路加福音 24
耶穌復生1 星期日,清早時,嗰啲婦女帶住預備嘅香料去墳墓。
2 佢哋發現石已經從墳墓門前輾開,
3 就走入去,但冇睇見主耶穌嘅遺體。
4 正在猜疑之間,忽然有兩個衣服發光嘅人企喺佢哋旁邊;
5 佢哋非常驚慌,蹼喺地上。嗰兩個人對佢哋話:「你哋點解喺死人中搵生人呢?
6 佢唔喺呢處;佢已經復生。你哋要記得佢喺加利利時向你哋講過嘅話:
7 『人子必須被交喺罪人手中,釘喺十字架上,第三日復生。』」
8 佢哋就記起耶穌嘅話,
9 於是從墳墓處返去,將所遇見嘅一切事向十一使徒同其他嘅人報告。
10 向使徒報告呢一切嘅婦女包括抹大拉嘅馬利亞、約亞拿、雅各嘅母親馬利亞,同其他婦女。
11 使徒以為呢啲婦女講假話,就唔信佢哋。
12 彼得起身,走到墳墓,俯低頭,睇見嗰塊麻紗獨在一處。於是返去,對所發生嘅事非常驚奇。
以馬忤斯路上13 同一日,門徒中有兩個去一條村,名以馬忤斯,離耶路撒冷約二十五里。
14 佢哋沿路談論所發生嘅一切事。
15 正談論時,耶穌親自行近佢哋,與佢哋同行;
16 佢哋睇見佢,但唔認得佢。
17 耶穌問佢哋:「你哋一邊行,一邊談論乜嘢呢?」佢哋就歇住腳,滿面愁容。
18 其中一個名叫革流巴嘅,答話:「唔通你係耶路撒冷居民中,惟一唔知近日喺嗰處發生嘅事咩?」
19 耶穌話:「乜嘢事呢?」佢哋話:「係拿撒勒人耶穌嘅事!佢係個先知,喺上帝同眾人前,講話做事都有力量;
20 我哋嘅祭司長同首領竟然將佢解去判死刑,釘喺十字架上。
21 我哋本來盼望佢係要嚟拯救以色列嘅嗰一位!不但噉樣,呢件事發生己經第三日。
22 我哋中有幾個婦女使我哋驚奇,佢哋一早去墳墓處,
23 冇見到佢嘅遺體。就返嚟報告話,佢哋睇見天使顯現,話耶穌已經復生。
24 我哋中有人去墳墓處,發現一切都同婦女所講嘅一樣,但係冇睇見佢。」
25 於是耶穌對佢哋話:「你哋真蠢呀!對先知所講嘅話你哋點解會覺得咁難信呢?
26 基督唔係必要經歷呢一切致入去佢嘅榮耀咩?」
27 於是,佢根據摩西同先知所寫嘅,開始向佢哋解釋聖經上關於自己嘅一切記載。
28 佢哋行近所要去嘅嗰條村,耶穌似乎重要繼續趕路,
29 但佢哋挽留佢話:「日頭已經落山,天就黑喇,請你同我哋住喇!」耶穌就入去,同佢哋住。
30 當佢哋坐落食飯時,耶穌拎起餅,向上帝感謝,然後擘開,遞俾佢哋。
31 佢哋嘅眼忽然明亮,認出佢;但係耶穌忽然唔見咗。
32 佢哋彼此話:「佢喺路上同我哋講話,為我哋解釋聖經時,我哋嘅心唔係好似火咁熱咩?」
33 佢哋立刻動身,返去耶路撒冷。見十一使徒同另外一啲人聚埋一齊,
34 正話:「主真係復生;佢已經顯現俾西門睇!」
35 嗰兩個人亦將路上所遇見嘅,同佢哋點樣喺主擘餅時認出佢嘅經過,話俾眾人知。
耶穌向門徒顯現36 佢哋正在講呢啲事,忽然,主親自企喺佢哋當中,對佢哋話:「願你哋平安。」
37 佢哋就好驚慌,以為見到鬼。
38 耶穌對佢哋話:「你哋點解咁煩擾呢?點解心中咁疑惑呢?
39 你睇吓我手同腳!係我,唔係別人!摸一摸我,你哋就知道,鬼冇肉,冇骨;你哋睇,我係有嘅。」
40 佢噉樣講,將手同腳俾佢哋睇。
41 佢哋因為歡喜到極,仍然唔信,又見出奇。佢問佢哋:「你哋呢處有嘢食冇?」
42 佢哋就拎一件燒魚俾佢。
43 佢接過嚟,喺佢哋面前食。
44 然後耶穌對佢哋話:「呢一切事係從前我同你哋喺一齊時話過你哋知嘅:摩西嘅律法、先知嘅書,同詩篇所敘述關於我嘅每一件事必須實現。」
45 於是佢開佢哋嘅心智,使佢哋明白聖經嘅話,
46 又對佢哋話:「聖經記載:基督要受害,第三日從死裏復生。
47 你哋要奉佢嘅名,將悔改同赦罪嘅信息,從耶路撒冷開始,傳遍萬國。
48 你哋就係此事嘅見證人。
49 我要親自將我父所應許嘅賜過你哋;你哋要喺城裏等候,直到你哋領受從上嚟嘅能力。」
耶穌被接升天50 跟住,耶穌帶佢哋出城,去伯大尼。喺嗰處,佢舉手為佢哋祝福。
51 喺祝福佢哋時離開佢哋,被接上天。
52 佢哋就敬拜佢,懷住極喜樂嘅心返耶路撒冷,
53 時常喺聖殿頌讚上帝。