路加福音 21
寡婦嘅奉獻1 耶穌舉頭,睇見一啲有錢人將佢哋嘅捐款投入聖殿嘅奉獻箱。
2 又睇見一個窮寡婦投入兩個小銅錢。
3 於是佢話:「我話你哋知,呢個窮寡婦奉獻嘅比其他嘅人重多。
4 因為眾人係從佢哋嘅財富中捐出有餘嘅;但係佢已經好窮,仍然將自己全部嘅生活費獻上。」
預言聖殿嘅毀滅5 有人談論聖殿,話佢點樣用精美嘅石同還願嘅禮物裝飾成嘅。耶穌話:
6 「你哋睇見呢一切咩?日子將到,冇一嚿石會留喺另一嚿上,每一嚿都要被拆落嚟。」
災難同迫害7 佢哋就問:「老師,幾時會發生呢啲事呢?呢一切發生嘅時候會有乜嘢預兆呢?」
8 耶穌話:「你哋要謹慎,唔好受愚弄;因為有好多人會假冒我嘅名嚟,話:『我係基督!』又話:『時候近咯!』你哋唔好跟從佢哋。
9 你哋聽見戰爭同叛亂嘅消息時,唔使驚慌。因為此事必會先發生;但係末期不能即時到。」
10 耶穌跟住話:「民將攻打民,國將攻打國。
11 到處將有嚴重嘅地震、饑荒,同瘟疫,又有可怕嘅奇蹟異象喺空中出現。
12 呢啲事發生以前,你哋將被捉拿並遭受迫害;將你哋交俾會堂審問,又使你哋坐監。為我嘅緣故,你哋將被帶到君王同統治者面前。
13 但呢啲事就係你哋為福音作證嘅機會。
14 所以,你哋要立定主意,不必事先考慮點樣為自己申訴;
15 因為我會賜你哋口才同智慧,使你哋嘅敵人對你哋所講嘅話無法反對辯駁。
16 甚至你哋嘅父母、兄弟、親戚、朋友,亦將出賣你哋;你哋中有啲人亦將被佢哋害死。
17 因我嘅緣故,眾人將憎恨你哋;
18 但係你哋連一條頭髮都不至於失去。
19 你哋要堅忍,致能保守自己嘅性命。」
預言耶路撒冷嘅毀滅20 「當你哋睇見耶路撒冷被敵軍圍困時,就知佢快被毀滅。
21 嗰時,住喺猶太嘅,要逃到山上;住喺城裏嘅,要出嚟;住喺鄉下嘅,唔好入城。
22 因為呢啲係『懲罰嘅日子』,使聖經上嘅話俱得應驗。
23 喺嗰啲日子,懷孕嘅女人同餵奶嘅母親有禍咯!大災難將臨到呢處地方,上帝嘅義憤將降喺呢啲人身上。
24 佢哋必死喺刀劍下,或被俘擄到各國。異邦人要踐踏耶路撒冷,直到佢哋嘅期限滿咗。」
人子嘅來臨25 「嗰時,日、月、星將要顯出異象。地上嘅國家都會因海中波浪嘅大聲驚慌不定。
26 眾人因將要臨到世上嘅事,都嚇到暈,太空嘅系統都搖動。
27 嗰時,人子將出現,充滿大能力同榮耀駕雲降臨。
28 呢啲事發生時,你哋要挺身昂首,因為你哋得救嘅日子就到咯!」
無花果樹嘅教訓29 耶穌又對佢哋講一個比喻:「你哋睇無花果樹同其他嘅樹。
30 佢哋一出新葉,你哋就知夏天快到。
31 同樣,你哋睇見呢一切嘅現象就知上帝國近咯。
32 我實在話你哋知:呢啲人重未去世以前,呢一切事俱要發生。
33 天地會消失,但我嘅話永不消失。」
必須警醒34 「你哋自己要警醒!唔好俾酒肉同生活上嘅憂慮麻痺你哋嘅心靈,恐怕嗰個日子忽然臨到你哋。
35 因為嗰個日子好似羅網一樣,臨到全世界所有嘅人身上。
36 你哋要警醒,不斷禱告,使你哋有力量忍受一切將發生嘅事,能企喺人子面前。」
37 耶穌日間喺聖殿教導人,夜晚出城,喺橄欖山過夜;
38 羣眾一早就去聖殿,聽耶穌講道。