Library · yue

路加福音 14

耶穌醫好病人

1 有一個安息日,耶穌到一個法利賽人領袖家中食飯;有啲人窺探佢。

2 喺佢面前有一個患水腫病嘅人,

3 耶穌就問律法教師同法利賽人話:「我哋嘅律法准唔准喺安息日醫病呢?」

4 佢哋都唔出聲。耶穌就將嗰個人醫好,打發佢走。

5 於是佢對眾人話:「你哋中邊個有仔或牛喺安息日跌落井,唔立刻拉佢上嚟呢?」

6 佢哋對耶穌所問嘅話都答唔出。

自取其辱

7 耶穌注意到有啲客人為自己挑選筵席上嘅首位,就用比喻對眾人話:

8 「你被請去參加婚宴時,唔好坐喺首座,恐怕有比你更受尊重嘅客人亦喺被邀請之列。

9 嗰個邀請你嘅主人埋嚟對你話:『請讓座俾呢位喇!』嗰時,你會覺得好難為情,不得不退到末座。

10 你被請時,就去坐喺末座,等主人嚟對你話:『朋友,請上座。』噉樣,你喺賓客前就有光彩。

11 因為上帝要將自高嘅人降為卑微,又高舉自甘卑微嘅人。」

好客之道

12 耶穌又對請佢嘅主人話:「你招待午餐或晚餐時,唔好邀請你嘅朋友、兄弟、親戚,或富有嘅鄰舍,恐怕佢哋請返你,還你嘅人情。

13 你請客,就請嗰啲貧窮嘅、殘廢嘅、跛腳嘅、盲眼嘅;

14 噉樣,你就有福,因為嗰啲人無力報答你。喺義人復生時,上帝會親自報答你。」

婚宴嘅比喻

15 同席有一人聽見呢啲話,就對耶穌話:「能喺上帝國裏享受筵席嘅人有福咯!」

16 耶穌對佢話:「有人大開宴會,邀請好多客人。

17 入席時,佢打發僕人去向被請嘅客人話:『請嚟喇,一切都準備好咯!』

18 但係佢哋每個都推辭。頭一個話:『我剛買咗一塊地,必要去睇。請原諒我,我不能嚟。』

19 另一個話:『我買咗五對牛,要去試吓;請原諒我,我不能奉陪。』

20 又有一個話:『我剛剛結婚,實在無法分身。』

21 僕人返去將情形報告主人。主人就發嬲,對僕人話:『快出去,到城裏嘅大街小巷,帶貧窮嘅、殘廢嘅、盲眼嘅、跛腳嘅入嚟。』

22 冇幾耐,僕人返嚟報話:『主人,你所吩咐嘅已經辦好,但係重有好多空位!』

23 主人就對僕人話:『到馬路同陋巷,勸人入嚟,坐滿我間屋。』

24 我話你哋知,先前邀請嘅人冇一個得嘗我嘅筵席!」

做門徒嘅代價

25 有好多人同耶穌一齊行。耶穌轉身對佢哋話:

26 「到我處嘅人若唔愛我勝過愛自己嘅父母、妻、仔女、兄弟、姊妹,及自己嘅生命,就不能做我嘅門徒。

27 凡唔肯背起自己嘅十字架嚟跟從我嘅,亦不能做我嘅門徒。

28 你哋中有邊個想起一座高樓,唔先坐落嚟精打細算,睇吓有冇完成全部工程嘅費用?

29 否則,恐怕地基奠好後,樓房無法完成,睇見嘅人都譏誚佢,

30 話:『呢個人開工建造,但不能完工!』

31 假使有一個國王帶領一支一萬人嘅隊伍,去同另一個擁有兩萬人軍隊嘅國王打仗,佢必先坐落嚟估計自己嘅實力,睇吓能不能對抗敵軍;

32 若不能,佢就趁敵軍仍喺遠方時,打發使者去同對方談判和平嘅條件。

33 同樣,你哋無論邊個,除非放棄一切所有嘅,就不能做我嘅門徒。」

無用嘅鹽

34 「鹽原係好嘅,但若失去味道,點能使佢再鹹呢?

35 用作泥土或肥料都唔適合,只好丟棄。有耳可聽嘅,就應當聽!」