Library · yue

路加福音 16

聰明嘅管家

1 耶穌對佢嘅門徒話:「某財主有個管家;有人向佢告狀,話呢個管家浪費主人嘅財物。

2 主人就將管家叫嚟,對佢話:『我聽聞你呢啲事,係點樣呢?你將管嘅賬簿交出嚟,你不能再擔任管家嘅職務。』

3 管家心裏想:『主人要辭退我,以後我去做乜嘢呢?鋤地?我冇氣力;乞食?怕難為情。

4 對喇,我知道點樣做,使我喺失業時有朋友肯接我到佢哋家中住。』

5 於是佢將主人嘅債戶叫嚟。對頭一個話:『你欠我主人幾多?』

6 佢答話:『一百桶橄欖油。』管家話:『快坐落,改寫五十。』

7 佢又問另一個話:『你呢,你欠幾多?』佢答話:『一百擔麥。』管家話:『改寫八十。』

8 主人誇獎呢個唔誠實嘅管家做事咁聰明。因為喺應付世事方面,世俗嘅人比光明嘅人更加精明。」

9 耶穌跟住又話:「我話你哋知,用不義嘅金錢結交朋友,噉樣,金錢用完時,你可以被接到永久嘅家鄉。

10 人喺小事上忠心,喺大事上亦忠心;人喺小事上唔誠實,喺大事上亦唔誠實。

11 若你哋喺處理不義嘅財物上唔忠心,邊個會將真實嘅財富付託你哋呢?

12 若你哋對屬他人嘅嘢唔忠心,邊個會將自己嘅嘢俾你哋呢?

13 冇僕人能伺候兩個主人。佢唔係厭惡呢個,喜愛嗰個,就係睇重呢個,輕視嗰個。你哋不能同時做上帝嘅僕人,又做金錢嘅奴隸。」

其他一啲教訓

14 愛錢嘅法利賽人聽見呢啲話,就譏笑耶穌。

15 耶穌對佢哋話:「你哋喺人面前好似正人君子,但係上帝知道你哋嘅內心;因為人所睇重嘅,喺上帝眼中係可僧惡嘅。

16 摩西嘅律法同眾先知書嘅效用到施洗約翰為止;從此,上帝國嘅福音被傳開,人人都想努力入去。

17 天地消失要比律法嘅一筆一畫被塗抹重容易呀!

18 任何人休棄自己嘅妻去同另外嘅女人結合就係犯姦淫;娶被休棄嘅女人亦係犯姦淫。」

財主同拉撒路

19 「從前有個財主,每日穿着華麗嘅衣服,過奢華宴樂嘅生活。

20 同時有個乞兒,名叫拉撒路;佢成身生瘡,被帶到財主家嘅門口,

21 希望執啲財主檯上跌落嘅零碎嚟食,連狗都嚟舔佢嘅瘡。

22 後來呢個窮人死咗,天使將佢帶到亞伯拉罕身邊,喺天上享受盛筵;財主亦死,並且埋葬。

23 財主喺陰間受盡痛苦;佢抬頭望見亞伯拉罕喺遠處,又見拉撒路喺佢身邊,

24 就呼叫話:『我嘅祖宗亞伯拉罕呀,可憐我!請打發拉撒路用指尖蘸啲水嚟涼吓我條脷喇!因為我喺火燄中,非常痛苦!』

25 亞伯拉罕答話:『仔呀,你要記得你生前享過福,拉撒路亦受過苦;現在佢喺呢處得到安慰,你反而喺痛苦中。

26 不獨係噉,喺你我之間有深淵隔開,人想從呢邊到你哋嗰邊係不能嘅,要從你哋嗰邊到我呢邊亦不能。』

27 財主話:『祖宗呀,既然係噉,求你打發拉撒路去我父家中;

28 我有五個兄弟,等佢去警告佢哋,免致佢哋亦到呢處痛苦嘅地方。』

29 亞伯拉罕話:『你嘅兄弟有摩西同眾先知警告佢哋,等你嘅兄弟去聽佢哋嘅話喇!』

30 財主話:『先祖亞伯拉罕呀,唔係噉樣。假如從死者中有一個去佢哋處,佢哋就會棄邪歸正。』

31 亞伯拉罕話:『若佢哋唔聽摩西同眾先知嘅話,即使有人從死者中復生,佢哋亦唔會相信嘅呀!』」