Library · yue

路加福音 13

悔改或死亡

1 當時,有人話耶穌知,有啲加利利人喺向上帝獻祭時被彼拉多殺。

2 耶穌話:「因為呢啲加利利人死於非命,你哋就以為佢哋比其他嘅加利利人更有罪咩?

3 我話你哋知,唔係;除非你哋離棄罪惡,亦會遭遇同樣嘅結局。

4 西羅亞塔傾跌壓死十八人,你哋以為佢哋比其他住喺耶路撒冷嘅人更有罪咩?

5 我話你哋知,唔係;你哋若唔離棄罪惡,都要噉樣滅亡。

唔結果嘅無花果樹

6 跟住,耶穌對佢哋講一個比喻:「有個人喺自己嘅葡萄園種一樖無花果樹。想喺樹上搵果,但搵唔到。

7 於是佢對園丁話:『睇吖,三年嚟,我喺呢樖無花果樹搵果,乜嘢都搵唔到。 斬咗佢喇!何必白佔土地呢?』

8 園丁話:『主人,請再寬容一年,等我挖鬆周圍嘅泥土,加肥料。

9 若下年結果就好;不然,就將佢斬去。』」

喺安息日醫好駝背嘅女人

10 安息日,耶穌喺會堂裏教導人。

11 有個女人被鬼迷,病咗十八年,腰孿總唔伸得直。

12 耶穌睇見佢,就對佢話:「婦人,你嘅病離開你!」

13 於是用兩隻手按吓佢,佢嘅腰即時伸得直,就歸榮耀俾上帝。

14 會堂嘅主管見耶穌喺安息日醫病,就發嬲,對眾人話:「我哋有六日好工作,要醫病應該喺呢六日內,但喺安息日就唔好。」

15 主答話:「偽善嘅人呀!唔通你哋喺安息日就唔解開槽邊嘅牛、驢,牽去飲水咩?

16 呢處有個亞伯拉罕嘅後代,被撒但捆綁咗十八年;唔通喺安息日就唔應該解開佢嘅鎖鍊咩?」

17 耶穌呢啲話使佢嘅敵人覺得慚愧,但係羣眾對佢所做一切奇妙嘅事都好歡喜。

芥菜種嘅比喻

18 耶穌話:「上帝國好似乜嘢呢?我要拎乜嘢嚟比較呢?

19 上帝國好比一粒芥菜種,有人將佢種喺自己嘅園。芥菜長大起來,成為一樖樹,連飛鳥亦喺佢嘅枝上築巢。」

麵酵嘅比喻

20 耶穌又話:「我拎乜嘢嚟比較上帝嘅國呢?

21 佢好比麵酵,有個女人拎嚟放落三斗麵粉中,等到全團都發起。」

窄門

22 耶穌經過好多村鎮,朝耶路撒冷去,沿途教導人。

23 有人問佢:「主呀,得救嘅人係少咩?」

24 耶穌對佢哋話:「你哋要努力從窄門入去。我話你哋知,將來有好多人想入去,但係唔入得。

25 等到家主起身關門,你哋企喺門外敲門,話:『主呀,開門過我哋喇!』佢就答話:『我唔識得你哋係從邊處嚟嘅!』

26 嗰時你哋會話:『我哋曽同你一齊飲食;你亦喺我哋嘅大街上教導過我哋。』

27 但係,佢要再一次話:『我唔知道你哋係從邊處嚟嘅。你哋作惡嘅人,走開喇!』

28 你哋見亞伯拉罕,以撒、雅各,同眾先知喺上帝國裏,但你哋被驅逐喺外面時,就要哀哭,咬牙切齒!

29 從東西南北各地都有人嚟參加上帝國嘅筵席。

30 嗰啲在後嘅,將要在先;在先嘅,將要在後。」

為耶路撒冷哀哭

31 嗰時,有幾個法利賽人嚟見耶穌,對佢話:「你要離開呢處去其他地方,因為希律想殺你。」

32 耶穌答佢哋話:「你哋去話俾嗰隻狐狸知:『今日同明日我要趕鬼醫病,第三日我就完成我嘅工作。』

33 雖然噉樣,今日、明日、後日,我必須前行,因為先知喺耶路撒冷外喪命係唔做得嘅。

34 耶路撒冷呀!耶路撒冷呀!你殺先知,又用石掟死上帝打發到你處嚟嘅使者!我幾多次想保護你嘅仔女,好似母雞聚埋雞仔喺翼下一樣。但係你哋唔願意!

35 睇吓!你哋嘅家園將變成荒涼。我話你哋知,你哋再唔會見到我,直到你哋話:『願上帝賜福俾嗰位奉主名而嚟嘅!』」