去原來嘅屋。』

25 於是佢返去,發現間屋打掃得乾淨又整齊。

26 佢就出去,帶七個比自己更邪惡嘅鬼嚟,同佢住喺一齊。嗰個人後來嘅景況比從前更壞咯。」

真有福

27 耶穌正在講呢啲話時,有一個女人從人羣中大聲對佢話:「懷你胎同餵奶過你嘅有福咯!」

28 耶穌話:「凡聽聞上帝嘅話而遵守嘅人更有福呀!」

要求神蹟

29 嗰時羣眾圍繞住耶穌,耶穌繼續講論話:「呢個邪惡世代嘅人!竟要求見神蹟,除約拿嘅神蹟外,再冇其他神蹟俾佢哋見。

30 約拿點樣成為尼尼微人眼中嘅神蹟,人子亦同樣成為呢一代人眼中嘅神蹟。

31 喺審判日,南方嘅女王必企起嚟控告呢一代嘅人,因為佢從非常遠嘅地方嚟聽所羅門王智慧嘅話。我話你哋知,呢處有比所羅門更大嘅!

32 喺審判日,尼尼微人必起嚟控告你哋,因為佢哋聽聞約拿嘅宣道就棄邪歸正。我話你哋知,呢處有一人比約拿更大!」

身體嘅光

33 「冇人點亮燈去放喺地牢或斗底下;乃係放喺燈臺上,等入嚟嘅人睇見亮光。

34 你嘅眼好比身上嘅燈。你嘅眼好,全身就光明;你嘅眼壞,全身就黑暗。

35 所以,要省察,免致你裏頭嘅光變成黑暗。

36 若你全身充滿光明,毫無黑暗,就會光輝四射,好似燈嘅亮光照耀你。」

痛責法利賽人同律法教師

37 耶穌講完呢啲話,有一個法利賽人嚟請佢食飯,佢就入去坐席。

38 法利賽人見耶穌飯前唔先洗手,就見出奇。

39 主對佢話:「你哋法利賽人將杯盤嘅外面洗得乾乾淨淨,但係你哋裏面充滿貪慾同邪惡。

40 無知嘅人呀,造外面嘅上帝豈唔係亦造裏面咩?

41 只要將裏面嘅施俾窮人,你哋就潔淨咯。

42 你哋法利賽人有禍咯!你哋將調味品,如薄荷、茴香,同其他香料,奉獻十分之一俾上帝,但忽視正義同對上帝嘅愛。其實,呢啲致係你哋必須實行嘅;至於其他嘅,亦唔好忽略。

43 你哋法利賽人有禍咯!你哋喜歡坐會堂裏嘅特別座位,喜歡人喺公共場所向你哋致敬問安。

44 你哋有禍咯!因為你哋好似係冇記號嘅墳墓,人喺上面走過,都唔知。」

45 有一個律法教師對耶穌話:「老師,你噉樣講,連我哋亦侮辱咯!」

46 耶穌答話:「你哋呢班律法教師有禍咯!你哋將難背嘅重擔放喺人哋嘅膊頭上,自己唔肯動一隻手指去減輕佢哋嘅負擔。

47 你哋有禍咯!你哋幫先知修造墳墓,嗰啲先知正係你哋祖宗殺害嘅。

48 噉就證明你哋同意祖宗所做嘅;佢哋殺害先知,而你哋幫先知修造墳墓。

49 所以,上帝嘅智者曾經講過:『我要打發先知同使徒去佢哋處;有啲被佢哋殺,有啲受佢哋逼迫。』

50 因此,從創世以來,所有殺先知嘅罪,

51 從亞伯被殺,直到喺祭壇同聖所之間被殺嘅撒迦利亞嘅血債,都要歸呢一代嘅人償還。我話你哋知,呢代嘅人必要為呢一切受懲罰!

52 你哋呢班律法教師有禍咯!你哋揸住打開知識寶庫嘅鎖匙,自己唔願入去,亦唔准想入去嘅人入去!」

53 耶穌離開嗰處,經學教師同法利賽人開始激烈批評佢,向佢發出好多難題,

54 想搵話柄嚟陷害佢。