Library · yue

路加福音 15

迷羊嘅比喻

1 有一次,好多稅吏同罪人嚟聽耶穌講道。

2 法利賽人同經學教師埋怨話:「呢個人竟然接待罪人,並且同佢哋一齊食飯!」

3 因此,耶穌講一個比喻俾佢哋聽:

4 「你哋中有人有一百隻羊,其中一隻迷失咗,點樣辦呢?佢必將其他九十九隻留喺草場,去搵嗰隻迷失嘅,直至搵到為止。

5 搵到,佢就非常歡喜,將羊托上佢膊頭,

6 帶回家,然後邀請朋友鄰舍,對佢哋話:『我好高興!我嗰隻迷失咗嘅羊已經搵到喇!你哋嚟同我一齊慶祝喇!』

7 同樣,我話你哋知,一個罪人悔改,喺天上嘅喜樂會比已經有九十九個無需悔改嘅義人所有嘅喜樂重大呀!」

失錢嘅比喻

8 「假如一個女人有十個銀幣,失去一個,點樣辦呢?佢必點起燈,打掃間屋,細心嚟搵,直到搵到為止。

9 搵到,就邀請朋友同鄰舍嚟,對佢哋話:『我好高興!我遺失咗嘅銀幣已經搵到!請嚟同我一齊慶祝喇!』

10 同樣,我話你哋知,上帝嘅天使亦為一個罪人悔改而高興。」

仁慈嘅父親

11 耶穌繼續話:「一個人有兩個仔。

12 細仔對父親話:『父親,請你將我應得嘅產業分俾我。』父親就將產業分俾佢。

13 過幾日,細仔賣去分得嘅產業,帶住錢,離家去。到好遠嘅地方,喺嗰處揮霍無度,過放蕩嘅生活。

14 當佢花盡一切所有嘅,嗰個地方發生嚴重饑荒,佢就一貧如洗,

15 只好去投靠當地嘅一個居民;嗰個人打發佢到自己嘅農場去看豬。

16 佢恨不得拎餵豬嘅豆莢充飢;但係,連呢啲都冇人俾佢。

17 最後,佢醒悟過嚟,話:『我父親處有好多雇工,佢哋糧食充足,我反而喺呢處餓死咩?

18 我要起身,返到父親處,對佢話:父親,我得罪天,又得罪你。

19 我再唔配做你嘅仔;請將我當做你嘅雇工喇!』

20 於是,佢起身返去父親處。佢離開家仍然好遠,父親睇見佢,心裏充滿憐憫,迎向前去,緊緊擁抱住個仔,不停同佢接吻。

21 仔話:『父親,我得罪天,又得罪你;我再唔配做你嘅仔。』

22 但係父親吩咐僕人:『 趕快拎最好嘅衣服俾佢着,拎戒指俾佢戴,拎鞋俾佢着,

23 然後將嗰隻肥牛仔拉嚟。等我哋設宴慶祝!

24 因為我呢個仔係死而復生,失而復得嘅。』噉就快樂起嚟。

25 嗰時,大仔從農場返嚟,離屋冇遠,聽見音樂同跳舞嘅聲。

26 佢叫一個僕人嚟,問佢發生乜嘢事。

27 僕人答話:『你細佬返嚟,你父親見佢無災無病返嚟,將肥牛仔劏咗。』

28 大仔非常嬲,唔肯入去;佢父親出嚟勸佢。

29 但佢對父親話:『呢幾年嚟,我好似奴隸一樣為你工作,冇違背過你嘅命令,你俾過我乜嘢呢?連俾一隻山羊仔等我同朋友熱鬧一番都未有過。

30 但係你呢個仔,佢將你嘅財產都花喺娼妓身上,現今返嚟,你就為佢劏肥牛仔!

31 父親對佢話:『仔呀,你成日同我喺一齊;我一切所有都係你嘅。

32 但係你細佬係死而復生,失而復得嘅;我哋為佢設宴慶祝係應該嘅。』」