路加福音 20
耶穌嘅權柄1 一日,耶穌喺聖殿裏教導人,傳福音。有祭司長、經學教師,同長老嚟見佢,
2 問佢:「你憑乜嘢權柄做呢啲事?係邊個俾你呢啲權呢?請話我哋知!」
3 耶穌答佢哋話:「等我先問你哋一句話,話俾我知,
4 約翰施洗嘅權係從上帝抑或從人處嚟嘅呢?」
5 佢哋爭辯起嚟,話:「我哋應該點樣答呢?若我哋話『從上帝處嚟嘅』,佢會話:『你哋點解唔相信約翰呢?』
6 若我哋話『從人處嚟嘅』,羣眾會拎石掟我哋,因為佢哋都相信約翰係先知。」
7 於是佢哋答話:「我哋唔知係從邊處嚟嘅。」
8 耶穌就對佢哋話:「噉樣,我亦唔話你哋知,我憑乜嘢權柄做呢啲事。」
壞農夫嘅比喻9 跟住,耶穌向佢哋講一個比喻:「有個人開墾一個葡萄園,將佢租俾農夫,自己離家遠行。過一段時間,
10 收葡萄嘅季節到,佢打發一個僕人去向佢哋收佢應得嘅分額。但係嗰啲農夫將佢來打,令佢空手返去。
11 園主再打發另一個僕人去;佢哋照樣毆打佢,侮辱佢,又使佢空手返去。
12 第三次園主又打發一個僕人去;農夫又打傷佢,將佢推出園外。
13 葡萄園主話:『我應該點樣辦呢?我要打發我所疼愛嘅仔去,或者佢哋會尊敬佢。』
14 但農夫睇見園主嘅仔,彼此話:『呢個係園主嘅繼承人;我哋殺咗佢,佢嘅產業就歸我哋喇!』
15 因此,佢哋將佢推到葡萄園外,殺死佢。噉樣,葡萄園嘅主人要點樣對付嗰啲農夫呢?
16 佢必要嚟殺滅佢哋,將葡萄園轉租俾別人。」羣眾聽咗呢啲話,就話:「絕唔可以有噉樣嘅事!」
17 耶穌睇住佢哋,問話:「聖經話:匠人丟棄嘅石已成為最重要嘅基石。呢啲話係乜嘢意思呢?
18 邊個跌喺呢塊石上,邊個就粉身碎骨;嗰塊石跌落邊個嘅身上,定必將佢粉碎。」
納稅嘅問題19 經學教師同祭司長知道耶穌嘅比喻係指佢哋講嘅,就想當場捉耶穌;但係又怕羣眾,
20 只好再等機會。佢哋收買一啲人,假裝善意,向耶穌提出問題,想搵佢嘅話柄,將佢送俾總督懲辦。
21 呢啲探子對耶穌話:「老師,我哋知你所講所教嘅都合情合理,亦知道你唔睇情面,總係忠實將上帝嘅道教導人。
22 請話我哋知,向羅馬皇帝該撒納稅係唔係違背我哋嘅律法呢?」
23 耶穌睇穿佢哋嘅詭計,對佢哋話:
24 「拎一個銀幣俾我睇!上面嘅像同名號係邊個嘅呢?」佢哋答話:「係該撒嘅。」
25 耶穌對佢哋話:「噉樣,該撒嘅嘢歸返該撒,上帝嘅嘢歸返上帝。」
26 佢哋無法當住民眾從耶穌講嘅話搵到乜嘢把柄;耶穌嘅對答使佢哋十分驚奇,就冇聲出。
復生嘅問題27 有啲否認有復生嘅撒吐該人嚟見耶穌,問佢:
28 「老師,摩西寫落話:『人若有妻冇仔就死咗,佢細佬必須娶寡嫂為妻,替大佬傳宗接代。』
29 從前有兄弟七人:老大結婚,冇仔就死咗。
30 老二就娶寡嫂,
31 以後老三亦娶佢,一直到老七都娶過佢,亦都冇仔,就死咗。
32 最後個女人亦死咗。
33 請問喺復生時,佢算係邊一個嘅妻呢?因為兄弟七人都娶過佢!」
34 耶穌答佢哋話:「今世嘅男女有娶有嫁;
35 但係配得從死裏復生,並且生喺來世嘅人,唔娶亦唔嫁。
36 佢哋同天使一樣,係唔死嘅。佢哋係上帝嘅仔女,因為佢哋從死裏復生。
37 摩西已經證實有死人復生嘅事,佢喺荊棘燃燒嘅故事上講到:主係『亞伯拉罕嘅上帝,以撒嘅上帝,雅各嘅上帝。』
38 意思係話上帝係生人嘅上帝,唔係死人嘅上帝。因為喺上帝眼中,人都係生嘅。」
39 有啲經學教師話:「老師,你講得好!」
40 從此,佢哋再唔敢向耶穌提出問題。
有關基督嘅問題41 但係耶穌對佢哋話:「人點能話基督係大衛嘅子孫呢?
42 大衛喺詩篇上自己講過:主對我主話:你坐喺我嘅右邊,
43 等我使你嘅仇敵屈服喺你腳下。
44 大衛既然稱佢做『主』,基督又點會係大衛嘅子孫呢?」
耶穌痛責經學教師45 羣眾聽講時,耶穌對門徒話:
46 「要提防經學教師。佢哋喜歡穿着長袍招搖過市,喜歡人喺公共場所向佢哋致敬問安,又喜歡會堂裏嘅特別座位同宴會上嘅首座。
47 佢哋佔寡婦嘅便宜,吞沒佢哋嘅家產,然後表演長篇嘅禱告!佢哋必受到更嚴厲嘅懲罰!」